Мокшэрзянь книгатне—
Якстерь площадьса!

Тяддень 3-6 июньцта Москуса ётафтовсь «Якстерь площадь» Книгань VIII фестивальсь. Пингстонза странань 50 региононь 300 издательствась лихнесть фестивальс 100000 лама книга. Ётксост тяфта жа эсь вастонц мушендозе Мордовскяй книжнай издательствать продукцияц.
Кода пачфтезе тейнек сонь директороц, филологическяй наукань кандидатсь Р.И.Акашкина, «Якстерь площадь» Книгань VIII фестивальса лувихненди няфтевсть республикань писательхнень и поэттнень книгасна, конат сёрматфт мокшень, эрзянь и рузонь кяльса. Синдедост башка, лувихненди няфтевсть художественнай альбопне, коса азондови С.Д.Эрьзянь, Ф.В.Сычковонь и республикань лия содаф скульпторхнень и художникнень творчестваснон колга, а тяфта жа мокшэрзянь национальнай костюмть, койхнень-обуцятнень и ярхцамбяльть квалма.
Лувихнень мяльс тяфта жа тусь мокшэрзянь сувениронь выставкась, коса няфтевсть мокшень и эрзянь кяльса поздравляндамань открыткатне, Тавлинскяй някатне и лия налхкшне.
Кода азозе Р.И.Акашкина, Мордовскяй книжнай издательствать сембе продукциянц, кона ускфоль «Якстерь площадь» Книгань VIII фестивали, рамазь Москувонь и областень мокшэрзятне и лия лувихне. Тянкса эряви азомс седи ваксстонь сюкпря Российскяй Федерациянь Президентть видеса Мордовия Республикань постояннай представительстваса Мокшэрзянь культурань центрать директоронцты Л.В.Кругловати. Сон интернетонь ресурснень вельде тердезень Москувонь и областень мокшэрзятнень Книгань фестивальс. И синь кулезь сонь!
«Якстерь площадь» Книгань VIII фестивальса Мордовскяй книжнай издательствась тяфта жа кемокстась сотрудничествать колга договорхт странань финно-угорскяй и лия региононь издательстватнень мархта. Тяни Мордовскяй книжнай издательствать продукцияц кармай мишендевома тостонь издательствань фирменнай лавкаса, а синь продукциясна—Саранскяйса «Масторава» лавкаса.
Тяда башка, Мордовскяй книжнай издательствась нинге ёрай няфтемс эсь продукциянц книгань всероссийскяй выставкаса, кона маластонь пингть ётафтови Крым Республикаса.
В.Иосифов.