Бта нинге аф кунара, мелять песта, «Мокшень правдась» тись итокт «Мазыхть мокшень стиреньке» конкурсти 2023 кизонкса. Редакцияса казьфтольхть эсонза сяськихне. Тя ульсь Од кизонь кар-
ша. Тяни моли тяддень февральть омбоце пялец и пинге газетаса азондомс «Мазыхть мокшень стиреньке» конкурсть од участницанзон колга. Тияк лятфтасаськ, пялькстомаса ули кода примамс участия мокшень эрь стирти. Мезе тянкса тиемс? Гайфтемс, тяштемс, самс редакцияв. Тя васенцесь. Нинге эрявкстыхть героинять мокшень щамса-карямса фотографиянза. Кда аш, эста тии фотокорреспондентоньке. Тя омбоцесь. Корреспондентоньке корхни мокшень стирть мархта, сяви
кядьстонза интервью. Тя колмоцесь. Газетать улихть группанза социальнай кона-кона сетьтнень эса, тозовок ули кода тяштемс. Учсаськ од участницатнень! Тяддень васенце участницакс арась Саранск ошста мокшень мазы стирсь Виктория Овтина.
Корхнеманьконь ушедомста эстокиге талакодонь, што Виктория сувси ся ломаттнень ёткс, конат маштыхть нльне аф содаф ломанть мархта сотксонь ладяма. Аньцек ушедсь эсь колганза азондома, шарьхкодень: мокшень стирсь корхтафкшуфнень, активнайхнень эзда.
Шачсь Виктория Саранск ошса мокшень семьяса. Тядяц и аляц Старошайговскяй райононнет. Тядяц—Лемдяй велеста, аляц—Сире Шайгавста. Овтиттне кой-мзярс тушендсть эряма Подмосковьяв, меле
мрдасть меки Саранскяи.
«Хуш и шачень ошса, но ёмла родинакс эстейне лувондса Лемдяй мокшень велеть, коса эрянь шабакс улемстон, коза сашендан пяк сидеста, коса эряйхть радняне: кельгома щавазе Нина Белова, сире щавазе Валентина Демкина, крёснавазе Марина Босина и лиятне»,—мярьгсь Виктория.
Стирть аляц, мокшалясь Евгений Семёнович, шачемас коре Сире Шайгавста.
Тядяц, Елена Борисовна, кода ни азфоль, Лемдяень. Работай Саранск ошень 3№ поликлиникаса медицинскяй сестракс. Тяниень пингть Елена Лушкина павазу тядя омбоцеда—сон казсь стиренцты Викториянди сазорня и омбоце мирденцты Павел Лушкинонди стирь, конань лемоц Ангелина.
Виктория Овтина тонафнесь Саранск ошень 9№ школаса. 9-це классть шумордамдонза меле поступась Саранскяень Услугань сферань и промышленнай технологиянь техникуму. Мокшень стирсь портнойкс
тонафни омбоце кизось, а сембоц тя специальностьс коре содамошит кочксема-пуропнема 2 кизот 10 кофт. Сай пингонь тевсь мялезонза. Техникумть аделамдонза сатфть лангс лотксемс аш мялец. Ёран, кле, поладомс тонафнемазень сяда тов. Кепотьксонди, арамс модельеркс.
Виктория пцтай эрь недяляня уленди Лемдяй мокшень велеса. Каникуланзонга фалу тоса ётафнесыне. Сашенды инжикс сире щаванц, щаванц и крёснаванц ширес. Но, кда и удалси ваймамс ошень эряфть эзда, то тевфтома Лемдяйса стирсь аф ащекшни. Сон фалу примси участия велень клубть и библи- отекать видеса ётафневи пуромкснень эса. Крёснавац—Марина Босина (лемоц лац содаф лувиеньконди) вов ни лама киза работай Лемдяень библиотекаса. Но аф аньцек книгат лувихненди максси сон. Марина Борисовна аноклакшни выставкат, ётафни пуромкст, пачфни тянь колга интернетса. Виктория—васенце лездыец. И мокшень щамса-карямса наряжай, и стихотвореният кайгиста морафты, и, кда эрявксты, Од кизоста Яга-Бабакс «арай». Кода корхнихть, асу ломанць лама тевса сафтсы!
Виктория Овтина Лемдяй велеть эзда примсесь участия ламоц конкурснень эса. Кепотьксонди, «Село моё родное» онлайн-фотоконкурсса. Тянь колга социальнай сетьса эсь группасонза пачфнесь Старо-
шайговскяй райононь Культурань центрась. Мокшень стирсь кизонь кофнень фалу ётафнесыне велеса и кочкси пара мяльхть-арьсемат сай кизоть самс. Эстовок фотографиянзон эса няфтезе кельгома теманц—кода мадонды шись. Валонзон коряс, тянь эса ули кати-кодама салавань шире. Шись пращай
сембонь мархта, а шинясь мадонды и надияй, што ванды ули од, нинге сядовок цебярь ши.
Пяк кельгсыне сон мокшень щапнень-каряпнень. И синь теенза пяк ладяйхть. Фотографиятнень лангс, коса стирсь наряжаф мокшаванякс, коль ванондолеть и ванондолеть.
Кельгсы Виктория щаванц и крёснаванц мархта мокшень ярхцамбялень пидеманц-панеманц. Удалсихть кургонянза, конат аноклакшневихть эрь илати.
Кизонда якай иможень, лугаста панчфонь кочкама. А нинге—Лемдяйть мазы вастонзон ванондома.
Моли тялоть мекольце ковоц. Февральсь тядде и лову, и кельме, и лямбе—цють аф эрь шиня полафнесы «прянь вятеманц». Но тя аф эвфнесы мокшень стирть Виктория Овтинать. Ваймама шитнень сон эряскоды Лемдяи, коса учсазь мала ломаненза. И сонга ёрай коль сяда курокста няемс синь.