Марина Босина:«КЕЛЬГОМА ТЕВОЗЕ ТИЕНДЬСАМАНЬ ПАВАЗУКС»

27 майста странасонк отмечави Библиотекатнень общероссийскяй шисна. Лиякс азомс, российскяй библиотекатнень работникснон иласна.
Официальнайста сон кемокстафоль 1995 кизонь 27 майста Российскяй Федерациянь Президентть Борис Ельцинонь Указонц мархта. Мес библиотекань шикс кочкафоль май ковть 27 шиц? Мяльс сявфоль ся, што 1795 кизонь 27 майста панчфоль Россиянь общедоступнай государственнай васенце библиотекась—Императорскяй публичнай библиотекась, кона тяни—Российскяй национальнай библиотека.

Тяштемок материалти ушетксонди профессиональнай тя илать историянц, аф ламода арьсезевонь и максонь эстейне кизефкс: мезе сай прязт библиотека валть кулемста. Кулемок сонь, эрсь эздонк лятфтасыне полка мархта сери стеллашнень, конатнень эса лац-ряц латцефт книгатне. Эздост, конешна, пяк и пяк лама, сяс сельмотне «эрьгодихть» лангозост ваномста. Тянь лангаксоц аш ни кода мазы, омбоцеть тяштезе кельгома авторсь, колмоцесь—классика, конань мяльце морафтомс нинге и нинге весть. Кодама нинге кочкамс библиотекав тя самстот? Пади, мезевок одня эвондась? Ня кизефкснень мархта эрь лувись пцтай фалу пшкятькшни библиотекарти, кона содасы, мезьса и кода лездомс книганкса сайти. Ошень библиотекатнень эса эздост сяда лама, сяс сембе афи мяляфтовихть. А велень библиотекатнень эса библиотекарьхне книгань кельгихнень и морафнихнень «шамас» содасазь. И кодама книгат синь сявондихть—сяньге. Сяс тянь мархта сотф лама кизефкс аф уленди. Ломаттне азондыхть библиотекарти спасиба и эняльдихть сай самозост аноконди кочкамс книга. Тяфта ащи тевсь и Старошайговскяй райононь Лемдяй велень библиотекаса, коса вов ни лама киза работай библиотекарькс мокшавась, «Мокшень правдать» сёрматфниец и морафниец Марина Босина.
Марина Борисовнань лемоц содаф аф аньцек книганкса сашендыхненди, но и ламотненди лиятненди. Тя ломанць—родной кялень, коень-обуцянь, мокшэрзянь моронь, национальнай щамонь-карямонь кельги и ванфты. А нинге сон—зрнянь кядь мокшава. Мокшень, рузонь щамс наряжаф няканзон лангс ванондолеть и ванондолеть.
Лемдяй велень библиотекав самстонк Марина Босина васьфтемазь эсь тевонь содай азоравакс. А библиотекаса сельмозонк эстокиге повсть аф аньцек книгатне, но и мялень салай тематическяй, иттнень поделкаснон эзда тиф выставкатне, Марина Борисовнань наряжаф няканза, конатнень эзда фкясь—мокшаванясь серес кода кафтошка кизоса идня.
Библиотекарсь пачфтезе, што Лемдяй велень васенце библиотекать колга лятфнематне эвондасть Октябрьскяй революцияда меле. Ёразь строямс сонь мокша ломаттненди, но эста тя тевсь ашезь лисе. Лемдяйса панчсесть церковно-приходской школа, кона работась колма кизот. Тифоль тя эряйхнень сяда грамотнайкс тиемаснон инкса.
Шуфтонь кудса панчфоль изба-читальня, коса васенце работникокс ульсь Степан Нарваткин. Марина Борисовнань валонзон коряс, Степан Кузьмичень колга лама информация ашезь ванфтов, но лемоц сембе пингс лядсь Лемдяй велень библиотекать историязонза. Изба-читальняса ульсь 1200 экземпляр книга и ащесть синь шуфтонь стеллашнень лангса.
Велеса библиотекась эвондась 1949 кизоня. 1950-1955 кизотнень сон примсесь несколька сяда луви кизоти. Лама киза библиотекарькс работась Анастасия Дёмкина. Анастасия Трофимовна лувондови Лемдяй велень библиотекань васенце библиотекарькс, а портретоц тяни занци башка васта библиотекаса.
Аф ваномок сянь лангс, што Лемдяйса эрясь пяк лама ломань, лувида аф сяшкава ламоль. Анастасия Трофимовна тиендезе семботь, штоба лемдяряйхне тонадолезь грамотать, работась иттнень мархта. Кепотьксонди, сай лувись сявф книгать мрдафтома, а сон ушеды кизефнемонза мезень колга сон. Пади, кле, мазы картинканятнень ванондость и меки кандость.
1986 кизоня Лемдяйса панчфоль Культурань куд, коса максфоль васта и велень библиотекати. Анастасия Трофимовна Дёмкинада меле библиотекарькс работасть Анастасия Филаретовна Дёмкина, Елена Егоровна Дюжина, Раиса Васильевна Иванова.
Раиса Васильевнада меле Лемдяй велень библиотекав сась покодема Марина Босина.
«Библиотекарькс работан 2010 кизонь 8 августста сявомок. Покодень совместительствас коре, нинге улень учителькс школаса. Сяльде ушедонь работама аньцек библиотекаса. И тевозе мялезон»,—мярьгсь Марина Борисовна.
Велень библиотекаса 450 луви и эрть мархта мокшавась мушенды марстонь кяль. Морафтыхнень ётксот кода Лемдяень, стане и Николаевка велень эряйхне, а нинге—дачань азорхне. Эряфкшуфне, оцюфне, сяда оттне, иттне—сембе содасазь кить библиотекав. Эрти библиотекарсь тиенди формуляр, сяс ули кода няемс, кодама книгат тя или тона лувись сявонди сяда сидеста.
Кизонь каникулатнень пингста атяснон-бабаснон ширес сашендыхть ошста иттне. Библиотекав синь каннесазь школаса максф книгань спискать, кона морафтома сентябрть самс.
Библиотекать фондоц—7900 экземпляр, сяс кочкамс ули мезьста. Книгат казендихть и велеряйхне, ошса-коса эряй землякне. Фондти синь аф сувафневихть, а морафнемс макссевихть. Кит аф савихть библиотекав шумбрашиснон мархта сотф или лия туфталонкса, сятненди Марина Борисовна книгат канни сонць.
Кизефксть лангс, кодама книгатненди уленди сяда оцю вешфкссь, библиотекарсь отвечась вов кода:
—Вешфкс ули сембе книгатненди. Сяда эряфкшу ломаттне—мокшетне, кельгсазь мокшекс морафтомаснон: мокшень писательхнень, тяниень пингонь авторхнень. Оцю мяльса морафневи рузонь классикась.
Тняра кизоста мокшавась библиотекарень тевть тонадозе аш ни кода лац. А нинге сон пяк оцю мяль шарфни тематическяй выставкатнень анокламаснонды: 9 Майти, Эряфкшу ломанень ковти, илатненди, тяконь лувксса и православнайхненди, прозаикнень и поэттнень юбилейснонды и шачема шиснонды, историческяй событиятненди…
Библиотекав сашенды шабатненди ётафни поделкань, сувениронь анокламать коряс мастер-класст. Стирнятнень и цёранятнень тифснон няеськ башка выставкатнень эзда.
Марина Борисовна содаф кода велень пуромксонь аноклай и эсост участиянь примай. Мокшавакс-баяравакс наряжафста фалу уленди выставкатнень, концерттнень, фестивальхнень эса. Мазы няканзон колга материалса лятфнеме ни.
27 майста библиотекарень шисЬ. Седи ваксста поздравляндасаськ Марина Борисовнань и работас коре ялганзон тя илать мархта!
Сембе цебярть тевсонт и, конешна, сяда лама луви!
Татьяна АЛЬШИНА.
Фототне Николай КАРАНОВОНЬ.

