КОВЫЛКИНСКЯЙ МУНИЦИПАЛЬНАЙ РАЙОНЦЬ
Сюреса сёрмадомать вельде ули кода няфтемс пефтома мазыши. Тянь и тиендьсазь асу мастерицаньке. Тячи пачфттяма мокшень нинге кафта райоттнень—Ковылкинскяйть и Краснослободскяйть сюреса сёрматф картаснон квалма.
Сюреса сёрматф картась няфнесыне районть мазышинц и козяшинц. Пяк ладязь арьсефт орнаментальнай мотифне—кунардонь рузоннетне, мокшеннетне и татароннетне. Сянгяря тюсонь кувалмос ащи китьксне—тя виреньконь мазышисна и козяшисна. Вирень зонать кафцьке бокованза отмечафт мокшэрзянь и рузонь велетне. Равжа тюсонь кувалмос моли кафта китьксне («панаркувалмотне») няфнесазь инь главнай транспортть—машина кить, кона моли районть территориява.
Сюреса сёрматфсь тиф мулине сюреса. Сонь основной пяльксоц тиф «крёскакс», а стане жа гладьса.
Творческяй тевса тевс нолдафт узорхне, конатнень аноклазень Евдокия Васильевна Липатова. Тяфтама сюреса мазопнезь авань панарть нинге пяк кунардонь пингста.
Народнай вышивкань основной узоркс лувовихть ромпне, квадраттне, зигзакне, китьксне, треугольникне, кафкса пе мархта тяшттне и сюрокс ащи узорхне, конатнень вельде няфневихть разнай символхт.
Кафкса пе мархта тяштсь—ши, зигзакне и китьксне—лихтибрят и ляйхть; ромпне и квадраттне—козяши и урожай, плотт; сюре лаца узорхне—шуфттне и тишетне.
Мокшэрзянь сёрматфксса ули кода няемс шуфттнень панжи тарадснон, валдопты шить, кона максы лямбе модати и ломаттненди, жувататненди и нармоттненди, кели ляйхнень, пефтома сянгяря лугатнень, кенерьф имошнень, конатнень мархта тяшкава козяста явонды мокшэрзянь масторсь.
Районть картанц и творческяй работать тиезь: «Центр русской культуры им. Федота Васильевича Сычкова» филиалть заведующаец Зинаида Григорьевна Кимеева (Кочелаево велесь), Ковылкинскяй муниципальнай райононь «Центр культуры» МБУ-ть «Рыбкинский сельский клуб» филиалонц культорганизатороц Раиса Васильевна Кубасова.
КРАСНОСЛОБОДСКЯЙ МУНИЦИПАЛЬНАЙ РАЙОНЦЬ
Районть сюреса сёрматф картанц основной мялец—няфтемс сонь территориясонза эряй нароттнень сюреса сёрмадомаснон аф фкя лацоннекс улеманц.
Картати пяльксокс арасть орнаментонь мотифне, конат тифт авань сёрматф панархнень, фартукнень, рушникнень, подзорхнень и занавеснень эзда, конат ванфтовсть Мокшень Парка, Сире Сендру, Колапа, Од Зубарево, Зайця, Од Карьга, Чукалы велетнень эряйснон арзясост. Картась явфтф несколька пяльксова, эрсь эздост няфнесы тя или тона эряма вастть, народть национальностенц. Кучкакс ащи Краснослободск ошсь, кона кунардонь пингста лувондови садонь ошекс, сяс картать лангса няфтьфт сливань тараттне—садонь кирдемань колга корхтайхне и нармоттне, конат няфнесазь урожайть и плоттнень. Творческяй работаса тевс сувафтфт Зайця велень национальнай костюпнень эзда сюреса сёрмадомань образецне. Синь ульсть кепотьксокс творческяй работань тиемста, а мазы орнаменттне арасть работать декоративнай ширенцты аф явфтови пяльксокс.
Композициять кучкаса кафкса песа тяште, кона тиф якстерь и равжа тюсонь понаса «роспись» и «счётная гладь» техникаса.
Кафкса пе мархта тяштсь лувондови сире пингонь «сворачиваниянь» символкс. Сонь сюреса сёрматкшнесазь кода алянь, стане и авань панархнень лангса оберег лаца ичкоздень и пелькс кис срхкай ломанти. Сон лезнесь аф аньцек араламс, но и ванфтомс эсь пряцень, ушетксть. Песа моли орнаментальнай симметричнай формань ряд, кона няфнесы композициянь центрать. Изделиять мазоптоманц коряс техническяй разнообразиянь приёмтне, орнаментть козяшиц, конатнень асу мастерицатне тястонь кунардонь койхнень коряс и мяльс сявозь фалу ётафнесазь эряфс декоративнай мазы композицияс, няфтьфт творческяй работаса.
Картать и творческяй работать тиезь: Краснослободскяй муниципальнай райононь «Центр культуры» ДШИХ МБУ-нь преподавательхне Наталья Николаевна Бякина и Елена Алексеевна Рункова.
Кураторсь—Краснослободскяй муниципальнай райононь «Центр культуры» ДШИХ МБУ-нь преподавательсь, Мордовия Республикань культурань Заслуженнай работниксь—Светлана Геннадьевна Воронская.
Газетаса сяда товга карматама пачфнема райоттнень сюреса сёрматф картаснон квалма.
Материалть аноклазе
Татьяна ВЛАДИМИРОВА.