Тифт итокт газетать конкурсонцты
Аф васенце кизось ни газетаньке ётафнесы «Мазыхть мокшень стиреньке» конкурсть, конанди итокнень койс коре тиендьсаськ Од кизонь карша. Вов и тяддевок тернеськ редакциязонк цебярьхнень эзда инь цебярьхнень. Стака, пяк стака уленди кочкамс жюрити мокшень стирьхнень-участницатнень ёткста колма инь мазыхнень и асуфнень. Тядде тя тевса тейнек лездсть лувиеньке, конат максозь мяльс туф стирть инкса вайгяльснон «ВКонтакте» социальнай сетьса «Мокшень правдать» группасонза. И вов ётай недялять минь васетькшнеме сяськихнень мархта. Кит ина синь?
Васенце вастть занязе Ковылкина аймаконь Рыбкина велеста Дарья Шиндяйкинась. Даша тонафни Н.П.Огарёвонь лемса МГУ-нь филологическяй факультетса. Сон 3-це курсонь студентка. Стирсь лац тонафни вузса, тяшни стихт. А нинге ёт шабакс ладяй спортть мархта. Васенда занцесь пря лёгкай атлетикаса, сяльде—черлидингса. Тячи Даша аралакшнесы факультетть честенц аф фкя лацонь спортивнай пялькстоматнень эса. Кизонь пингть стирсь пара мяльса уленди «Орлёнок» идень лагерьса, коса покоди вожатайкс.
Омбоце вастсь максф Саранскяйста Виктория Овтинати. Сон пуропни содамошит Услугань сферань и промышленнай технологиянь техникумса. Виктория тонафни портноенди, мялец арамс модельеркс. Тонафнемшовор стирсь тиенди пяк пара тев—сташенды щапт и бронежилетт СВО-нь участникненди. Ётка пингста Виктория кельгсы пидеманц-панеманц. Пяк удалсихть кургонянза, конат аноклакшневихть эрь илати. Ваймама шитнень сон оцю мяльса уленди Сире Шайгав аймаконь Лемдяй велеса, костонне шачемас-касомас коре тядяц, Елена Борисовна, тяса эряйхть радня ломаненза.
Колмоце вастти лиссь Рузаевка аймаконь Трускляй велень стирсь Дарья Амбаева. Сон тонафни 11-це класса. Тонафни лац. Козя содамошинзон няфнесыне эрь-кодама олимпиадаса, тяконь лувксса и мокшень кяльть коряс. Занци призовой вастт. Тяда башка, аф фкя киза ни Даша сувси «Наследники» поисковай отрядти. Стирсь примси участия ётафневи сембе пуромкснень эса, аноклакшни презентацият, видеороликт. Кепотьксонди, Родной кялень Международнай шити, Семьянь кизоти. А нинге Дашань мазы вайгялец. Сон аф весть лисендсь велень клубть сценанц лангс. Пяк ужяль, мес Дашанди ашезь удала самс редакциязонк.
Дарья Шиндяйкинась, Виктория Овтинась и Дарья Амбаевась аф аньцек мазыхть и асуфт. Синь пяк кельгсазь тядянь-алянь кяльснон, мокшэрзянь культурать и койхнень-обуцятнень. Стирьхне пара мяльса наряжакшнихть мокшень щамса, кона эрти пяк ладяй.
Конкурссонк сяськихнень мархта симоме чайда, седикс-ваймокс корхнеме, спасибаме теест национальнайти кельгомаснон инкса. И, конешна, казеськ казнеса.
Удалаза сяда товолдонь эряфонте, мокшень мазы стирьхть!