Лямбе васедемат Волга ляйть трваса

Арась пара койкс эрь кизоня ётафнемс Поволжьянь ошнень эзга «Волга—река мира. Диалог культур волжских народов» этнокультурнай фестивальть-экспедициять. Тядде международнай тя форумсь пуроптфоль комсь васенцеда. Арьсиенза-ётафтыенза: Национальносттнень тевснон коряс федеральнай агентствась, Мордовия Республикань Культурань, национальнай политикань и архивнай тевонь министерствась, Финно-угорскяй народонь культурань Поволжскяй центрась и Мордовскяй (мокшень и эрзянь) народонь Межрегиональнай общественнай организациясь. Тя кизоня фестивалень участникокс арасть Россиянь 15 регионць и Эстониясь. Экспедициясь пуропнезень региональнай властень, национально-культурнай автономиянь, аф коммерческяй организациянь представительхнень, культурань и образованиянь работникнень. Тяддень фестивальть девизоц: «Нароттнень культурасна—Россиять козяшиц». Ётафтовсь сон тяфтама маршрутс коре: Саратовсь—Волгоградсь—Астраханць—Никольскяйсь.

Саратовса
Ули кода мярьгомс, што тя ошста «Волгась—ялгаксшинь ляй» фестивальсь ушедозе эсь историянц. Саратовста 2003 кизоня тусь кис лувксс коре васенце экспедициясь и тядде сон тага срхкась тяста. Экспедицияти руководителькс арась МР-нь культурань, национальнай политикань и архивнай тевонь министрсь Светлана Баулина. Инжикс фестивальс сашендсть Национальносттнень тевснон коряс федеральнай агентствать руководителенц заместителец Станислав Бедкин, Россиянь Президентть видеса межнациональнай соткснень коряс Советонь членць, Межэтническяй журналистикань гильдиять председателец Маргарита Лянге, Мордовия Республикань Государственнай Собраниянь депутатсь Евгений Ледяйкин, В.Д.Поленовонь лемса народнай творчествань Государственнай Российскяй кудть директороц Тамара Пуртова и лия содаф ломатть.
Саратовса делегациясь васендакиге путсь панчфт Сяськомань паркса Великай Отечественнай войнаса шавф воиттнень памятникснонды, а сяльде васетькшнесь тя аймакса эряй мокшэрзятнень мархта «Саратовскяй областень нароттнень национальнай велесна» этнографическяй комплексса. Тяса инжихне каваняфтольхть национальнай ярхцамбяльса, няфтьфоль мялень салай концерт. МР-нь культурань, национальнай политикань и архивнай тевонь министрсь Светлана Баулина макссь казнет. Саратовскяй областень «Шумбрат» национальнай культурань центрать председателец, мокшавась Валентина Ивановна Кривошеева казьф «За межнациональное согласие» медальса. «Фестивальсь арась ни афкуксонь брендокс,—мярьгсь Светлана Никитовна.—Тя пяк козя программа мархта лиятнень лангс аф шарфты экспедиция».
Россиянь ФАДН-ть руководителенц заместителец Станислав Бедкин китькстазе: «Тя экспедициясь лезни содафтомс Волгать маласа эряйхнень культураснон мархта, тяса ламотне мушендыхть эстеест ялгат, кемоксневихть нароттнень ёткса сотксне, ладямась».
Саратовса фестивалень участникненди стане жа ётафтфоль экскурсия Сяськомань паркть эзга. А меле сембе марса ётасть Набережнаи, коса синь учендозень «Фёдор Достоевский» теплоходсь. Волга ляйть ведензон эзга сон пачфтезень национальнай активисттнень Волгограду.
Волгоградса
Улема, сембе, кинди сашендовсь улемс Волгоградса, согласиндайхть, што тяса эрь улемась пяшкотькшнесы седить таколдомада. Ош-герой, коса Великай Отечественнай войнать пингста 135 ши мольсть стакадонга стака тюремат, шудефтфоль лама вер, но врагсь сяда тов апак нолдаколь. Мярьгат, эрь уженясь тяса мяляфтсы советскяй солдаттнень героень подвигснон, конат эсь прянь аф ужяльдезь сатсть тейнек валда и сетьме эряф… Аш кода аф азомс сянь, што Сталинградскяй битваса фашистскяй захватчикнень каршес тюрсь Мордовиянь лама мокшэрзянь солдат.
Волгоградса фестивалень-экспедициянь делегациять васьфтезь Волгоградскяй областень общественностень и государственнай властень органонь представительхне, тяса эряй мокшетне и эрзятне, а стане жа кайги мороса—казаконь ансамбльсь.
Тяда меле ётафтфоль экскурсия ошть-геройть эзга. Ванфоль «Героям Сталинградской битвы» историко-мемориальнай комплекссь. Мамаев курганца путфтольхть панчфт Великай Отечественнай войнаса шавф воиттнень Мемориалснонды. Тяда башка, тяса ётафтфоль патриотическяй акция—Мамаев курганца морафоль «С чего начинается Родина?» содаф морось.
Сяда тов экспедициять киц мольсь Астрахани.

