Ковылкинскяй райононь Сире Драка велеса эряйхть мокша ломатть. Синь старандайхть ванфтомс сире пингонь койхнень-обуцятнень, культурать. Вдь синь пцтай юксневихть. И пяк пара, мзярда велеса муви стама ломань, кона сембе виензон путнесыне сянкса, штоба сире пингонь койхне-обуцятне ванфтовольхть.
Сире Драка велеса тяфтама ломанькс лувондови Татьяна Петровна Палаевась, кона вов ни лама киза стакшни мокшень панархт, сапонят, ёмла ожнаняста котци крганят, тиенди ашкоркст, сёкт. Сембе содасазь, кодама мазы мокшень щамсь! Сон фалу салси мяль эсь мазышинц мархта. Мокшень щамса наряжакшнихть оцю илатнень пингста. Мокшавась макссесы сембе седиень лямбонянц тяфтама тевти.
Шачсь-кассь Татьяна Петровна 1947 кизоня колхозниконь семьяса. Аляц, Пётр Васильевич, войнаста самда меле работась трактористокс, а тядяц, Марфа Алексеевна, покодсь колхозса эрь-кодама тевса. Татьяна Петровнада башка семьясост ульсть нинге колма стирьхть: Марфа, Лиза и Дуся. Татьяна Петровнань идькс пингоц ульсь аф тёждя: семьяса сон ульсь омбоце шабакс, сяс и савсь теенза ваннекшнемс ёмла сазорнянзон, якамс тядянц вастс паксяв работама. Сире Дракань школать аделамдонза меле лиссь рьвакс тяка велень цёрати Фёдор Палаевонди. Мирденц мархта касфтсть ниле итть: колма цёрат и фкя стирь. Ужяленди, мирдец аш ни шиса. Цёрасна Пётр, Виктор и Александр эряйхть Саранскяйса. Синь синцень семьясна, идьсна. А Нина стирьсна лядсь эсь велезонза. Нина Фёдоровна покоди Сире Дракань школаса заведующайкс.
Мокшавась сембе эряфонц лемдезе велень хозяйствати.
Татьяна Петровна казьф «За трудовое отличие» медальса, Почётнай грамотаса и Благодарственнай сёрмаса.
Аф кунара Татьяна Палаевась ушедсь мокшекс наряжакшнема някат. Сон синь явондсыне мала и содаф ломанензонды. Лама панар и сапоня макссь школав, казсь мокшекс наряжаф някавок.
Арьсетяма Татьяна Петровнанди кеме шумбраши и паваз!
Антонина ИВАНОВА.