Мокшавать национальнай щамонза няфневихть Москусовок!

Ольга Матвеевать лемоц лац содаф Теньгушевскяй районца. Ольга Филаретовна лама киза ульсь начальнай классонь учителькс Сакаевань школаса, меле кой-мзярс работась Шокша велень школаса. Мзяра идь тонафтсь тяштема и морафтома, умножениянь таблицань содама? Пяк и пяк лама. Тяни учениконза кассть ни, шабасна кунара тонадсть лувома, кочказь эряфса эсь киснон.
Но аф аньцек учителень тевонц мархта арась содафокс Ольга Филаретовна. Вов ни лама киза сон тиенди мокшень, эрзянь, шокшень, рузонь щапт, конатнень лангс ванондолеть и ванондолеть. Коста мокшавать эса сявовсь тяфтама асушись? Тянь колга лувода алува.

Шачсь Ольга Дёмкина Старошайговскяй райононь Лемдяй велеса лама идень семьяса. Тядяц, Анна Александровна, и аляц, Филарет Иванович, касфтсть кафкса шабат: вете стирьхть и колма цёрат.
Ольга Филаретовна мялень салайста пачфтсь родонц-пляманц колга. Лемдяйса, кле, тейнек мярьгихть Котельникт. Аф кяжияфты тя прозвищать коряс эрсь эстокиге шарьхкодьсы, кит тя-тя ломанть атянза-бабанза. Котельникне—асуфт, лама тевса маштыхть и шарьхкодихть. Ольга Филаретовнань тядяц котцесь котфт, сёрмадсь сюреса, тиендезень авань лия кядьтефнень. Щавац, Агриппина Иванова, и сюреса сёрмадсь, и кштирдсь. Героиняньконь щятяц, Александр Иванов, маштсь металлть мархта работама. Тиендсь куцюфт, лудиндась кядьгот. Сембоса сафтозь и Котельникнень уноксна. Фкя-фкянь эзда тонафнезь ламоц тефнень, кассть трудонь кельгикс.
Родной велеса школать шумордамдонза меле Ольга поступась М.Е.Евсевьевонь лемса Мордовскяй государственнай педагогическяй институтонь начальнай образованиянь педагогикань и методикань факультету.

«Пяк кельгине ётка пингозень ётафнемс шабатнень мархта: налхксень, кштишендень-морсень, ванникска савсь улендемс. Улема, эста и сась прязон начальнай классонь учителькс арамать колга мяльсь. Вов и ётафтыне арьсефть эряфс»,—мярьгсь Ольга Филаретовна.
Вузса тонафнемста мокшень стирсь арась содафокс сай пингонь мирденц—Теньгушеваста рузонь цёрать, физико-математическяй факультетонь студентть, Павел Матвеевонь мархта. Павел Александрович и Ольга Филаретовна рьвяясть институтса тонафнемста. Тонафнемать шумордамдонза меле од учительсь Павел Матвеев кучфоль работама Теньгушевскяй райононь Сакаево эрзянь велень 9 кизонь школав. Салмоксть мельге сюреське: институтть аделамдонза меле мирденцты сась мокшава-баярава рьвац Ольга.

