«Марса/вейсэ—МЫ ВМЕСТЕ!» форумсь пуропнезень мокшень и эрзянь од ломаттнень

Н.П.Огарёвонь лемса МГУ-нь Культурань и искусствань дворецса 7 октябрьста ётафтовсь Мокшэрзянь од ломанень I-це форумсь. Тяза пуромкшнесь сядода лама од стирь-цёра Саранскяйста, Мордовиянь райоттнень и странань лия региоттнень эзда. Ётксост студентт, журналистт, учительхть и лия тевса заняф од ломатть, конат оцю мяль шарфнихть мокшэрзянь кяльхнень, культурать, койхнень-обуцятнень ванфнемаснонды.
Форумсь ушедовсь «Диалог на равных» диалоговай площадкать эзда. Тяса од ломаттнень мархта васетькшнесть эксперттне—Мордовскяй (мокшень и эрзянь) народонь Межрегиональнай общественнай организациять председателец Юрий Мишанин, МР-нь культурань, национальнай политикань и архивнай тевонь министрть васенце заместителец Александр Карьгин, М.Е.Евсевьевонь лемса МГПУ-нь ректорсь Марина Антонова, Н.П.Огарёвонь лемса МГУ-нь васенце проректорсь Пётр Сенин и МР-нь Госсобраниянь депутатсь Евгений Ледяйкин. Эрсь эксперттнень эзда азондсь, кода синьцост вятеви од ломаттнень мархта работась, кодама проектт сувафтовсть ни эряфс марстонь вийса и нинге сувафтовихть маластонь пингть.
«Тейнек сяда сиденяста васетькшнема и корхнема фкя-фкянь мархта. Эрявихть пуроптомс марс мокшень и эрзянь од активисттнень и сембе ширде кирнемс синь инициативаснон ширеснон. Од ломанень форумсь—пяк цебярь васта, коса ули кода ладямс кеме соткст»,—мярьгсь Юрий Мишанин. Нинге сон азсь мяль форумонь участникнень лемста пшкядемс республикань руководствати, штоба региононь Од ломанень центрать видеса тиеволь башка отдел, кона покодель аньцек этнокультурнай проекттнень мархта.
Педагогическяй университетть ректороц Марина Антонова серьгядезень сембе од ломаттнень, конат састь тя форумти, аф ваномок сянь лангс, тонафнихть синь МГПУ-са или аф, нолямс проектснон эряфс ётафтомста вузть техническяй возможностензон. Тяда башка, Марина Владимировна азондсь «Продвижение» научно-образовательнай центраснон колга, кона стане жа шарфни оцю мяль национальнай кизефкснень коряс од ломаттнень мархта покодемати.
Культурань, национальнай политикань и архивнай тевонь министрть васенце заместителец Александр Карьгин мярьгсь:
—Теенть, од ломаттненди, максф оцю возможность тячи ни арьсемс-тиемс сай пингонтень. Тинь сембодонга эрьгафне, сембодонга виихне. Тинь ули тинцень сельмованфонте перьфпяльть лангс, тяряфнетяда цебярьгофтомс мирть и эряфть. Инициативантень и гражданинонь позициянтень эзда ламода ащи национальносттнень ёткса соткснень, культураньконь вандыень шисна.
Од ломаттне макссесть эксперттненди кизефкст, конат синь таколфтсазь. Кепотьксонди, мес велень школатнень эса кирьфтавсть мокшень и эрзянь кяльхнень тонафнеманкса макссеви часттне. Юрий Мишанин азозе, кле, тя кизефкссь кепсевсь МР-нь Оцюнять Артём Здуновонь мархта васедемать пингста, прябалась няйфоль и азфоль, што мокшень и эрзянь кяльхнень тонафнеманкса эряви макссемс аф кафта частта кржа пинге недяляти. Нинге од педагокне и студенттне кизефнесть, кода саламс шабатнень мяльснон мокшень и эрзянь кялень и литературань урокнень пингста, штоба синь пара мяльса тонафнельхть.
Прябалатнень и сатфкснень колга корхтамась поладовсь форумть омбоце пялькссонза «Од ломаттнень инициативасна этнокультурнай козяшить ванфтомаса» форсайт-сессиять пингста. Тяса рузонь и эрзянь кялень тонафтысь Николай Карпов шарфтсь мяль шачема кяльсонк электроннай библиотекать аф сатнеманц лангс. Од педагогсь азозе, што покодемста теест пяк аф сатни ся, мес интернетса аш автороньконь сёрматфсна. Улель пара, кда национальнай произведениятнень эзда тиеволь электроннай библиотека. Стане жа башка мяль шарфтфоль рузонь кяльста мокшеннес и эрзяннес онлайн-переводчикть тиеманц лангс. Национальнай прессань покодихне азондсть мокшень и эрзянь кяльса лисенди изданиятнень колга, шарфтсть мяль национальнай кадрань аф сатнемать лангс.
«Корхтада мокшекс, сёрмадода мокшекс, тясть визне эсь прянтень, пачфнесть минценнети кельгомать идентенди»—тяфтама мяльхне сюре кикс таргавсть Мокшень и эрзянь од ломанень I-це форумть пингста. Сафоль мяльс ётафнемс тя пуромксть эрь кизоня.
Меколи няфтьфоль мялень салай концерт, конань пингста сценать лангса кштисть и морасть мокшэрзянь асу од ломаттне и творческяй коллектифне.
И.Фадеева.