Мазыхть мокшень стиреньке

Кельгома лувиеньке! Тячи тага оцю мяльса содафттядязь конкурсонь од участниконьконь, мокшень стирть Евгения Пивкинать мархта. Газетаньконь лопанянц лангста няйсасть сонь снимканзон. Кода корхнихть мокша ломаттне—афкуксонь баярава. И ронгс-пондс, и шама путксс удалаф. Уликс сембе мазышида башка няят эздонза оцюдонга оцю эрьгя, весялаши. Коса ина шачф-касф тя мазышись, мезьса заняф? Тянь колга лувода алува.
…Ковылкинскяй райононь Сутягина велеста Пивкиттнень семьяса Женя шачсь омбоцекс. Кассь сон отькорь, ёню шабакс, эрь-кодама тевса сафнезе. Нинге школавга ашезь яка, а переса—пульхксь-возясь родителензон мархта ряцок. Лия тефнендивок мяль вельде кярьмотькшнесь: то, ванат, кядьгонят штай, то кудботма аруяфты. Тядяц аньцек кеняртькшнесь лангозонза ванозь!
Женя лац мяляфтсы 1 сентябрень шить, мзярда тусь васенце классу. Прясонза вармать эзда сей-тов либордсть акша банттне, кядьсонза—панчфонь оцю пусма. Класса тонафни ялганзон мархта курокста мусь марстонь кяль. Сутягинаса школа ашель, сяс Женя пуропнесь содамошит Оцю Азясь шабрань велеса. Тонафнемаса сон сатнесь цебярь сатфкт. Ашезь лядонда ширеса школать общественнай эряфонц эздовок. Кельгозе лувоманц, сядонга пяк мокшень поэттнень и писательхнень произведенияснон. Кельгома поэтоц Максим Бебан, кона, эряви азомс, сашендови Женяти ичкоздень раднякс. А нинге школаса тонафнемста тячиень героиняньке ялгафтсь спортть мархта—налхксесь шра лангонь теннисса.
Школада меле Женя Пивкинась тонафнесь Саранскяйса Российскяй правовой академияса. Специальностьс коре сон юрист. Тяниень пингть стирсь покоди Москуса полицияса.
Тяфта лиссь, што тяни Пивкиттнень семьясна сяда лама пингта ётафни Москуса. Женять тядянза-алянза, Тамара Фёдоровна и Николай Филиппович, кемоньшка киза ни якайхть добувама столицав. Брадоцка покоди оцю ошса. Но Сутягинаса Пивкиттнень кудсна шава ламос аф лядонды, вдь отпускста, иласта, фалу, мзярда эвондакшни пингсна, семьясь эряскоды ёмла родиназост. Аньцек тоса синь марясазь пряснон афкукс павазукс. Женя виденцясь: пяк мялец эрямс и работамс шачема-касома уженясонза, но тяса аш покодема вастт.
Тячиень конкурсантканьке ётка пингста шарфни мяль творчествати. Мялезонза алмазнай мозаикась. А нинге стирсь тонафни гитараса морама и сонь тя аф кальдявста лисенди ни.
Велеса улемстонза Женя оцю мяльса наряжакшни мокшекс. Нарядть, конань няйсасть лангстонза, теенза эсь кядьсонза стазе бабац, Марфа Ивановна. Сиренясь ульсь афкуксонь мастерица. Школаса тонафнемста Женя щашендозе мокшень щамонц эрь-кодама пуромксс, мероприятияс, конкурсс, а тяни, кле, наряжамс аш коза, аньцек кудъёткса. Колсеви стирть мялец, мес тячи аф аньцек оттне, но и эряфкшуфневок аф сидеста наряжакшнихть национальнай щамса-карямса, мес юксневихть сире пингонь коеньке-обуцяньке.
Евгения Пивкинать лама арьсемадонза сай пингонди. Васенцесь ёткстост—пуроптомс семья и шачфтомс иднят. А нинге сонь, кода и ламотнень тячи, пяк оцю мялец, штоба масторлангса улель мир.
Ольга Евдокимова.