Матвеефне лама киза работасть Сакаево велень школаса. Павел Александрович—физикань и математикань, Ольга Филаретовна—начальнай классонь учителькс. Тяфта Лемдяень мокшавать эряфонь киц пачфтезе Мордовиянь инь ичкоздень райоттнень (кда лувомс Саранскяйть эзда вайгяльбетнень) фкяти. Нильгемоньда лама киза Матвеефне марсот. Сакаеваста козовок ашесть тушенда. Виде, мзярда 2009 кизоня сёлкфоль Сакаево велень школась, рьвясь кой-мзярс покодсь начальнай классонь учителькс Шокша шабра велень школаса, а мирдсь якась вахтаса работама Москуву.
Полатнень колма шабасна. Оцю стирьсна, Наталья Павловна, эряй Москуса, сонцень семьяц. Касыхть кафта стирнясна—Анастасия и Ульяна.
Омбоце идьсна—цёрасна, Александр Павлович, эряй и работай Самараса.
Мекольце шабасна, Татьяна Павловна, эряй Саранскяйса.
Кода ни азфоль, Ольга Матвеева вов ни лама киза заняф национальнай щамонь анокламать мархта. Котельникнень уноксна лама мезе маштсь инголивок. Педагогическяй институтса тонафнемста ульсь «труд» предмет. Максыхть, кепотьксонди, студенттненди задания—сюреса сёрмадомс салфетканя, тиемс нуланяста няканя. Мзярс лиятне нинге арьсекшнесть, Ольга Филаретовна заданиять пяшкотькшнезе ни. Ванфтозе эрь ожнанять, сюре пакшкять, нуланять, сяс мес рамамс тянь пяк ашель коста и аш мезень лангс. Но ульсь оцю мялец сяда тов виияфнемс тя асушинц.
Сакаеваса эрямста, комсь кизода инголе, сась мяльс варжамс виензон шокшень национальнай костюмонь тиемаса. Шокшень (авань) щамсь пяк мазы, сонь лама эсь лацонь ширедонза. Кепотьксонди Ольга Матвеева вешсь щапт, конатненди 150-шкань киза. Корязост и ушедсь работама. Тевс нолдазе котфть, конань котцезе тядяц Анна Александровна. Тя котфть ланга мокшавась кроясь панар. Сюреса сёрмадомс лама ашезь эряв—аньцек ожатнень и панарть алуце пяльксонц. Сяда тов тевс тусть сиянь теньканятне—эздост лиссть пяк мазы узорхт. Тяфта и тифоль ушеткс васенце костюмти.
Ольга Филаретовна тись шокшень костюмонь несколька комплект: стирень, алянь, авань… Мокшавась фалу морсесь велень художественнай самодеятельностьса. Кулемок од тевонц колга, лездсть коллективса морсихне, Сакаевань эряйхне.
Работанза ушедсть няфневома выставкатнень эса. И тевсь тусь сяда тов. Пингонь ётазь аноколь мокшавань щамсь—стамсь, кодамса якасть Старошайговскяй райононь Лемдяень мокшаватне.
Азондомс тянь тёждя, а варжак тиемс! Эрь костюмть педа-пес анокламанцты тушенды киза, сяс мес сюреса сёрмадоматне тиемат маштозь, салмоксть эрь «аськолкскац» водендама эрявикс шири. Сяс тя тевса эряскодомс аш кода. Тяда башка, тевс нолдамат цифторксне (блёстки), ёмла ожнатне. Котф мастерицась тяни рамси. Натуральнай, кле, кафта сюреста кодаф. Уле тюсонц акшепнесы сонць.
Тняра кизоста тись щамонь башка коллекцият. Синь няфневсть Москусовок. Кепотьксонди, «Этно-Эрато» национальнай костюмонь сери модань Евразийскяй конкурсса, коса занцезь омбоце и колмоце васттнень.
Зрнянь кядь мокшавать «арзясонза» шокшень, мокшень, эрзянь щапт: оцю ломанень и идень, а нинге сюреса сёрматф нардамат. Тяни кярьмодсь Теньгушевскяй райононь рузонь костюпненди!
Мирдец, Павел Александрович, тевфтома аф ащекшни—кодай кели каркст.
Тянди тонафтозе рьванц Ольга Филаретовнань акац Лидия Филаретовна. Сон, ужяленди, тяни аш шиса. Котельникнень нинге фкя уноксна, Лида, маштсь сюреса сёрмадома, кодама, стась мокшень нулат, тиендсь сёкт…
Павел Александрович эсь рьванц эзда тонадсь ёмла ожнаста кодама. Стирьсна, Наталья Павловна, кодай кячкаскаса, сёрмады сюреса, кодай ёмла ожнаста, стай машинкаса, кодай сисем тюсонь цюлкат.
Кода няйсасть, мирттне-рьвятне Матвеефне пенсиясовок тевфтома аф ащекшнихть. А нинге кирдихть колма (!) тракст, куднармотть. Инголи, кле, пирьфоньке сяда «козяль»!
Шачема велеса—Лемдяйса мокшавась уленди аф пяк сидеста, сяс мес кудонь жувататнень апак ватт ламос аф кадсайть. Но Тройцяста сашенды. И оцю мяльса тя иласта щашендсыне эсь кядьса тиф щамонзон.
Лемдяйса эряйхть Ольга Филаретовнань мала ломаненза—аканза Валентина, Антонина, дуганонза Василий, Пётр. И сембе синь—«Мокшень правдать» сёрматфниенза и кельгиенза.
Арьсетяма Ольга Матвеевати тиемс-анокламс нинге пяк лама национальнай щам!
Татьяна АЛЬШИНА.
Фототне сявфт
«Примокшанье» газетать редакцияста.

Последние новости

Тядянь-алянь седиень и ваймонь лямбосна сатни лама иденди!

2024 кизось странасонк Россиянь Президентть Владимир Путинонь Указонц мархта...

Пееди—и ломанть ваймос арай сяда пара

Тячи азонттама Моску ошень «Азорава» ансамблень участницать Елена Куфтиновать...

Ётафтови «Акша Келу» Республиканскяй национально-фольклорнай ила

23 июньцта Зубово-Полянскяй райононь Вадовские Селищи велеса ётафтови «Акша...

Спортсменоньке сатсть «зрня» и «сия»

Казаньца ётафтовсть БРИКС странатнень Налхкомасна. Сяськомаса пялькстсь 5000-тнень малава...

Петевихть-мазоптовихть куд пирьфне

«Жильё и городская среда» национальнай проектть «Формирование комфортной городской...

Занятостень службась одкстоптови

Мордовиясь сувась занятостень службань комплекснай модернизациянь пилотнай региоттнень лувксс....

«Торама» ансамбльсь няфтезе прянц оцю фестивальса

«Торама» фольклорнай ансамбльсь примась участия «Лето в Москве. Все...

Тядянь-алянь седиень и ваймонь лямбосна сатни лама иденди!

2024 кизось странасонк Россиянь Президентть Владимир Путинонь Указонц мархта азф Семьянь кизокс. Но аф аньцек тядде миньцонк семьятненди шарфневсь и шарфневи башка мяль. Коль...

Пееди—и ломанть ваймос арай сяда пара

Тячи азонттама Моску ошень «Азорава» ансамблень участницать Елена Куфтиновать колга, кона нинге шабакс кельгозе мораманц и фалу примсесь участия художественнай самодеятельностьса.Вов кода мокшавась азонды...

Ётафтови «Акша Келу» Республиканскяй национально-фольклорнай ила

23 июньцта Зубово-Полянскяй райононь Вадовские Селищи велеса ётафтови «Акша келу» (Белая берёза) Республиканскяй национально-фольклорнай ила. Койс коре сон уленди Тройцянь шиня.Инжихнень учсазь концертнай козя...