Мазыхть мокшень стиреньке

«Мазыхть мокшень стиреньке» конкурссь мольфтеви газетасонк 2008 кизоста сявомок, сон арась «Мокшень правдати» эсь лацонь брендокс. Тя пингста эсонза примась участия сядот мокшень ёню, асу, мазы од стирь. Тядде мазышиса и асушиса пялькстсть кемонь стирьхть: вейхксотне Мордовияннет, фкясь—Пензенскяй областьста. 18 декабрьста участницаньке пуромкшнесть редакциязонк, коса и содавсть сяськихне.

Инь мазыхнень и асуфнень лемснон азомда инголе «Мокшень правда» газетать главнай редактороц Ольга Евдокимова спасибась стирьхненди родной кяльснон, культураснон, мокшень койхнень-обуцятнень кельгоманкса и кородозь ванфнеманкса. Сон китькстазе, што «Мазыхть мокшень стиреньке» конкурсть фкя инь васенце целец—национальнайть лангс оттнень мяльснон шарфтомац. Ольга Васильевна пачфтезе, што конкурссь поладови сай кизонявок.
Сяда тов азфтольхть цебярьхнень ёткста инь цебярьхнень лемсна.
Колмоце вастть «Мазыхть мокшень стиреньке» конкурсса занязе Алина Пониматкина. Алина эряй-ащи Старошайговскяй райононь Сире Шайгав велеса. Сон тонафни 10-це класса. Сембе предметтнень коряс сявонди аньцек «ветет». Школада меле арьсекшни поступамс Н.П.Огарёвонь лемса МГУ-в и сотнемс эряфонц учителень профессиять мархта.

Алина сафтсы лама мезьса, машты кштима-морама. Аф кржа пинге якась кштимань кружокс, тяни сон сувси «Камертон» школьнай хорти. Алина морси кода рузкс, стане и мокшекс. Но мокшень моротне, кода азозе сонць, теенза сяда малат. Кельгома моронзон ётксот «Луганяса келунясь», «Мокшень крайняй», «Мокшень стирьхне мазынят», «Акша ловнясь» и лиятне.
Алина Пониматкинась пяк кельгсы мокшень щамть. Сон оцю мяльса наряжакшни мокшекс. Ули сонцень щамоц, конань теенза стазь мала ломаненза.
Стирсь нинге пяк лац рисовандай. Сон шумордась художественнай школа. Сембода лац сонь лисендихть пейзашне. Алинань лама ялгадонза. Сон тёждяста мушенды ломаттнень мархта марстонь кяль. Азома нинге сявок, што стирсь примси активнай участия школать общественнай эряфсонза, вятьсы «Пульс» школьнай медиацентрать.

