Кельгома ялгат!
Пингсь моли, а мархтонза сяда тов мольфтеви конкурсоньке. Лятфтасаськ, тянкса мокшень стирьхненди
эряви тифтемс снимкат национальнай костюмса. Кода содаф, эрь аймакса народоньконь щамонь-карямонь козяшинц улихть эсь лацонь ширенза. Няфтесть мазышинц и азондода эсь колгант! Конкурссь учи эсонт. Тячи оцю мяльса содафттядязь од участницаньконь Дарья Луньковать мархта.
Шачсь-кассь Дарья Ковылкина ошса. Аляц, Роман Николаевич—мокша, тядяц, Наталья Викторовна—рузава. Но стирсь эсь прянц лувондсы мокшавакс.
Дарья Луньковать идькс пингоц ётась Ковылкинскяй райононь Вечкеня велеса бабанц, Людмила Николаевнань ширеса. Мокшавась и тонафтозе уноконц мокшень кяльти.
Ковылкина ошень 4№ средняй общеобразовательнай школать шумордамдонза меле, ламос апак арьсек, максозень кагодонзон Пензенскяй государственнай университету. Кочказе «врач-стоматолог» специальностть. Тяниень пингть героиняньке тонафни 4 курсса. Аф ваномок сянь лангс, што стирсь тонафни Пензаса, сон кородозь ванфтсы сембе минценнеть, мокшеннеть. Дарья сувси Пензенскяй областень Национально-культурнай автономиять Мордовскяй региональнай од ломанень отделе-
ниязонза. Нинге школаса тонафнемста примсесь активнай участия сембе мероприятиятнень и илатнень эса. Тяни, медицинскяй институтса тонафнемста, сувси стоматологиянь кафедрань студенческяй
советть составс. Сон аф аньцек факультетонь, но и эсь курсонь главнай староста. Стирть лафтувонзон лангса пяк и пяк оцю ответственность. Но, кода азозе Дарья, тя сонь аф эвфнесы, а меколанкт, сембось мялезонза.
Аф кунара Дарья примась участия «Сурская красавица» конкурсса, коса жюрить и ваныхнень содафтозень мокшэрзянь народть культуранц и коензон-обуцянзон мархта.
Тя конкурсса стирсь получазе «Мисс обаяние» титулть.
Тонафнемада башка сон покоди частнай клиникаса стоматологти ассистентокс. Дарья занци пря спортса, кельгсы пидеманц-панеманц.
Бабац тонафтозе стирть национальнай ярхцамбялень аноклама. Сонь пяк лац лисендихть селянкась, «Офтонь мадятне», пярякатне и, конешна, мокшень пачатне.
Дарья Луньковать тядянза-алянза эряйхть Ковылкина ошса. Кода азозе героиняньке, семьясост кородозь ванфтовихть мокшень койхне-обуцятне, мокшэрзянь культурась. Илатнень пингста кочксевихть фкя шра ваксс, коса улендихть эрь-кодама национальнай ярхцамбяльхть, и морсихть мокшень морот.
«Мокшетне маштыхть инжиень примама и каваняма. Ширезонк сидеста сашендыхть инжихть, конатнень содафнесайне шачема-касома уженязень мархта. Гордостень марязь азса—мон мокшан. И катк ламоняс эряйхть мокшень кялезе и народозе!»—азозе Дарья Луньковась.