Кельгома лувиеньке! Газетасонк сяда тов мольфтеви «Мазыхть мокшень стиреньке» конкурссь. Лятфнесаськ, сонь главнай условияц—штоба стирсь улель наряжаф мокшень щамса.
Кондястихть кода профессиональнай, стане и любительскяй фотографиятне. Синь можнат кандомс редакциязонк или прважамс тястонь адресс коре почтаста или кучемс электроннай почтазонк (mokshenpr@e-mordovia.ru). Сятнень, кинь ули мялец примамс участия конкурсса, но мзярс аш фотографияц, национальнай щамснон мархта тернесаськ редакцияв. Кизоть песта конкурсти тиеви итог, кочкавихть стирьхнень ёткста колма инь мазыхне. Теест аноклафт казнет.
А тяни пара мяльса содафттядязь од участницаньконь мархта. Тя мокшень од стирсь Алина Пониматкина.
Алина эряй-ащи Старошайговскяй райононь Сире Шайгав велеса. Кассь простой рабочаень семьяса. Тядяц, Людмила Васильевна, покоди диспетчеркс, аляц, Александр Васильевич, якай покодема Москуву, сон водитель. Алинань ули сазорняц—Юлия.
Тяниень пингть Алина Пониматкинась тонафни кемонце класса. Стирсь отличница. Кода азозе, арьсекшни шумордамс школать зрнянь медальса, а сяльде мялец поступамс Н.П.Огарёвонь лемса МГУ-нь филологическяй факультету. Стирсь ёрай сотомс эряфонц учителень тевть мархта. Алина пяк кельгсыне шабатнень и фалу тёждяста мушенды мархтост марстонь кяль. Иттневок ускозь усковихть стирти.
Шкабавазсь казезе тячиень участницаньконь лама ширдень асушиса. Алина сафтсы кштимаса-морамаса. Аф кржа пинге якась кштимань кружокс. Тяни сон сувси «Камертонь» школьнай хорти. Коллективсь выступандакшни школьнай и районнай мероприятиятнень эса, примси участия эрь-кодама конкурсса. Тядде, кепотьксонди, хорсь участвовандась «Поют дети России» конкурсса, коса занязе колмоце вастть.
Алина морси кода рузкс, стане и мокшекс. Но мокшень моротне, кода азозе сонць, теенза сяда малат. Синь, кле, крхка смузьсна, токасазь мянь седи куцюнять. Кельгома моронзон ётксот «Луганяса келунясь», «Мокшень крайняй», «Мокшень стирьхне мазынят», «Акша ловнясь» и лиятне.
Вайгялюкс стирсь тусь щаванц, Людмила Михайловнань лаца. А нинге сиренять эзда Алинати ётась мокшень щамти кельгомась. Конкурсантканьке оцю мяльса наряжакшни мокшекс. Ули сонцень щамоц, конань теенза стазь мала ломаненза. Алинань мокшень паляц арзяса мзярдовок аф пулиякшни. Сон сидеста щашендсы нарядонц школаса ётафневи илатненди и лия мероприятияс.
Тячиень героиняньке нинге пяк лац рисовандай. Стирсь шумордась художественнай школа. Сембода лац сонь лисендихть пейзашне. Алина сидеста «каннесыне» кагодть лангс Сире Шайгав аймаконь мазы васттнень: вирьхнень, паксятнень, велень ульцятнень, куд пирьфнень.
Алина Пониматкинась—трудонь кельги стирь. Аф пелезь кярьмотькшни эрь-кодама тевс. Тянди сонь ёт шабакс тонафтозь родителенза. Ёмластокиге стирсь лезнель тядянцты кудъётконь, куд пирьфонь тевса. Кизонь каникулатнень пингста Алина уленди щаванц ширеса, конанди оцю лезксоц перень тевса-заботаса.
Тячиень героиняньконь лама ялгадонза. Тя и шарьхкотьф. Сон панжада вайме, паронь арьси, лиянь пичефксонь-ризфонь шарьхкоди ломань, машты седикс-ваймокс корхнема, аф стак ламоц ялганза азонкшнесазь теенза эсь секретснон, кизефнихть совет. Алина тёждяста марясы прянц любой компанияса, фалу мушенды корхтаманди мялень салай темат. Азома нинге сявок, што стирсь примси активнай участия школать общественнай эряфсонза. Сон вятьсы «Пульс» школьнай медиацентрать.
Ольга ЕВДОКИМОВА.