7 декабрьста Саранск ошень Культурань дворецса ётафтовсь «Кунардонь пингонь модать од мороц» межрегиональнай фестивальсь. Сон аноклафоль Культурнай инициативань Президентскяй фондть грантонц лангс, а ётафтозе фестивальть эряфс «Литова» Мордовиянь эрзянь авань союзсь.
Моронь межрегиональнай фестивальть пингста концертс пуромфненди эсь маштомошиснон няфтезь Мордовия Республикань и Российскяй Федерациянь лия региононь мокшэрзянь народнай и профессиональнай коллектифне, а тяфта жа башка исполнительхне. Репертуарсост ульсть кода мокшэрзянь кунардонь пингонь народнай морот, стане и эстраднай и авторскяй произведеният.
Пуромфнень «Кунардонь пингонь модать од мороц» межрегиональнай фестивальть панжевоманц мархта Россиянь финно-угорскяй народонь Ассоциациять председателенц П.Н.Тултаевонь лемста лямбоста поздравляндазень сонь помощникоц Е.Ю.Щукин. Сон пачфтезе пуромфненди: кле, П.Н.Тултаев азонды оцю сюкпря сембе коллектифненди и башка исполнительхненди, конат састь Межрегиональнай фестивальс республикань ошнень и велетнень, а стане жа странань лия региоттнень эзда. Аньцек тяфта, мзярда минь марса ванфтсаськ и виияфнесаськ мокшэрзянь национальнай культурать, сон пачфтеви сай пингонь поколениятненди. Тяфта жа эряви азомс: «Кунардонь пингонь модать од мороц» и лацонза фестивальхне няевиста кемокстасазь российскяй нациянь нароттнень ёткса национальнай, культурнай, религиознай соткснень кода Мордовия Республикаса, стане и марнек Российскяй Федерацияса. Сяс надиян: «Литова» Мордовиянь эрзянь авань союзсь поладсы тя фестивальть ошень, райононь и мокшэрзянь национальнай лия мероприятияса!
Сяльде Е.Ю.Щукин, мокшэрзянь национальнай культурать ванфтоманкса и виияфтоманкса Россиянь финно-угорскяй народонь Ассоциациянь Почётнай грамотаса казезень А.С.Пушкинонь лемса Национальнай библиотекань краеведческяй литературань отделть заведующаенц Н.В.Бочкановать, Саранск ошень 5№ школань эрзянь кялень учительницать Л.Д.Асяевать, «Литова» Мордовиянь эрзянь авань союзонь председательть заместителенц Т.Т.Чекушовать.
Сяда тов пуромфнень фестивальть панжевоманц мархта поздравляндазь: Мордовия Республикань Государственнай Собраниянь Председательть старшай помощникоц И.М.Маскаев, культурань, национальнай политикань и архивнай тевонь министрть васенце заместителец А.И.Карьгин, Саранск ошень культурань Управлениянь и социальнай политикать коряс департаментть начальникоц Т.Ю.Салищева, Мордовскяй (мокшень и эрзянь) народонь Межрегиональнай общественнай организациять председателец Ю.А.Мишанин и лиятне.
Сембе синь эсь ведомстваснон лемста тяфта жа казезь национальнай культурань деятельхнень Почётнай грамотаса.
Сяльде няфтьфоль мялень салай концерт.
В.Нестеров.