Астраханьца
Колмоце шиня «Волгась—ялгаксшинь ляй» фестивальсь пачкодсь Астрахани. Причалть маласа экспедициянь участникнень васьфтезь Астраханскяй областьса эряй нароттнень представительсна. Кода азозе Астраханскяй областень культурань и туризмань министрсь О.Прокофьева, сембоц тя аймакса эряй 140 лама национальность. Ётксост татархт, руст, украинецт, казакт, азербайджанецт, колмыкт, армятт, кореецт, а стане жа мокшэрзят. Сембе синь эряйхть ладязь, фкя-фкянь шарьхкодезь. Форумонь делегаттненди няфтьфтольхть тястонь достопримечательносттне. Астраханскяй кремлянь историко-архитектурнай комплексса ванфоль Пресвятой Богородицань Успенскяй Кафедральнай соборсь, Ялгаксшинь и Ремеслань куттне, ХIХ веконь Гауптвахтась. Фестивалень участникне пара мяльса тифнесть лятфнембяленди фотографият, рамсесть радня и мала ломаньцнонды астраханскяй сувенирхт и аф оцю казнет. Удалась ваномс Астраханень оперань и балетонь театрать, кона панчфоль аф кунара. И, конешна, ашель кода ётамс калонь базарть вакска. Мокшэрзятне кунардонь пингста сявомок содафт кода калонь кельги народ, сяс ашель кода улемок калонь масторса аф варжамс тя танцтинять.
Никольскяйса
Астраханьда меле «Фёдор Достоевский» теплоходсь фестивалень делегациять мархта шарсь меки куд шири, но уембачк лотксесь нинге фкя мялень салай уженяс—Никольское веленяв. Тяса экспедициянь участникне ульсть Пресвятой Богородицань Рождествать лемса храмса, коса Саранскяень епархиянь секретарсь протоиерейсь Виктор Хохлов, кона стане жа сувсесь делегацияти, ётафтсь служба. А меле, кинь мялецоль, ульсь кода эшелямс Волга ляйть эса.

