Аф аньцек эсь республикасонк, но и эздонза ширеса, нльне омба масторсовок содафт мокшень и эрзянь сёрматф-мазоптьф щапне, и сембе кайсихть лангозост сельме. Эрь сюре кинять эшксса оцюдонга оцю труд, асуши и маштомоши. Аф стак мзярошка кизода тяда инголе Францияса ётафтф конкурсса мокшэрзянь нарядсь лувфоль фкя инь мазыкс марнек мирса. Сире пинкнень мокшень и эрзянь стирнятне вете-кота кизоса ни сявондезь кядезост сюретнень-салмокснень, а кемгафтувоса—кярьмотькшнельхть эстеест рьвакс лисемань щамонь стама-сёрмадома. Кржаль сёрмадомс, эрявсь нинге содамс, мезень колга пачфни эрь узорсь, эрь тяшкскясь. Смузец мокшэрзянь сёрматфксть пяк крхка. Конешна, улендсь и стане, што ломаттне каннелезь котфть лангс сянь, мезе ульсь ваймосост, эсь мяльснон-арьсемаснон или сянь, мезе няендсть-приметнесть перьфпяльде, но сяда сидеста узорхне мезень-бди колга пачфнесть.
Кда котфть лангс сёрматфоль шуфтоня, ломань, кодама-бди зверня, тя корхтась сянь колга, што ломанць ульсь пяк мала перьфпяльть мархта, сюконякшнесь теенза. Шуфтонятнень кядьста ломаттне анцельхть шумбраши, эрьгя.
Ламоц узорхнень эзда ульсь кода приметамс нармонть. Кодамоль тя нармонць? Сире пингонь финно-угорскяй мифологиять эса корхтави, што ведьге уенди Демиург дикай нармонць алыясь сиянь ал. Тя алть эзда меле тиевсь масторсь. Шять, тя нармонць няфтьф сёрматфть лангса? Лия мифнень коряс, мокшэрзятне эвондасть масторть лангса Ведень нармонть тяштень тналстонза (созвездие). Пади, сяс мокшэрзятне лемнесазь Млечный путь созвездиять Каргонь Кикс. Легендаса корхтави, бта тя кить эзга ломаттне валгсть модать лангс. Шять, тя нармонть няфнезь стай-сёрмады аватне?
Мокшэрзятнень марнек эряфсна кемоста сотф ведть мархта. Эряма вастонди най кочксезь ляй, эрьхке маласа васттнень—Волгать, Окать, Сурать, Мокшеть, Инеркать. Ведявась сидеста лятфневи мифологиять эса. Кда сёрматфть эса теенть васьфтеви кичкорязь моли китькс, тя Ведявать символоц.
Ломанць тонадсь сташендома эстеенза щапт пяк кунара. Сяльде ушедсь мазопнемост синь. Мезенди тиендезе тянь? Штоба щапне салальхть сельмованф? Тянксовок, но аф аньцек. Кода арьсекшнихть ламоц учёнайхне, конат тонафнезь мокшэрзятнень эряфснон-ащефснон, сёрматфсь няфнезе, кодама родста-плямаста ломанць. Сёрматфть омбоце задачац—араламс азоронц кяжи вийхнень эзда. Тянкса панарть или лия щамть сёрматкшнезь эсь лацонь аралай знакса. Сембода лама узорда тиендевсь щамть крайге, мяштть и ожатнень лангса.
Пяк сидеста мокшэрзянь сёрматфть лангса васьфневихть «ромбт». Оцюфт или сяда ёмланят, фкять потмоса уленди нинге фкя ромб, или эздост целай кярьмаз. Мес мокшэрзятненди кельговсь тя фигурась? Фольклористть А.Д.Шуляевонь арьсеманзон коряс, ромбсь, конань кучкаса якстерь путерькс, няфнесы ломанть эряма вастонц, кучкаса крфай тол. Авась—кудонь лямботь ванфтыец, сяс сонь щамонц лангса лама ромбта. Палеонтологсь В.Бибикова лиякс шарьхкотькшнесы ромбть смузенц. Мзярда сон ванондозень мамонттнень оцю пейснон, няезе, што синь лангсост улихть ромб лаца лазфкат: оцюфт и сяда ёмланят. Сире пингонь ломаттненди кельговсь тя животнайсь виенц инкса, мяльсноль улемс лацонза, сяс мазопнезь пряс щамаснон ромбса. Сяльде тяфтама фигурат ушедсть тиендема кудъетконь кядьготнень-меснень лангсовок. Лия учёнайхне лувондозь, што ромбть смузец сяда кели: штоба моданьконь лангса улель сяда лама цебярьда. Ков сяда лама ромбта, тов сяда лама цебярьда. И тяса авась путневи ряцок модать-масторть мархта. Модась касфни урожай, авась шачфни итть. Аф стак кой-кона велетнень эса ванфтовсь тяфтама койсь: свадьбать пингста рьвяяйхнень лангс ёряйхть сёроса. Тяфта теест арьсекшнихть шачфтомс сяда лама шаба (сёрось—кода аф оцю ромбонят). Мокшэрзянь сёрматфксть нинге фкя элементоц—якстерь-равжа тюсонь аф сязендеви китьксне. Мезень колга пачфнихть синь? Тя модась, а лангсонза ромбонятне—видьмот. Лисенди, сёрмадысь арьсесь щамть азоронцты эрямс козяста. Мокшэрзянь нарядть алуце пялькссонза—якстерь «пакся», косовок аф сязендеви. Смузец тяфтама—катк эряфонь кись мзярдовок аф лоткси, моли парста, векста векс.
Сидеста ули кода няемс лия знак— 6-8 «пула» мархта «тяште». Сон васьфневи аф аньцек щапнень, но и арзятнень, парьхнень лангса, и кудонь мазоптомста. Мезть колга ина пачфни тя знаксь? Учёнайхнень мяльсна тясовок аф фкя лацоннет. Финцне няихть эсонза касыкс, лиятне—аньцек геометрическяй фигура. Но улихть и лия мяльхть-арьсемат. Коми народсь, карелхне мазопнезь кудснон 6-8 «пула» мархта знакса. Ня нароттне лувондсазь синь ши лаца, менелень, космосонь знакокс.
Эрь-кодама элементта башка мокшэрзянь щапнень лангса оцю смузьсна тюсненге. Сяда сидеста васьфневихть якстерь, равжа, шобда-сенем, акша тюсне. Равжа тюссь—модась, сенемсь—ведсь, акшесь—ваймонь арушись. Башка вастса ащесь якстерь тюссь. Сире пингста сявомок сон лувондовсь шинь, толонь символкс. Тяка пингть аралакшнесь кяжи вийхнень эзда.
Тя или тона тюсса сюретнень архнезь касыкнень вельде. Якстерьгофнезь подморенниконь унксса, конатнень тарксезь модать потмоста 21 июньцта сявомок 20 июльти молемс. Тюжя тюссь—пяшеста, сянгярясь—келувонь лопаста, сенемсь—шулеста. 19 векста сявомок касыксонь краскатне ушедовсть полафневома искусственнайхнень мархта.
Котф лангс сёрмадомась эвондась сядот кизода инголе, но ванфневи тячемс. Мордовияса и эрзятнень, и мокшетнень ёткса тянивок аф кржа машты кядь авада, конат ванфнесазь тя кядьтевть, сёрматнень смузьснон.
Материалть аноклазе Ольга ЕВДОКИМОВА.