Мезьса курькснесть шабатне

Вов и сась тялось. И катк ловда нинге аф сяшкава лама, шабатне тарксезь ни курькснембяльснон. Мяльсна сяда куроконе лийкстамс панда пряста. Мезьса тячи аньцек аф курькснихть иттне. Кунаркиге тонатф нурдонят пцтай аф васьфтят. Вастозост руль мархта снегокатт, тюбинкт, или кода нинге теест мярьгихть «бубликт», «ватрушкат», ледянкат, сокс лангса самокатт и стак тов. Сире ломаттне, ванондомок сембе тя козяшить, дивандакшнихть, но сельме пяк аф каяйхть, вдь синьге шабакс пингстост ульсть стама курькснембяльсна, конань аф сембе тячиень тюбинкне сатсазь. Эрьда лятфтасаськ, мезьса курькснесть шабатне велетнень эса 30-50 кизода тяда инголе.
Нурдонят
Нурдонятне инголи шуфтоннетольхть. А сяс стакатольхть, курькстсть аф пяк вишкста. И, видекс азомс, шабатне синь ашезь кельге. Мзярс панда пряв усксайть, сисем ливость эздот шудихть. Да и алу курькстомстонга нурдонясь сидеста кинди-бди толхмадемаль. А вов кшнинь нурдонятне—тя лия тевсь. Синь сяда тёждяста курькстсть и начка, и коське ловть ланга. Шарьхкотьф, тяфтама паршисна ульсть аф сембонь. Иттне каясть сельме сятнень лангс, кинди тядясна-алясна или раднясна рамсекшнесть или тифнесть кузенцяса кшнинь нурдонят. Сянкса курькснекшнесть лангсост ялгань келеса, полас-полас.
Цёмат
Тяфтама курькснембялень колга азондсть Инсарскяй райононь Навлей велеса. Но, улема, содазь сонь лия васттнень эсовок, аньцек, пади, лемнезь лиякс. Цёматась лувондовсь цёранянь курькснембялькс. Сон тяфтамоль: аф аф сери пильгоня мархта оцю скомнянясь, шарфневсь алубрят. Пильгонятнень лангс озаманди вачкотькшнесть седяфкат. А алуце досканясь вадендевсь траксонь вацьса и лихневсь кельмоти. Мзярда эендакшнесь, валондозь ведьса. Кодак эендай фкя слойсь, валондовсь нинге и нинге. Панда пряста матраф ловть ланга тя курькснембяльсь, кле, лийсь вармакс. Курькснемста эйсь цёматать алда шовсевсь. Эста цёранятне ласьконкшнесть маластонь эшити, пуполяфнезь цёматаснон и валондозь ведьса. Аф лама пингонь ётазь курькстомбяльсь тага аноколь. Тяфта жа тиендсть илять, куду самста, штоба анокламс паршиснон вандыти. Кода лятфнесазь ся пингонь иттне, эрявсь нинге маштомс ведьса валомс. Кда лоськафтсак аф стане, начкихть озаманятне и лангозост тиевихть эйбокольхть. Курькснемста, мзярда вишкста арды цёматась, комоти кодамовок каворкс прява, эйсь маряйста эрьхнезе ардыть. Аньцек тя киньге ашезе лоткафне. Шабатне, аф ваномок цят моли якшапнень лангс, сякокс кенордасть панда пряв.
Крьденя, горнама, врнама
Тяфтама лепт канни нинге фкя курькснембяльсь, кона содаф ламоц районца и велеса, аньцек лемнелезь сонь аф фкакс. А тиендезь фкя лаца. Сявондсть илиста кодаф кептерня, шуфтонь очконя, назёмонь усксема аф крхка кшнинь тазня, или оцю сифтем (кинь ни мезец ульсь), алксоц стане жа вадендевсь траксонь вацьса, а меле валондовсь ведьса—эендафневсь. Сотнекшнесть пикскяня, штоба ардомбяльть тёждя улель усксемс панда пряв. Потмозонза ацсевсь шужярня, штоба цёматась улель сяда, кода корхнихть русне, управляемай (сонь инголенц-фталонц ардыть пильгонза кафта ширде шарфнезь коза эряви). горнаматне-месне, кда синь тиендевсть круглай кептерьста или сифтемста, шарсть кода мяльсна, прокс тяниень тюбинкнень лаца. Сидеста лисендсть «авариятка», кда кафта курькстомкатне эрьхневсть фкя-фкянди. Эста шабатне нолдаф прят мртцесть куду «ремонтонь» тиема.
Арнема, дрында
Аш кода аф лятфтамс тя курькснембяльтьке. Сон тифоль эчке кшнинь байдекста и мяньтьфоль дуга лаца, кувака пе мархта. Курькснесть лангсонза стяда. Пилькне путомат кувака петнень-сокснень лангс и кирдема вяри мянтьф дугати, или инголет ащи ломанти. Курькснесть лангсост и кафтонь, и колмонь, и сяда ламонь. Арнематне серьс ульсть и ёмла шабанянди, и оцю ломанендивок. Сон тифоль кшнинь трубаста—стакаль, а сяс эрявсь маштомс аф аньцек лангсонза курькснема, но и сяда ичкози комотемс, мзярда ся ушеткшнесь веляма.
Сокст
Курькснесть иттне сокссовок, эздост велеса сатомшкаль. И катк синь аф прокс оттольхть, сякокс шабатне пара мяльса арнесть тялонь вирьге, паксява и панда пряста.
И.ФАДЕЕВА.