Мазыхть мокшень стиреньке

Ульцяса азорондай тялось. Коль сяда сидет сюнера шитне, «сускихть» кельмотне. Тя пингста ваймось веши мезе-бди седиень эжди, мялень кеподи. Эста пяк пара панжемс «Мокшень правда» газетаньконь кучка лопанянзон и варжакстомс тяса мольфтеви «Мазыхть мокшень стиреньке» конкурсти. Улема, аф эльбядян, кда азса, што участницатнень мазышисна аф кадыхть озадонь седихть ащема фкявок ломань. Тяфтама мяльсна и омба масторонь инжихнень, конада республикасонк мекольдень кизотнень уленди аф кржа. Аф фкя лацонь пуромксса мархтост корхнемста сотцеви, што мокшень стирсь лувондови инь мазыкс марнек масторлангса. А конашкава мазыхть щамсна-карямсна! Сявомс хуш сядынгольдень мокшень костюмть, тяфта мярьктяма, атянь-бабань арзяста таргафть. Мзяра вийда, маштомошида путф сонь анокламанцты! Эрь пялькскясь, эрь строчкась салай сельмованф. Аф сяда кальдяв и тяниень мокшень щамсь. Эсонза, мярьгат, сотфт марс эряфонь кафта кинят—кунардоннесь и тяниеннесь.

Мокшень щамть мазышинц колга можна корхнемс пефтома. А тяни эрьда мрдатама конкурсти и тага весть тердьсаськ мокшень стирьхнень примамс эсонза участия. Условиятне тякот: кондястихть фотографиятне, коса стирьхне наряжафт национальнай щамса. Снимкатнень ули кода тифтемс редакциясонк.

…Рузаевка аймаксь. Мзяра содаф, асу ломань шачсь-кассь тя модать лангса. РФ-нь и МР-нь Народнай артисткать Мария Антоновать, поэтть, журналистть, СССР-нь Писателень союзонь членть Николай Учватовонь, МР-нь Заслуженнай артисткать Инна Учватовать и лиятнень эряфонь кисна ушедсь тяса. Асу ломаньца козя тя вастса шачсь и тячиень героиняньке Анастасия Резепова.
Настя кассь мокшень семьяса, коса минценнесь, национальнайсь фалу ульсь и лядонды башка вастса. Резепофнень кудса аф лоткси кайгомда мокшень кяльсь. Александр Дмитриевич и Антонина Владими-
ровна синць пяк кельгсазь мокшекс корхтамаснон, кельгомасна ётась идьснондывок.
Семьясь ванфнесыне сире койхнень-обуцятнень, илатнень, марса морсихть мокшень морот, пицихть национальнай ярхцамбяльхть. Настясь виденцясь, што кургоняда и пачада танцтиня теенза
мезевок аш.
Тячиень героиняньке эряй Рузаевка ошса, тонафни 11-це класса. Тонафнемась макссеви теенза тёждяста, пцтай сембе предметтнень коряс сявонди «ветет». Настять ули сёрмадыень асувоц, сон
тяшни эрь-кодама информацият, зарисовкат-месть «Рузаевские новости» газетав. Меля изданиясь сяськсь Президентскяй грантонь фондть конкурссонза и ушедсь ётафнемонза эряфс «Медиаволон-
тёры—силы добра» проектть. Настя сувась целевой группань тонафнихнень лувксс, примась участия «Инь цебярь медиаволонтёрсь» конкурсса и эстоньбере арась газетать мархта цебярь ялгакс. Стирсь
тяшни аф фкя лацонь темас коре. Салсесы мяленц журналистонь профессиясь, сяс школада меле арьсекшни поступамс Н.П.Огарёвонь лемса МГУ-нь «Журналистика» отделенияв и сотнемс сёрмадыень
тевть мархта сай пингонь эряфонц.
Анастасия Резеповась—эрьгав и отькорь стирь, сембе вастова кенерькшни. Сон «васенцетнень движениясна» од ломанень организациянь активистка, примси участия ётафневи сембе мероприяти- янзон эса аф аньцек эсь республикасонк, но и лия регионцовок. Меля, кепотьксонди, ульсь мянь Владивостокса. А нинге героиняньке РФ-нь Президентть видеса шабать праванзон коряс Уполномо-
ченнайть видеса идень Федеральнай общественнай советонь член!
Тонафнемась, общественнай работась занцихть лама пингта, сяс стак ащекшнемс Настяти ёфси аш мзярда. Кда эвондакшни ётка пингоц, сон пара мяльса васетькшни ялганзон мархта. Эздост стирть
сатомшка. Тя сяс, мес героиняньке корхтафкшу, аф кизос коре крхкат содамошинза, мархтонза фалу уленди интересна. Каникулатнень пингста Настя най уленди Хованщина велеса, щаванц-щятянц ши-
реса, лезни сиренятненди перень, куд пирьфонь и кудъётконь тевса. Машты стирсь кячкаскаса, вндерняса кодама. Тянди сонь тонафтозе щавац. Тялонда героиняньке кельгсы соксса, конькаса курькснеманц. Тянь Резепофне тиендьсазь семьянь келеса.
Участницаньке пяк кельгсы мокшень щамть, пара мяльса наряжакшни мокшекс илас-коза. Национальнай нарядсь, кода няйсаськ снимкатнень эзда, теенза пяк ладяй.
Ольга ЕВДОКИМОВА.
Фототне Николай КАРАНОВОНЬ.

Последние новости

Предприятия Мордовии повышают производительность труда

51 предприятие Мордовии принимает участие в реализации регионального проекта...

За три года количество самозанятых Мордовии увеличилось почти в шесть раз

Количество в регионе физических лиц, которые применяют специальный налоговый...

В Атюрьево прошел мониторинг выполнения народной программы «Единой России»

В рамках партийного десанта председатель  районного совета депутатов Татьяна  Волкова  и заместитель...

РОССИЯНЬ ВОИНСКЯЙ СЛАВАНЬ ШИСЬ

23 февральсь—Отечествань Аралаень шись. 1918 кизоня тифоль Рабоче-Крестьянскяй Якстерь...

Госкомпании увеличили закупки у малого бизнеса Мордовии почти на треть

Общероссийский объём закупок крупнейших заказчиков у субъектов МСП по...

Предприятия Мордовии повышают производительность труда

51 предприятие Мордовии принимает участие в реализации регионального проекта «Системные меры по повышению производительности труда» национального проекта «Производительность труда». Нацпроектпризван создать условия для ежегодного прироста...

За три года количество самозанятых Мордовии увеличилось почти в шесть раз

Количество в регионе физических лиц, которые применяют специальный налоговый режим «Налог на профессиональный доход» продолжает уверенно расти. Так, благодаря национальному проекту «Малое и среднее...

Призер Чемпионата мира и Европы по армрестлингу Галина Учаева встретилась с молодым поколением в рамках цикла мероприятий «Встречи с чемпионом»

В Штабе общественной поддержки Республики Мордовия сегодня состоялось мероприятие «Встреча с чемпионом» в рамках марафона «Сила России», который проводит партия "Единая Россия". Открыла его...