Теплоходса
«Волгась—ялгаксшинь ляй» фестивальсь-экспедициясь мяляфтовсь аф аньцек ошнень эса улемать мархта. Козяль форумть программац теплоходсовок. Ётафневсть «круглай шрат», семинархт, творческяй илятть, презентацият и стак тов. Васенце шиня пуроптфоль «Актуальные вопросы реализации Стратегии государственной национальной политики Российской Федерации» темас коре семинар. Сонь вятезе Россиянь ФАДН-ть руководителенц заместителец Станислав Бедкин. Станислав Анатольевич азозе, што Стратегиять тевс нолдамац ётась мекольце этапти и тяни, кода тянь вешсы эряфсь, сонь пяшкодиензон ёткс сувасть Россиянь Оборонань министерствась, МЧС-сь, Дальняй Востокть и Арктикать вииямаснон коряс министерствась. С.Бедкин азондсь ся тефнень колга, конатнень коряс кармай работама Агентствась. Васендакиге тевс нолдави коренной нароттнень кяльснон десятилетияснон программац, сяда тов кармай ётафневома этнографическяй диктантсь, арьсекшневи нолдамс национальнай кялень Атлас.
Светлана Баулина содафтозень участникнень ся мероприятиятнень мархта, конат ётафтовихть ФАДН-ть лезксонц вельде тядде и сай кизоня. 24-28 августста Мордовияса ётафтови Финно-угорскяй од ломанень Межрегиональнай лагерь, коза пуроми 100 ломань. 2023 кизоня арьсекшневи пуроптомс Финно-угорскяй нароттнень форумснон, культурань фестиваль.
Омбоце шиня Россиянь Президентть видеса межнациональнай соткснень коряс советонь членць Маргарита Лянге ётафтсь «Этнотематика: новые форматы для популярных медиаплатформ» лем ала «кргулай шра», коса азондсь сянь колга, кода маштозь тиендемс содафокс национальнай культурать, кяльхнень социальнай сетьтнень эса.
Пуроптфоль «Национально-фольклорный праздник «Шумбрат» как инструмент сохранения культуры народа» стратегическяй сессия. Пингстонза корхтафоль «Шумбрат» илать колга, конань арьсекшневи ётафтомс тяддень сентябрьста Мордовияса. Фестивалень участникне азондозь эсь мяльснон-арьсемаснон сянь коряс, кодамкс мяльсна няемс тя праздникть.
Национально-культурнай автономиянь представительхне азондсть мокшэрзянь культурать, кяльхнень ванфтоманкса эсь практикаснон колга. Эрь илядня теплоходса ётафневсть национальнай кяльса корхтамань интенсифт, конатнень вятезь эрзянь и мокшень кялень тонафтыхне Александр Данильчев и Светлана Сокорова. Пуроптфоль этно-ярмарка, коса машты кядь ломаттне—экспедициянь участникне Мария Шумкина, Татьяна Китаева, Алина Сорокина, Антон Гаушев няфтсть шуфтста керсемать, бисерста кодамать, котф лангс сёрмадомать коряс мастер-класст. Экспедицияньберьф теплоходса кайгсть мокшень и эрзянь морот. Эсь творчестваснон мархта участникнень кеняртьфнезь «Мерема» этнографическяй фольклорнай студиясь, «Росичи» морамань театрась, од артисттне Артём Мамаев и Сергей Фудин.
Фестивалень мекольце шиня форумонь участникне казьфтольхть дипломса.
Ули кода азомс, што «Волгась—ялгаксшинь ляй» ХХI-це международнай фестивальсь удалась. Надиятама, сембось, мезсь арьсефоль-смекафоль пингстонза, маластонь пингть ётафтови эряфс.
О.Евдокимова.

Последние новости

В Мордовии растет количество госзакупок у самозанятых

Одно из ключевых направление национального проекта «Малое и среднее...

В Мордовии благоустраивают общественные территории 

В Рузаевке в рамках федерального проекта «Формирование комфортной городской...

Команда «Бизнес-десанта»проконсультировала предпринимателей Торбеевского района

Центр «Мой бизнес»проводит активную работу в районах Мордовии по...

В Мордовии ведется капитальный ремонт дороги до с. Новая Карьга

ВКраснослободском районе Мордовии приступили к капитальному ремонту автодороги «Подъезд...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Тройцясь—Малавса

Святой Тройцять келиста отмечсесазь пцтай эрь велеса. Цебярь тяфтама...

В Мордовии растет количество госзакупок у самозанятых

Одно из ключевых направление национального проекта «Малое и среднее предпринимательство» - это поддержка самозанятых.  Почти 4,5 млрд рублей по России составил общий объем закупок у...

В Мордовии благоустраивают общественные территории 

В Рузаевке в рамках федерального проекта «Формирование комфортной городской среды» национального проекта «Жилье и городская среда» идет благоустройство Аллеи Славы на улице Куйбышева. Эта...

Команда «Бизнес-десанта»проконсультировала предпринимателей Торбеевского района

Центр «Мой бизнес»проводит активную работу в районах Мордовии по информированию предпринимателей о возможностях государственной поддержки. На этой неделе специалисты провели встречу с представителями малого...