Шачсь-кассь сон тязк, Малавса. Школанц аделамда меле тусь Саранскяи. Аф фкя киза эрясь ошса, работась. Но стирть седиец тердезе меки шачема уженязонза, ашезь педе ваймонцты ошень эряфсь. Велеса покодсь пидикс-паникс совхозонь столовайса. А меле, мзярда хозяйствась срадсь-каладсь, кирнесь эсь пирьфсонза жуватат. Тяфта мирденц мархта трясть пря. Васенда полатнень шачсь цёрасна, кона тячи эряй и покоди Москуса. Пингонь ётазь Шкабавазсь казсь теест стирня. Теенза тяни кефкие киза. Вов ни ниле кизот, кода Татьяна Николаевна касфтсы иденц ськамонза, мирдец, ужяленди, рана тусь эряфста.
Аф ваномок эряфонь стакатнень-сталмотнень лангс, мокшавась мушенды вийхть и пинге эсь кельгома тевонзонды. Татьяна Николаевна сёрматкшни руцянят, нардамат, котци варягат и носокт. Тянди, кода азозе, тонафтозе тядяц.
—Ужяль, ламоц вастова сире пингонь койхне юксневихть, но аньцек аф миньцонк,—азозе Татьяна Николаевна.—Клубсонк сидеста ётафневихть национальнай илат, тяни аноклатама Тройцяти. Малавонь аватне пара мяльса наряжакшнетяма мокшень щамса, морсетяма сире пингонь морот. И, шарьхкотьф, корхтатама мокшекс иденьконь мархта. Мон тяряфнян тонафтомс сёрмадома и кодама стирнязеньге. Сон мяль вельде озси ваксозон, мзярда мезевок тиян, ваны мельган, варчсесыне виензон сонцьке. Няеви, ули мялец тонадомс.
Кода содавсь, Малавса и шабра велетнень эса тячемс учань понаста котцихть сюре. Улихть ломатть, конат маштыхть кштирдема. Виденц азомс, тяни лапа лангса кштирь мархта ши шишка пцтай кивок аф ащекшни. Кштирдемкасна ломаттнень электрическяйхть. Но сяньге мархта вдь маштома, штоба сюресь афоль сязендев, пяльдеволь фкя эчкса, покольняфтома-мезьфтома. Меле сюреть бабатне мишендьсазь базарса.
Татьяна Агаповать сембе тифоц ляткшни эстеенза. Косовок аф няфневи, аф мишендеви. Весть, райононь кодама-бди иланди аноклаф выставкати сявондезь руцянзон и тянь мархта сембе. Авать койса, пара улель, кда республикасонк кодамовок учреждения, организация лезнель лацонза машты кядь ломаттненди тифснон мишендемаса. А, пади, тяфтама организацият и улихть, аньцек велеряйхне колгаст мезевок аф содайхть…
И.ФАДЕЕВА.