«Мы вместе!». Тяфтама лем ала 23 августста Саранскяйса, Мордовия Республикать столицасонза, ётафтоась национальнай культурань и креативнай индустриянь од ломанень III Всероссийскяй фестивальсь, кона пуропнезе марс сембе Россиять. Коста аньцек ашесть са ломаттне тя оцю илати: Алтайскяй крайста, Оренбургскяй областьста, Москуста, Санкт-Петербургста, Саратовскяй областьста, Ульяновскяйста, Пензаста, Сургутста, Татарстанцта.
Шиньберьф Саранск ошень оцю сцена лангса кштисть-морасть Россиянь оцю тяшттне, Приволжскяй федеральнай округонь содаф артисттне, ансамбльхне, няфтезь эсь национальнай культураснон од ломанень группатне. Мезе аньцек ашель площадкатнень эса. Няфтезь эсь работаснон Россиянь асу, машты кядь ломаттне. Сембе площадкатнень, мастер-класснень лемсна афи лятфтавихть. Шись ашезь сата, штоба семботь эсь сельмосост няемс, ваномс. Но мезсь пяк кенярьфти, фестивальсь хуш и од ломанень, но эздонза шири ашесть ляда сиретневок. Спортть вельде синь кемокснесазь шумбрашиснон, занцесазь ётка пингснон, аф кальдявста ваймосихть и лездыхть СВО-ти. Кие аньцек ашезь прима участия Всероссийскяй III од ломанень фестивальса. Нят «Защитники Отечества» фондсь, идень творчествань центратне, населениянь социальнай ширде араламань отделхне, МФЦ-сь, С.Д.Эрьзянь лемса изобразительнай искусствань музейсь, искусствань школатне.
«Минь марсотама!» национальнай культурань и креативнай индустриянь од ломанень III Всероссийскяй фестивалень участникнень поздравляндазень Мордовия Республикань Оцюнясь Артём Здунов. Сон отмечазе, што тя фестивальсь пуроптозень Мордовияв ломаттнень Россиять сембе уженянзон эзда. Тяфтама илатне маласькофнесазь ломаттнень, кемокснесазь ётксост ялгаксшить. Артём Здунов оцю казнеса отмечазень сятнень, кие лама вий путсь тя оцю праздникть ётафтомаса. Фестивалень участникнень лемс поздравления кучсь Российскяй Федерациянь культурань министрсь.
Тя шиня Саранскяйса шачсть ниле од семьят. Синь стане жа поздравляндазень Мордовия Республикань Оцюнясь.
Шиньберьф мольсь фестивальсь Саранск ошса. Сцена лангса кштисть-морасть артисттне. А площадкатнень эса стане жа аф сетьмоль. Республикаста и ширде саф ломаттне няфнесть мастер-класст, азонкшнесть эсь работаснон колга. Кепотьксонди, од ломанень фестивальса примась участия Сире Шайгавста Якомаскиттнень семьясна. Сон примась участия «Семья года» пялькстомаса и сувась сяськихнень ёткс. Тя семьять колга азонкшнеме ни «Мокшень правдаса». Семьяса сембоса кепотьксокс ащихть Ольга Васильевна и Иван Степанович Якомаскиттне. Синь вете идьсна: кафттне синцень, колмотне приёмнайхть. Касыхть ниле уноксна. И сембе синь стайхть, кодайхть, покодихть ожнанятнень мархта. Фестивали ускозь инь цебярь работаснон. И синь кеподихть мяль. Кие малаткшнесь Якомаскиттнень ваксс, тусь кепотьф мяльса. Ульсь мезе ваномс.
Эсь работанзон фестивальс усксезень и Сире Теризморгань Национальнай культурань центрась. Тяса ульсть сембот. Карень кодамаса мастер-класс няфтсь В.В.Шилкин. Тя тевти Владимир Васильевич кярьмодсь аф кунара. И сонь аф кальдявста лисенди. Фестивальса няфтьфтольхть Н.С.Кадеровать, А.И.Цыгановать, В.П.Ямашкинать, В.В.Родькинать и лиятнень работасна.
