Андрей Андреевич Барашкин содаф ламотненди «Мокшень стирьхне», «Колма вармат», «Марса», «Ськамон» и лия моротнень коряс. Мокшень алясь сонць тяшти музыка и валхт моронзонды. Ушедозе кинц «Торама» фольклорнай ансамбльса, мзярда сянь нинге вятезе В.И.Ромашкин. Сяльде пцтай 15 киза морсесь «Умарина» моронь и кштимань Мордовскяй государственнай ансамбльса. Тяни Андрей Андреевич работай Инсарскяй Культурань кудса, вяти занятият шабатненди.
Тядде «Од вий» тяниень пингонь национальнай моронь фестивальса «Марса» моронц инкса мокшалясь сявозе васенце вастть «Вокал: авторское исполнение» номинацияса. Сембе моронза, конат арасть мокшэрзянь эстрадань хитокс, тяштьфтольхть кунара. «Мокшень правдань» корреспондентть мархта корхнемста Андрей Барашкин виденцясь, што аноклай од мора, конань курок няфтьсы «Шумбрат, Мордовия!» народнай творчествань республиканскяй фестивальса.
Сон кассь семьяса, коса кородозь ванфтовсть койхне-обуцятне. Шабакс пингстокиге кулендезе, кода морасть тядянза-алянза. Шачсь-кассь Инсарскяй районца Верхняя Лухма велеса. Барашкиттнень семьясна тушендсь Мордовияста Дальняй Востоку, эрясь Амурскяй областьса. Тоса Андрей морсесь и кштишендсь идень садса, якась музыкальнай школав гитарань классть коряс, морсесь Культурань кудть видеса вокально-инструментальнай идень ансамбльса, сяльде—школаса и стак тов. Андрей Барашкин нинге шабакс содазе, што сотсы эряфонц морамать мархта.
«Тядяне-аляне ашезь сода, коза срхкан поступама. Монць кочкайне документонень, молень училищав и поступань экзаменфтома. Эрявсь морамс 4 морот, кулхцондомазь, меле директорсь мярьгсь, што мон поступань,—лятфнесы А.А.Барашкин.—Аф маштан моронь тяштема ши, недяля, ков. Кда ушедан, валхнень тяштьсайне 20 минутаста, эстокиге лангозост арьсеса музыкать».
Андрей Барашкинонь творческяй киц ушедсь 2000 кизотнень ушетксста «Колма вармат» мороть эзда. Мзярда ульсь студентокс, кулхцонкшнезе Мордовия Республикань Заслуженнай артистть, мокшалять Н.Н.Балашкинонь бардовскяй мора мархта альбомонц. Андрей ушедсь морсемост ня моротнень училищаса, общежитияса крыленця лангса. Кепотьксонди, «Колма вармат» мороть содазь фкя группаса тонафни сембе ялганза, конат национальностьс коре ульсть и руст, и татархт, и мокшет, и эрзят. Сяльде нинге аф пяк содаф морайсь сась мяльс тиемс бардовскяй мороть тяниень пингонь обработкаса, тя тевса теенза лездсь Дмитрий Четыркин. Тячиень шити сонь аранжировкасонза «Колма вармат» морось кайги Россиянь ламонц региоттнень эса.
«Мзярда ушедан моротненди валонь тяштема, инголен бта эвондай художественнай кино. Кепотьксонди, «Марса» мороть сёрмадомста сельминголен ульсть мокшень мазы стирьхне, тяста и строчкатне—«менельть лангста тяштенят пилькнень алу марамс». Морось лемдеви сембе мокшень стирьхненди»,—азонды Андрей.
Тяниень пингть Андрей Барашкин работай шабатнень мархта эсь шачема-касома вастсонза—Инсарскяй районца. Иднянь аф оцю коллективть мокшень алясь кочказе Инсаронь кафта школаста. Аноклайхть эстраднай морот илатненди, а стане жа мокшень и рузонь кяльса народнай морот. Сонць А.А.Барашкин корхтай, што ули оцю мялец тяштемс мокшень мора иттненди.
Ламотне содасазь Андрей Барашкинонь кода Андрей Мокша. «Тяфтама лемсь педсь тейне, мзярда тонафнень Саранскяень Культурань училищаса васенце курсса. Фкя цёрась юкстазе, кода лемозе, но содазе, што национальностьс коре мокшан. Ушедсь тейне тяфта и мярьгома—мокша, мельганза марнек группась, преподавательхне»,—сяда тов азондсь Андрей Андреевич.
«Аф маштан эряма сценафтома. Отпускста недяляда лама морофтома аф кирдян. Велеса перень тефнень пингста сявондян гармония и ушедан морсема. Тяфта ваймосян. Лиякс аф няйса эряфозень»,—шумордазе А.А.Барашкин.
О.Белкина.