Идень садса воспитателькс работамась—тевсь аф тёждятнень эзда, сяс и аф эрти сафтови. Вдь эрь шабать ваймос и седис мума самай ся панжеманять, конань вельде стирнясь или цёранясь ладяйхть соткст воспитательснон мархта. А мокшавась Татьяна Макеева сувси самай сятнень ёткс, кие машты эрявикс панжеманять вешема и мархтонза эрь шиня стирнянь или цёранянь ёмла «замоконять»-сединять панжема. Татьяна Ивановна работай Саранск ошень 55№ комбинированнай видонь идень садса, сон—высшай квалификационнай категориянь воспитатель. Тняра кизоста идень садсь арась мокшавати омбоце кудкс, коза сон эряскоды эрь шиня кельгома тевонц тиема.
Шачсь-кассь Татьяна Макеевась мокшень ломаттнень Иван и Раиса Сураефнень семьяса. Раиса Ефимовна (стирень фамилияц Кошелева) Вертелимонь, Иван Николаевич—Краснай посёлкань. Ошу тядянза-алянза эряма ётасть, но мокшень кяльть ашезь юкста. Мзярда ушедоме Татьяна Ивановнань мархта корхнема, сон лочазь лочась мокшекс. А месть дивандакшнемс, кда шачсь мокшень велеса, кассь эсь кяльса корхтайхнень ёткса—тяфтама мяль эстокиге сась прязон. Но меле героиняньке петемань, азомок, што шачсь Саранскяйса, коса и кассь. А мокшекс корхтама тонадсь шачфтыензон-касфтыензон эзда. Мезенди тянь пачфтине? Аш мялезе киньге «сельмонц» сялгомс, аньцек вдь аф шуроста уленди стане, што ошса, мокшень семьяса, шачф шабатне «шапихть» аньцек рузкс. Но тянь аш кода азомс Татьяна Макеевать колга. Нинге шабакс фкакс тонафнезень кода рузонь кяльть, стане и мокшеннеть. Арьсян, тянь ширде ащи цебярь кепотьксокс лиятненди.
Татьяна Макеева Саранск ошень комбинированнай видонь 55№ идень садса работай кунара. Тяда инголе покодсь и лия вастса, а меле сотозе эряфонц шабатнень мархта. Васенда воспитательти лездыель и вов ни лама киза—воспитатель. Виде, идень садста кой-мзярс тушендсь, но меле мрдась меки.
Мокшавать работань марстонь стажец—35 киза, эздост 23-сь—педагогическяй. Сонь колма высшай образованиянза, тяконь лувксса и М.Е.Евсевьевонь лемса Мордовскяй государственнай педагогическяй институтса (тяни университет) получафсь.
Тяни сон воспитатель старшай группаса. Тяда инголе идень садса воспитателькс работась алянц сазороц Анна Нарваткина. Мокшавась тя идень садса и ушедозе аф оцю музейть кочкаманц-пуроптоманц мархта сотф тевть. Сяда тов сонь поладозе и тянемс группасонза вятьсы Татьяна Ивановна.
«Мой край» музейсь—мокшэрзянь культурань, коень-обуцянь афкуксонь уженя. Мезе аньцек аш эсонза: мокшень и эрзянь щамса щаф-каряф някат, карьхть, кядьгот, пряруцят… Эрь паршить ули кода лемдемс афкуксонь экспонаткс, вдь вельдест ванфтови инь питнись—культураньке. Ваномок воспитательть музеенц лангс, кой-мезе кудста ушедсть каннема иттнень тядясна-алясна. Кепотьксонди, тя семьяса ванфтовсь мокшавать пряруцяц, омбоцеса—эрзявать национальнай щамонц пяльксоц. И семботи мушендови васта Татьяна Макеевать «Мой край» музейсонза.
Мокшавась—Старошайговскяй райононь Лемдяй велень рьвяня, сяс кирди кеме соткст поланц раднянзон и земляконзон мархта. Татьяна Сыркинась казсь музеи карьхть, а Татьяна Ивановнань авозец, Ева Макеева, стась и сюреса сёрмадсь панар, пряруцят. Оцю спасиба Ева Архиповнанди азондыхть аф аньцек рьвяняц, но и сят, кит няендьсазь сембе тя мазышить.
Пуроптомс идень садса музей—тевсь эрявикснень эзда. Но нинге тиема стане, штоба уликс сембе паршихне нолявольхть тевс. И воспитательсь Татьяна Макеева тянь тиендьсы фалу. Стирнятнень и цёранятнень мархта занятиятнень пингста васенце вастсот музейста паршихне. Пачфни историяснон колга, азонды кода нолявсть и тянивок нолявихть синь тевс мокшень и эрзянь велетнень эса. Улихть и национальнай щамнянза, конатнень стафтозень шабатненди. Наряжасы идень саду якай стирнять и ся афкуксонь няканякс арай!
Воспитательть валонзон коряс, ошень шабатне оцю мяль шарфнихть мокшэрзянь культурати. Уленди и стане, што, няемок мокшень щамса наряжаф някать, лятфнесазь, што, тяфтама наряд няйсть бабаснон или щаваснон ширеса велеса улемстост. Родной кяльти, мокшэрзянь щапненди, ламоц илатненди лемтьф занятиятне ётнихть фкя ваймоса. Стирнятне и цёранятне морафнихть мокшень и эрзянь кяльса стихт, морсихть морот, тиендихть национальнай орнамент мархта поделкат… Татьяна Ивановна сонцьке сидеста наряжакшни мокшавакс.
Воспитательсь фалу касфнесы квалификациянц, ётни профессиональнай одукс аноклама (переподготовка), нолясыне тевс тячиень шить вешфксонзонды отвечай программатнень.
Мокшавать мирдец, Владимир Михайлович, мокшаля. Макеефнень кудса фалу кайги родной кяльсь, ванфтовихть коеньке-обуцяньке.
«Кда ломанць мокша, мезське мзярдовок аф шоряй теенза содамс родной кяльть и корхтамс мокшекс»,—мярьгсь Татьяна Макеева.
Мирттнень-рьвятнень цёрасна, Владислав Владимирович, рьвяяф. Рьванц мархта тиезь Владимир Михайловичень и Татьяна Ивановнань павазу атякс и бабакс, «каземок» теест уноконя.
Владислав Макеев тонадозе шачфтыензон-касфтыензон эзда мокшень кяльть. Шарьхкодьсы сонь и Иванга.
Татьяна Ивановна пяк кельгсы пидеманц-панеманц. А мирденцты, валонзон коряс, васенце вастса ащи солянкась.
Мрдамок работанцты, мокшавась мярьгсь, што теенза савсь покодемс аф фкя вастса, но идень садса воспитателькс улемась тусь мялезонза эстокиге. «Эрь иднясь—тя ваноманя, конань эса няевихть оцю ломаттнень прянь вятемасна, тевсна. Сяс тейне тиендема сембось, штоба ня тефне улельхть аньцек цебярьхть, парс тонафтыхть»,—мярьгсь воспитательсь. И теенза тя удаласи.
Татьяна ВЛАдимирова.