Моску ошса эряй мокшень стирть Анна Атякинать мархта васедеме Кочкуровскяй райононь Вирь алдонь Тавла велеса «Кулдор-калдор» рахсемань-сингорямань Межрегиональнай фестивальть пингста. Стирсь наряжафоль мокшень паляса—афкуксонь мокшаваня. Сяс, улема, и арьсень, што сон Мордовияста, а столицав тусь тонафнема, кода и ламоц лия од ломаттне. И конашкава дивандань, мзярда содайне: Москуса шачсь-кассь аф аньцек сонць Анна, но и тядянзовок-алянзовок. Стирсь, кода корхнихть, москвичка колмоце поколенияса ни. Шачемас коре Мордовияннет щятяц и щавац Николай Александрович и Нина Николаевна Кулькофне. Синь мзярда-бди кадозь шачема Сейтяновка велеснон Ковылкинскяй районца и тусть эряма оцю ошу. Тоса ни шачсь стирьсновок—Аннать тядяц. Но, аф ваномок мезеньге лангс, Кулькофненди аф аньцек удалась ванфтомс кяльснон и кельгомаснон минценнети, мокшеннети, но и максомс тянь семботь идьснонды и унокснонды. Анна идькс пингстокиге ётафнезень кизонь каникуланзон Мордовияса, щаванц и щятянц шачема велесост. А сяс стирсь лац шарьхкоди мокшекс и цютькада корхтамовок машты.
Кода ни азфоль, васедемстонк А.Атякинась и ялгацка Е.Пушкаренко щафтольхть мокшень щамса. Содавсь, што максозень синь Аннать щавац—Нина Кульковась. Нина Николаевнань лама мазы щамдонза. Стакшнесыне теенза сазороц, кона стане жа эряй Москуса. Стакшинь палятнень аватне щакшнесазь сяда сидеста, мзярда сашендыхть шачема велезост. А вов иланнеса, пиндолды котфста стафса, Москусонга наряжакшнихть. Васендакиге, мзярда яксихть столицань мокшэрзянь землячествать эрь кодама илазонза. Тоса синь васетькшнихть-корхнихть фкя-фкянь мархта тядянь-алянь кяльса, морсихть сире и тяниень пингонь морот. Аннавок кой- конатнень содасыне.
—Щятязе фкя пингоня приметазе: кяльсь ушедсь юксневома. Эста сон кармась сяда лама лувондома мокшекс, кулхцонкшнесь мокшень морот и ванондсь видеороликт мокшень кяльса. Касфни мяль, мес тячи тяфтама видеороликта арси интернетса коль сяда и сяда лама. Монга мархтонза сидеста ванондсайне синь,—азозе Анна.
Стирть валонзон коряс, сонь фалу оцюволь мялец сяда лама содамс мокшэрзянь культурать колга. Анна вестевок ашезень юксне юронзон и апак визтть лемнесы прянц мокшавакс. А сяс, мзярда Москувонь экономикань высшай школаса, коса сон тонафни, састь мяльс ётафтомс эряфс мялень салай финно-угратнень культураснон мархта сяда лац содафтомать коряс проект, Анна, кода проектонь организатор, тердезень сембонь щавань-щятянь масторозонза—Мордовияв.
—Тя мяльсь эвондась прясонк апак учсек. Кода-бди весть минь пуромоме студентонь келеса и арьсекшнеме проектт внутренняй туризмать виияфтоманкса. Ётксонк ульсть стирьхть и цёрат удмуртонь, мариецонь, мокшень и эрзянь юр мархта. Тяфта шачсь «Т-Т-Т: автобусный тик-ток-тур по финно-угорским республикам» проектоньке. Турсь ульсь августста. Сембоц эсонза участия примась 30 студент. Минь кафта недялят турда инголе кулхцонкшнеме лекцият нароттнень культураснон колга и сянь квалма, кода тиендема видеоконтентсь. Ниле шиста содафтоме удмурттнень, мариецнень, мокшетнень и эрзятнень эрямань койснон, ярхцамбяльснон, мороснон-кштимаснон, щамснон мархта. И семботь тянь колга од ломаттне тисть видеороликт. Вельдест азондсть няйфснон колга ялгаснонды и подписчикснонды,—азозе Анна.
Мордовияса «Кулдор-калдор» фестивальда башка инжихне ванозь Саранскяйть, ульсть Мокшэрзянь подворьяса. Мордовияса сембось пяк тусь мялезост, а сяс сафоль мяльс поладомс проектть сай кизонявок. Эзонза сувафтовихть финно-угрань нинге лия региоттневок. Стирть пяк пара мялезонза, мес теенза удалась содафтомс ялганзон Мордовиять и мокшэрзянь культурать мархта. Сай кизоть сон нинге весть терди инжихть щавань-щятянь масторозонза. И сонцьке пара мяльса сай мархтост, штоба сядонга лама содамс эрь юронзон колга.
М.Стешина.