Од кизонь карша Мокшэрзянь национальнай драматическяй театрась кеняртьфтезень ваныхнень оцю премьераса. Калмыкияста саф режиссёрсь Борис Манджиев путсь мокшень драматургть Валентина Ивановна Мишанинать пьесанц коряс нинге фкя спектакль. Сонь лемоц «Менелень нюрям». Премьерась няфтьфоль театрать сценанц лангса 16 и 17 декабрьста.
Романтическяй историять лангса работасть башкирскяй балетмейстерсь Рамиза Мухаметшина, Уфаста щапнень коряс художниксь Наталия Степанова, Саранскяйста сценографсь Татьяна Чувыкина. Музыкать спектакльти сёрмадозе эрзянь музыкантсь Виктор Чичайкин, кона содаф Бакич Видяй псевдонимонц коряс.
«Менелень нюрям» народнай комедиясь—тя история кельгомать и аерксшить, патриархальнай закоттнень колга, конат арсихть перяфксокс павазонь кить лангса. В.И.Мишанинать пьесанц эса крхкаста панчфт мокшетнень рьвяямань, рьвакс тумань койсна-обуцясна, явсемасна и лия эсь лацонь ширетне. Ванысь бта шовори геройхнень ёткс, ваяй синь кенярдемаснонды-пичефксснонды и мархтост ётафтсы тя пингть.
Спектакльть ушетксста азондысь кошярясы ваныть арьсемс сянь колга, кода рьвяямань шись ётнесь инголи и кода ётни тяниень пингть. Кафта атятне Микиш (Тимофей Чудайкин) и Андю (Дмитрий Мишечкин) эрязь ни эсь эряфснон, лятфнесазь одкс пингснон. Андю, кона одста ашезь рьвяяв кельгоманц лангс, корхтай кельгомать колга, кода нюрямонь, кона максси ломанти пацят, лийфтсы ваймоть менельти… Ламотнень ваймосна стакшинь эряфть сюнеда валгихть меки модать лангс. А Андювонь ваймоц кодак кеподсь вяри, тозк и лядсь.
Мокшень стирть Коволнять (Евгения Акимова) аф эсь мяльс коре ёрайхть максомс рьвакс кяжи цёрати Тингайти (Максим Акимов). Кда «Ташта койса» постановкаса героинясь аф кирдьсы тя сталмоть и юмафтсы эсь прянц, то «Менелень нюрямть» эса Коволнясь муй вийхть тюремс эсь павазонц инкса. И кельгомась сяськи!
Мокшень драматургть народнай комедияц саласыне мяльснон кода эряфкшуфнень, стане и оттнень. Искусствать инь оцю целец—кошардомс ломанть варжакстомс эряфть лангс лия ширде.
Мордовскяй (мокшень и эрзянь) народонь Межрегиональнай общественнай организациять председателец Ю.А.Мишанин мярьгсь: «Пяк пара, мес ули Национальнай театраньке. Сонь актёронза содафт марнек Россияса. Сюконятама теенть марнек Россиянь мокшетнень и эрзятнень эзда!»
«Мзярс эряй ваймоса шачема модати кельгомась, снярс кармай эряма тя ломаньтналсь, кармай эряма…»—тяфтама валса шумордави «Менелень нюрям» спектакльсь.
О.Белкина.