Сатомшка кунара ни арась цебярь койкс, мзярда мокшэрзянь народонь национальнай культурань илатне Мордовия Республикаса и Россиянь лия региоттнень эса, коса компактнайста эряйхть мокшэрзят, арсихть эсь илакс сембе лия народонь представительхненди, коса синь ётафневихть. Ламотне ня илатнень эзда, ушедомок эсь киснон районнай и региональнай серьста, курокста кассть-кеподсть межрегиональнай и Всероссийскяй уровеньц.
Нят—«Шумбрат», «Раськень озкс», «Акша келу» и лия лем ала национальнай культурань илатне, конат тячи келиста ётафневихть Россиянь пцтай эрь субъектса, коса эряйхть мокшэрзят.
Кода пачфтезе Пензенскяй областень мокшэрзянь региональнай национально-культурнай автономиять председателец Е.Г.Первушкина, тяддень 27 августста Сосновоборск посёлкаса васенцеда Межрегиональнай форматса ётафтовсь «Вастома» («Васедема») мокшэрзянь национальнай и профессиональнай культурань фестивальсь.
Межрегиональнай тя фестивальсь аноклафоль и ётафтовсь Пензенскяй областень Правительствать, Президентскяй грантонь Фондть и национальносттнень тевснон коряс Федеральнай Агентствать лезксснон вельде.
Фестивальса, кода азозе Е.Г.Первушкина, келиста няфтьфтольхть эрзянь, рузонь, татаронь и лия народонь национальнай и профессиональнай культурань сатфксне, ульсть Пензенскяй областень исполнительнай и законодательнай властень представительхть, культурань оцю делегацият Мордовия Республикаста, Ульяновскяй, Самарскяй областтнень эзда и Чувашияста.
Фестивальса ётафтовсть национальнай промыслань и ремеслань выставкат, национальнай ярхцамбялень анокламань-пидемань мастер-класст и дегустацият, «Мокшэрзянь шамат» ташта фотоснимкань, национальнай книгань и щамбялень выставкат.
Тёкшекс «Вастома» мокшэрзянь национальнай и профессиональнай культурань Межрегиональнай фестивальти арась концертсь. Пингстонза илас пуромфненди эсь искусстваснон няфтезь мокшэрзянь, рузонь, чувашень и татаронь народнай и профессиональнай 28 коллективсь.
Фестивальсь удалась сембе ширде!
В.НЕСТЕРОВ.