Последние новости

В Мордовии открылись новые благоустроенные зоны отдыха

В Мордовии в этом году открылось сразу 7 новых...

Благодаря нацпроекту малый и средний бизнес Мордовии получает господдержку

Министерство экономики, торговли и предпринимательства РМ совместно с Центром...

В Ичалковском районе приводят в порядок 14 км дорог

В Ичалковском районе Мордовии по национальному проекту «Безопасные качественные...

Нацпроект помогает бизнесу Мордовии стать узнаваемым и привлекать новых клиентов

Министерство экономики, торговли и предпринимательства РМ совместно с Центром...

Дан старт приемной кампании по программам «Профессионалитета»

В Мордовии начинается приемная кампания в колледжи и техникумы...

Нацпроект помогает семейному бизнесу Турбиных из Мордовии 

Министерство экономики, торговли и предпринимательства РМ совместно с Центром...

В Мордовии модернизируют службу занятости

Мордовия вошла в число пилотных регионов комплексной модернизации службы...

В Мордовии открылись новые благоустроенные зоны отдыха

В Мордовии в этом году открылось сразу 7 новых пляжей. Средства на их благоустройство были предоставлены предпринимателям республики в качестве грантовой поддержки. Работы велись...

Благодаря нацпроекту малый и средний бизнес Мордовии получает господдержку

Министерство экономики, торговли и предпринимательства РМ совместно с Центром «Мой бизнес» оказывает поддержку предпринимателям Мордовии. Так, благодаря реализации национального проекта «Малое и среднее предпринимательство...

В Ичалковском районе приводят в порядок 14 км дорог

В Ичалковском районе Мордовии по национальному проекту «Безопасные качественные дороги» в 2024 году будет капитально отремонтировано порядка 14 км дорог. В мае начались работы на...