—Минь аф лядонттама шири тяфтама оцю илатнень эзда,—корхтай В.В.Шилкин.—Ломаттне малаткшнихть, кизефнихть. Тя теест интересна. Мон няфнеса кода кодавихть карьхне, азонкшнеса, мезе эряви тя тевонди анокламс. Карень кодамась эряви ванфтомс, няфтемс оттненди, кода тя сембось тиендеви, коста сембось сявондеви.
С.В.Кузнецова—мокшава. Эряй-ащи ошса. Покотькшнесь бухгалтеркс. Тяни пенсияса. Светлана Васильевнань зрняннет кяденза. И стай-кодай, и ожнанятнень мархта работай. Работанза повихть сельмос, кеподихть мяль. И пяк пара, што эсь кельгома тевонц мархта содафнесыне кафта стирензон, уноконянц Василиса Шичиновать. Фестивальса и щавась, и уноконясь наряжафтольхть мокшень щамса. Светлана Васильевна няфтезень Кадошкинскяй райононь Адаж велень эряйхнень щамснон. А нинге сон пяк кельгсы эсь шачема-касома веленц. Хуш вов 40 киза эряй Макаровкаса, а сединек-ваймонек Адажть мархта. Сяс аньцек эвондай ётка пингоц, эстокиге эряскоды шачема уженязонза.
Рузаевскяй райононь Мокшень Пишлянь работатнень фестивальса няфтезень велень библиотекарсь Ю.Н.Чудина. Кодама аньцек наряжаф някасна аш. И сембе синь тифт эсь кядьсост. Мокшень Пишляса лац содаф Г.В.Епифанова. Велеса тя ломанть колга якайхть легендат. Сон маштсы семботь. Тя тевть няфнесы-азонкшнесы кафта стирензонды. Сятка кирдьсазь тядяснон ширенц, сембоса лездыхть. Сембе материалхнень Галина Васильевна рамсесыне эсь ярмаконзон лангс. Мокшень Пишляса карькст кодайхть, някат наряжайхть Т.И.Китаева, Ю.Н.Чадина. Пяк лама ломаньда малаткшнесь Оцю Игнатовань райононь гончарнай тевонь мастерть М.А.Сонаевонь ваксс. Тя тевть мархта Михаил Александрович заняф сисемшка киза. Васенда покодсь школаса рисованиянь, трудонь учителькс. Тяни сон покоди Культурань кудса, вятьсы художественнай мастерскойть. Сатсть грант. Грантонь ярмакнень лангс панчсть мастерской. Иттне сашендыхть Михаил Александровиченди. Арьсян, што тя тевть кармай вандыец. Шабатнень ёткса лама смузю, сталмода аф пели ученикта. Ули кинди максомс гончаронь тевсь.
Од ломанень фестивальса пяк ламоль валенцянь кевордемань мастерда. Оцю илань участникнень пяк дивандафтозь Инсар аймаконь Ямщина велень эряйхне. Велесь аф оцю. Эряйда тяни кафтошка сяда ломань. Ингольдень кизотнень тяса эрь кудса кевордсть валенцят. Тя тевть сембе содасазь. Тянь вельде эрясть. Тяни велесь сяда сиредсь. Но ломаттне тя кельгома тевснон ашезь када. Фестивальса няфтьфтольхть М.В.Сипцовонь, Н.В.Кривёнышевонь работасна.
Сембонь дивандафтозень Ковылкинскяй райононь Гумна велень библиотекарсь В.В.Нагаева. Сон содаф художникть Ф.В.Сычковонь картинанзон коряс тиенди налхкшкат, няфни мастер-класст. Эсь работанзон няфнесыне фестивальхнень, лия оцю илатнень эса.
Пяк цебярь площадка фестивальс аноклась «Защитники Отечества» фондсь. Кодама аньцек экспонатт тяса ашельхть. «Минь марсотама!» национальнай культурань и креативнай индустриянь од ломанень III Всероссийскяй фестивальсь ётась мялень салайста, весяласта. Сембе, кие сашендсь сонь ваномонза, тусть куду кепотьф мяльса.
Илья Вешкин.