26 ноябрьста Москуса «Коммунарка» Культурань кудса Российскяй Федерациянь Президентть видеса Мордовия Республикать Постояннай Представительствац и «Мокшэрзянь землячества» Межрегиональнай общественнай организациясь «Минь марсотама» девиз ала ётафтозь Мокшэрзянь землячествать фольклорнай коллективонзон и лия исполнительхнень и коллектифнень концертснон. Вятезе концертть мокшавась Е.А.Помозова.
«Минь марсотама» девиз ала ётафтф концертть вельде ульсь кода марямс гордость странаньконь инкса. Моротнень ламошкасна лемтьфтольхть ёмла и оцю родинаньконди—Мордовияти и Россияти.
Приветственнай, седиста моли лямбе валхт пуромфненди азсть Российскяй Федерациянь Президентть видеса Мордовия Республикать постояннай представителец С.Г.Федонина, Российскяй Федерациянь сенаторсь П.Н.Тултаев.
Эсь моронзон вельде цебярь казне пуромфненди тись ламотненди содаф «САДко» группась.
Тя васедемаса лятфтафоль специальнай военнай операциять ётафтомац. Боецоньконди лезксть максоманц мархта Мордовияса заняфт ламотне. Ётксост республикань сембе уровенень властень представительхть, общественникт, политическяй партиянь члетт, волонтёрхт. И вов лездыхнень эзда фкясь—Ковылкинскяй районца шачф мокшалясь Е.И.Сорокин ульсь тя шиня «Коммунарка» Культурань кудса. Егор Ильич тиенди лама пара тев кода Мордовияса, стане и Москуса. И тянивок Е.И.Сорокин лезни шачема районцта мобилизованнай цёратненди и алятненди.
Вал максфоль специальнай военнай операциянь участникти Александр Кудашкинонди, кона азондсь эсь колганза и служаманц квалма.
Лятфтафоль, што лездомс боецоньконди ули кода и «Миронь российскяй фондсь» Международнай общественнай фондть Мордовскяй республиканскяй отделениянц вельде. Мордовияса панчф пожертвованиянь тиемс счёт, конань коряс можна лездомс республикастонк мобилизованнайхненди.
Тя шиня концертса морасть «Азорава», «Валдоня», «Эрзянь вайгель» коллектифне, «Эх, мордовочка» народнай ансамбльсь, Мордовия Республикань Заслуженнай артисткась В.Каяцкая, «Сияжар» рузонь и мокшэрзянь моронь коллективсь, «Колопинские голоса» коллективсь, лиятне.
Сембе синь Москуса и Московскяй областьса эрямстост лама тиендихть минценнеть—культураньконь, родной кяленьконь, коеньконь-обуцяньконь, историяньконь ванфтоманкса. И сембе синь тянь мархта нинге и нинге весть няфнесазь, што минь марсотама.
Катк тяфта ули фалу!
Т.АЛЬШИНА.