Мокшень кяльть тонафнесы оцю мяльса

Мзярда иднясь ушеды эсь народонц культуранц, коензон-обуцянзон кельгомост? Оцю ломанькс касомдонза меле? Пади, кой-кона семьятнень эса арьсихть тяфта. Аньцек аф юкснема, што стирнясь или цёранясь сембе национальнайти сяда пара тонафтомс, мзярс нинге ёмла, и тя тевса улихть сяда оцю сатфкст, кда мокшень кяльть шабанясь кармай тонафнемонза мала ломанензон кепотьксснон коряс. Ваномок оцюфнень лангс, сон фалу тии лацост. Тянь ули кода азомс и Ева Бутраевать колга, конанди курок топоди колма кизонят. Стирнясь тядянзон-алянзон мархта эряй Рузаевкаса, коза семьясна аф кунара ётась Мокшень Пишля велеста.
Евань аляц—мокшаля, тядяц—пялес мокшава. Велеса эряйхть бабац и атяц, Елена Викторовна и Геннадий Николаевич Бутраефне.
Елена Бутраева—техническяй работник велень клубса, а нинге—тястонь самодеятельностень участница. Ева уноконяц фалу уленди мархтонза ётафневи пуромкснень эса. Сашенды иттненди аноклакшневи илатненди, кепотьксонди, этнодискотекас, Од кизонь ёлкас. Евась пяк кельгсы мокшаванякс наряжаманц. И тя щамсь теенза аш ни кода ладяй.
Бабанц мархта стирнясь сидеста уленди мокшень ломаттнень—велень эряйхнень ёткса. Аф кунара субботниксоль, лезнесь тиемс аруши ульцятнень эса. Елена Викторовна корхни уноконянц мархта мокшекс. Тяфта, касомок, Ева кармай содама кафта кяльхть—рузоннеть и мокшеннеть.