Ня шитнень Саратовскяй областень Петровскяй райононь Оркино велеса ётафтовсь Мокшэрзянь народть Межрегиональнай общественнай организациянц Исполкомонц Президиумонц заседанияц. Мордовияста сашендсь 13 ломань.
Заседаниясь ушедовсь Великай Отечественнай войнань кизотнень шавфненди памятникти панчфонь путомаста. Пара койс коре Оркинаса эряй мокшэрзятне и лия национальностень ломаттне васьфтезь инжихнень кшиса-салса. Сяльде мероприятиясь поладовсь Мокшэрзянь национальнай центраса. Фойеса инжихне ванозь выставкать, кона лемтьфоль Отечествань аралаень кизоти и Великай Отечественнай войнаса Сяськомать 80 кизонцты. Стане жа заседаниянь участникне ульсть Мокшэрзянь культурань музейса, коса сембе экспонаттне кочкафт велеряйхнень мархта.
Пуромксть панжезь Мокшэрзянь народть Межрегиональнай общественнай организациянц председателец Юрий Мишанин и Саратовскяй областень «Шумбрат» мокшэрзянь национально-культурнай центрать председателец Валентина Кривошеева.
Заседанияса примасть участия властень представительхне, национально-культурнай центратнень руководительсна, Петровскяй райононь мокшень и эрзянь коллектифне, маластонь велетнень эряйсна. Пуромксть главнай темац лемтьфоль Сяськомать 80 кизонь топодеманцты. Саратовскяй областть эзда приветственнай вал мархта выступандась региононь внутренняй политикань и общественнай отношениянь министрть заместителец Светлана Зубрицкая. Мордовия Республикать эзда выступандась МР-нь культурань, национальнай политикань и архивнай тевонь министрть васенце заместителец Александр Кочеваткин.
Петровскяй масторсь лямбоста васьфтезень мокшэрзянь народть представителензон ся территориять лангса, коса 300 киза фкя-фкянь мархта ладязь эряйхть мокшетне, эрзятне и Саратовскяй областень лия нароттне. Оркино велень библиотекань, клубонь работникне азондсть Великай Отечественнай войнать пингста Петровскяй райононь народть подвигонц колга. Саратовскяй областень «Шумбрат» мокшэрзянь национально-культурнай центрать руководителец и организацияти сувсихне пачфтсть региононь Внутренняй политикань и общественнай отношениянь министерствать и региональнай общественнай организациятнень мархта марстонь работаснон колга. Азондсть Саратовскяй областень Великай Отечественнай войнань Геройхнень, синь подвигснон квалма.
Меле мялень салайста ётафтфоль Мордовия Республикать социально-экономическяй, культурнай потенциалонц презентацияц.
Центраса ульсь национальнай костюпнень няфтемасна, инжихне каваняфтольхть мокшэрзянь ярхцамбяльса.
Мероприятиять шумордамста военнай кизонь мороса пуромфнень кеняртьфтезень Мордовия Республикань Народнай артисткась Нина Спиркина. Оркино велень «Эрзяночка» идень коллективсь няфтезе «Куйгорож» спектакльть.
Мокшэрзянь движениянь активисттненди максфтольхть казнет.