Омбоце вастть конкурсонь жюрись максозе Анастасия Резеповати. Рузаевка ошень мокшень стирсь тонафни 11-це класса. Настя шачсь-кассь семьяса, коса кородозь ванфневихть сире пингонь койхне-обуцятне, илатне, марса морсихть мокшень морот, пицихть национальнай ярхцамбяльхть. Настять ули сёрмадыень асувоц, сон тяшни эрь-кодама информацият, зарисовкат-месть «Рузаевские новости» газетав. Салсесы мяленц журналистонь профессиясь, сяс школада меле арьсекшни поступамс Н.П.Огарёвонь лемса МГУ-нь «Журналистика» отделенияв и сотнемс сай пингонь эряфонц сёрмадыень тевть мархта.
Анастасия Резеповась—эрьгав и отькорь стирь, сембе вастова кенерькшни. Сон «Васенцетнень движениясна» од ломанень организациянь активистка, примси участия ётафневи сембе мероприятиянзон эса аф аньцек эсь республикасонк, но и лия регионцовок. Меля, кепотьксонди, ульсь мянь Владивостокса. А нинге Настя РФ-нь Президентть видеса шабать праванзон коряс Уполномоченнайть видеса идень Федеральнай общественнай советонь член!
Каникулатнень пингста стирсь най уленди Хованщина велеса, щаванц-щятянц ширеса, лезни сиренятненди кудонь, куд пирьфонь и кудъётконь тевса. Машты кячкаскаса, вндерняса кодама. Тялонда Настя кельгсы соксса, конькаса курькснеманц. Тянь Резепофне тиендьсазь семьянь келеса.
Кие, ина, васенце вастть заняец? Тя Ковылкина ошста мокшень баяравась Дарья Лунькова. Сон тонафни Пензаса врачекс-стоматологокс. Республиканьконь эзда ширесовок стирсь кородозь ванфнесы сембе минценнеть. Сон сувси Пензенскяй областень Национально-культурнай автономиять од ломанень Мордовскяй региональнай отделениязонза. Нинге школаса тонафнемста примсесь активнай участия сембе мероприятиятнень и илатнень эса. Тяни, медицинскяй институтса тонафнемста, сувси стоматологиянь кафедрань студенческяй советть составс. Сон аф аньцек факультетонь, но и эсь курсонь главнай староста.
Аф кунара Дарья примась участия «Сурская красавица» конкурсса, коса жюрить и ваныхнень содафтозень мокшэрзянь народть культуранц и коензон-обуцянзон мархта. Тя конкурсса стирсь получазе «Мисс обаяния» титулть.
Даша занци пря спортса, кельгсы пидеманц-панеманц. Бабац тонафтозе стирть национальнай ярхцамбялень аноклама. Сонь пяк лац лисендихть селянкась, «Офтонь мадятне», пярякатне и, конешна, мокшень пачатне.
Дарья аф аньцек тонафни, но и работай ни. Сон покоди частнай клиникаса стоматологти ассистентокс.
Конкурсонь сяськити и призёрхненди максфтольхть диплопт и казнет, конатнень рамамаса редакцияньконди лездсть спонсорхне. Участниконь сертификатт, а стане жа аф оцю казнет получасть сембе участницатне.
Мокшень стирьхненди пара валонь азома, Од кизонь малаткшни илать мархта поздравляндама сашендсь Якшам Атясь. Сон явсь конкурсанткатненди ламбама казнет и ётафтсь налхксемат. Тяда меле сембе марса симсть чайда и ярхцасть мокшень пачада.
Ольга Колединова.
Фототне Николай КАРАНОВОНЬ.

Последние новости

РОССИЯНЬ ВОИНСКЯЙ СЛАВАНЬ ШИСЬ

23 февральсь—Отечествань Аралаень шись. 1918 кизоня тифоль Рабоче-Крестьянскяй Якстерь...

Госкомпании увеличили закупки у малого бизнеса Мордовии почти на треть

Общероссийский объём закупок крупнейших заказчиков у субъектов МСП по...

В Мордовии завершается строительство дома-интерната для престарелых и инвалидов

В Ичалковском районе завершается большая стройка. В рамках федерального...

Мазыхть мокшень стиреньке

Бта нинге аф кунара, мелять песта, «Мокшень правдась» тись...

Родькиттнень семьясна сувась сяськихнень лувксс

Аф кунара Москуса «Россия» Международнай выставкать видеса ётафтовсь «Родные—Любимые»...

Ётась эряфонь кувака ки

Мокшень писательсь Тимофей Андреевич Кирдяшкин сась мокшэрзянь литературав 1950...

РОССИЯНЬ ВОИНСКЯЙ СЛАВАНЬ ШИСЬ

23 февральсь—Отечествань Аралаень шись. 1918 кизоня тифоль Рабоче-Крестьянскяй Якстерь Армиясь.1993 кизонь 8 февральста Российскяй Федерациянь Верховнай Советть Президиумоц примась «Российскяй Федерациянь знаменательнай шить—Отечествань Аралайхнень...

Команда проекта #ПатриотКрафт из Мордовии провела мастер-класс по разработке сценариев патриотических игр в Мытищах Московской области

19 февраля в г. Мытищи Московской области на площадке АНОО «Ломоносовская школа-Зеленый мыс» прошел очередной мастер-класс по разработке сценариев патриотических игр, организованный командой грантового...

Госкомпании увеличили закупки у малого бизнеса Мордовии почти на треть

Общероссийский объём закупок крупнейших заказчиков у субъектов МСП по итогам 2023 года вырос до рекордных 8 трлн рублей. Благодаря национальному проекту «Малое и среднее...