«МОКШЕНЬ ЦЁРА»
Валхне и музыкась Иван Чекмаевонь
Кштийхть мазы стирьхне, мокшень богатырьхне
Мельгаст коль ваныхть, сельмосна синь палыхть.
Стирьхне пилькт шавихть, цёратнень лангс ваныхть,
Коль дразняйхть эсост, цебярь цёрокшт мяльсост,
Мяльсост синь крайнясь, конань эзда ваймось,
Панжи как панчфкя, тундань свежай таньфокс,
Стирьхне коль шарыхть, гармонист ювадихть,
Тон, цёра, морак, сединьконь минь колак!
Припевсь:
Мокшень цёра, мазы мора морак,
Мокшень стирьхне кштикшнемс пяк ни ёрайхть,
Мокшень стирьхне ёфсикс тундань лопат,
Мокшень цёра, мазы мора морак.
Морось коль гайняй, стирьхне кштийхть аф ваймязь,
Кштийхть и ювадихть, кальдяв мяльхть аф кадыхть,
Морхт марняс морайхть, пичефксть панемс ёрайхть,
Кштийхть аш синь лацост, цёрат ваныхть ряца,
Эх, мокшень крайняй, тундань панчфонь вайме,
Сембось пяк цебярь, вельхкссот мазы менель,
Стирьхне ювадихть, сембонь мяльс иляды,
Тя масторть вастоц, кона панчфокс ацаф.
Припевсь сякось.
Мекольдень кизотнень сембе однять сотцесаськ и мушендсаськ интернетста. Сувсетяма тя или тона группатненди, сообществатненди—сятненди, конат салсесазь мяленьконь содержанияснон мархта. А нинге—ванондсаськ кулянь «лентать», конань вельде няеви, мезе одня ули социальнай сетьть коряс ялганьконь страницасост.
Оцю казнекс сембе мокшетненди арась од клипсь, кона аф кунара эвондась «Мокшень правдать» цебярь ялганц, Российскяй Федерациянь Президентть видеса Мордовия Республикать Постояннай представительстванц видеса «Азорава» ансамбльть солистканц, Ковылкинскяй районца шачф-касф мокшавать Елена Помозовать (Алямкинать) страницасонза. Клипсь тиф «Мокшень цёра» мороть коряс. Валхнень и музыкать авторсна—мокшалясь Иван Чекмаев.
Мокшень мороть лангс клипсь эстокиге «срадсь» интернетть келес: ломаттне «повфнезь» сонь эсь стеназост, кучсезь содафснонды, а нинге—комментарийхнень эса азондсть оцюдонга оцю спасиба мороть авторонцты, мораенцты, клипса участиянь примайхненди, сонь тииензонды-смекаензонды.
Кит синь? Исполнительда (Елена Помозовада) башка, «Мокшень цёра» мокшень мороть коряс снимандаф клипса ули кода няемс Ковылкинаса шачфть Игорь Троицкяень (сон гармония мархта), а нинге—Дмитрий Василькинонь. Клипса кштийхть Татьяна и Полина Низяеватне, Мария и Дарья Кулагинатне, Кристина Киревичева, Ксения Ацапкина, Софья Фомичева, Дарина Рауткина. Стирьхне—Ковылкинань школатнень эса тонафнихть, Саранскяйста студенткат. Режиссёрсь Максим Ефимкин.
Кода и мзярда эвондасть «Мокшень цёра» морось, а меле—корязонза тиф клипсь? Тянь колга корреспондентоньконди азондсь Елена Помозова (Алямкина).
Елена Анатольевнань валонзон коряс, мзярда сон ётась эряма Москуву, оцю мяль кармась шарфнема Мокшэрзянь землячествать общественнай тевонзонды. Морсесь концерттнень эса, пуропнесь и ётафнесь мероприятият, конатненди васенце тевкс ульсь национальнай культурать мархта содафтомась и сонь ванфтомац.
Фкя тяфтама мероприятияса Елена Анатольевна васьфтезе земляконц Иван Чекмаевонь. Ся и кизефтезе мокшавать: ули-аш мялец морамс сонь несколька моронц.
«Фкясь эздост «сувась» ваймозон. Морось пяшксель родной Мордовияти, коеньконди, «юроньконди» кельгомада. Тя ульсь «Мокшень цёра» морось. Васенцеда морайне ёмла родинаснон, Ковылкинскяй районть 95 кизонцты лемтьф праздникса»,—мярьгсь Елена Анатольевна.
Конешна, мокшавась аф ламода таколдсь. Вдь сон лиссь сценать лангс земляконзон, раднянзон инголе. А тя—оцю ответственность. Но таколдсь шавос! Премьерась удалась, морось тусь сембонь мяльс, васьфтьфоль лямбоста.
Кизода меле Елена Помозова (Алямкина) ушедсь арьсема тя мороть лангс клипть снимандаманц колга. Тя тевонди кочказе Гумны велеть, коса шачсь. Пуроптсь стирень и цёрань творческяй команда. И марстонь вийса тифоль тя клипсь. Эсонза няфтьфт Мордовияса эряй стирьхнень и цёратнень мазышисна.
«Тя клипсь—аф аньцек видео, тя монь «юрне», кельгомазе шачема ширети. Пяк павазуван, што тянь ули кода няфтемс и явомс сембонди»,—азозе мокшавась.
Мокшэрзянь масторть перьфпялец, мокшень стилизованнай щапне, одксшись, мазышись, кизось, ару кельгомась—тя сембось сувафтф од клипти.
Сонцень мороть Елена Анатольевна вов ни киза морсесы сембе площадкатнень лангса, коза тернесазь. Тяддень июньцта сонь кулезь Гербер 2024 удмуртскяй национальнай илать рамкаса финно-угорскяй музыкальнай конкурсть финалсонза, коса Елена Анатольевна примась участия Мордовиять эзда. Мероприятиясь ётафтовсь Москуса ВДНХ-ть главнай сценанц лангса.
Тяда башка, 3 августста кулезь Ковылкинань и Ковылкинскяй райононь эряйхне, инжихне Ошень шити лемтьф пуромксса.
«Мокшень цёра» мороть лангс снимандаф клипсь курокста арась пяк содафокс. Интернетса несколька шиста сонь ванозь 50000-ксть Россиянь ламоц региоттнень эса.
Елена Помозовати (Алямкинати) тяшнихть, гайфнихть и азондыхть спасиба. Кепотьксонди, вов мезе тяштсть Самарскяй областьста «Мордва Тольятти и Поволжья: Мокша и Эрзя» социальнай сетень группас сувсихне:
«Вайгяльцень кулхцондсаськ машинаса ардомста. «Мокшень цёра» родной кяльса мороть инкса азонттама оцю спасиба!»
«Мокшень цёра» морось и лангозонза снимандаф клипсь афкукс пяк удалафт! Кие нинге ашезь кенере ваномс или кулхцондомс—тиесть тянь и семботь няйсасть тинць.
Татьяна АЛЬШИНА.