Минь виеньке—Марстоньшиса

Кода пачфтсь тейнек Ханты-Мансийскяй Автономнай округса «Масторава» мокшэрзянь региональнай организациять председателец Геннадий Наркаев: сембе мероприятияса, конат лемтьфтольхть народонь Марстоньшити округонь столицаса, Сургут ошса, мокшэрзятне ётафтсть оцю работа. Лия народонь общественнай организациятнень мархта ётафтовсь лама эрявикс мероприятия, коса азондовсь минь лама национальностень народоньконь подвигонзон колга, конат ульсть тифт народоньконь и Отечестваньконь инкса!
Тяда башка, Геннадий Наркаев пачфтезе тейнек: кле, мокшэрзянь общественнай организациясь сидеста кочкси и ускси гуманитарнай лезкс СВО-нь боецненди. Ня лезксса—ярхцамбяль, медикаментт, маскировочнай сетьть, окопнай штатолхт, мотоциклат, квадроциклат, а тяфта жа боецненди эрявикс щамбяльхть-месть.
Кода китькстазе Геннадий Наркаев: тя гуманитарнай лезксть эрь мезне сонць усксесы фронту.
Тяфта жа округонь лия народонь общественнай организациятнень мархта «Масторавась» эреклафтозе гуманитарнай лезксть кочкаманц коряс работать. И ноябрь ковть кувалмоста синь марстонь вийса пачфтьсазь сонь фронту.
Кода мярьгсь мекпяли Геннадий Наркаев: марстоньшиса—минь лама национальностень народоньконь пефтома виец. Тя вийть мархта сяськондезь вракнень минь атянь-атяньке. Мархтонза сяськсаськ синь миньге!
Владимир Нестеров.