МОКШЕНЬ ПИМБУРТЬ ШНАМА ЛОМАНЕЦ

Мзярда-бди Зубово-Полянскяй райононь Мокшень Пимбур велесь пяк оцюволь. Ламоль шабада, од ломаньда. А тяни сон кирди пенсионерхнень вельде.
Сембе эряфоц Мокшень Пимбурть мархта сотф и Н.А.Пудинать. Сон — Мордовия Республикань культурань Заслуженнай работник, вов ни 40 киза вятьсыне велеса клубонь тефнень.
—Эсь тевозень кельгса,—виденцясь Надежда Алексеевна.—Кда афолине кельге, тняра пинге афолень и покоде.
Видец мокшавать. Тевонь аф кельгозь тняра пинге афолеть покоде.
Эряфсь аф ащи фкя вастса, аськоляй инголи. Ётай веконь кафксогемонце кизотнень кучкаста, мзярда Надежда Алексеевна ушедсь трудендама, ашельхть аф компьютерхт, аф сотовай телефотт. Но ломаттне эрясть, тяфта жа ётафнесть мероприятият, якасть морама. И сембось аф кальдявста лисендсь. Тяни тефне ащихть ёфси лиякс. Надежда Алексеевнавок старандай аф лядомс пингть вешфксонзон эзда. Эсь работасонза нолясы тевс компьютерть, мезьсовок аф лядонды культурань од работникнень эзда. Ванат лангозонза и седице кенярди. Конашкава сон отькорь, машты кядь ломань. Кона тевти тяза кярьмоде, тисы моразь. А тевдонза клубонь азоравать пяк лама. Ётафни илат Мокшень Пимбурса. Якай илас Зубово-Полянав, Саранскяи. Велеса синцень фольклорнай ансамбльсна, конань лемоц «Сиянь толня». Тя ансамбльть мархта ков аньцек ашезь яка морама. И фалу ломаттне васьфнезь пяк цебярьста. Сонцень Надежда Алексеевнань зрняннет кяденза. Сафтсы стамаса, пидемаса-панемаса. Фкявок илац ашезь ётне пачафтома. А кодама цебярь и мазы кептернят кодай. Тяддевок тя асу, машты кядь авась дивандафтозень «Шумбрат, Мордовия!» Республиканскяй народнай творчествань фестивалень-пялькстомань ваныхнень.
—Азондода тя ару вайме, ляпе седи мокшавать колга эсь кяльсонк лисенди газетаса,—эняльдихть Мокшень Пимбуронь эряйхне.—Сон минь пшкядема, надияма вастоньке. Сембонди лезды, киндивок аф атказай.
И тя виде. Срхкай Надежда Алексеевна тев мельге Зубово-Полянав, фкять соцзащитаса тевоц, омбоцесь мезевок лавкаста рамафты, колмоцеть коммунальнай услуганза пандомат.
—Надюша, лезтт,—эняльдихть сиренятне. И Надежда Алексеевна лезды, киньге эняльдеманц аф нолдасы пиле вакска.
Тяниень ламоц велетне кирдихть эряфкшу ломаттнень вельде. Кулы сиренясь, а тевонь якафтыец аш. И пяк пара, што улихть Пудинать лаца ломатть, сявсазь тя тевть эсь кядезост.
—Сюкпря. Надежда Алексеевнанди кемонень-крда,—корхтайхть велеряйхне.—Пароцка аф пандови мзярдовок. Сняра цебярь сон тии ломаттненди.
Н.А.Пудина тяни эряй ськамонза. Ковидть пингста кулось кельгома мирдец Юрий Иванович. Сон водителель. Ладязь и кельгозь эрясть лама киза. Оцю кельгомаса шачфтозь и касфтозь эсь стирьснон. Наталья эряй Галицинаса. Сонцень семьяц, эряма вастоц. Касфтыхть кафта шабат. Аф сидеста, но сашендыхть Мокшень Пимбуру.
—Мзярс сатыхть вийне, карман трудендама,—корхтай Надежда Алекеевна.—Клубфтома велеса ёфси аш кода.
Илья ВЕШКИН.
Снимкаса: Н.А.Пудина.