Атерь аймаконь Крхтаж велень мокшень стирсь Наталья Мелёшкина мзярдовок ашезь арьсекшне сянь колга, што эряфонь киц пачфтьсы сонь оцю искусствати. Шачсь учителень семьяса. Тядяц, Тамара Матвеевна, шачсь Зубово-Полянскяй районца. Вузонь аделамда меле сась покодема Крхтажень школав. И пцтай нильгемонь киза вятсь шабатненди рузонь кяль и литература. Тяни сон пенсияса. Но школать аф юкснесы, кирди мархтонза соткст. Тернесазь илас педагогическяй трудонь ветеранть сидеста и сон сашенды, мзярдовок аф атказакшни.
Аляц, Николай Васильевич, стане жа покотькшнесь школаса, велень хозяйстваса. Цёрасна, Николай Николаевич, эряй Москуса.
Цебярьста ладявсь эряфоц Наталья Николаевнань. Шумордазе Крхтажень средняй общеобразовательнай школать. Поступась тонафнема Н.П.Огарёвонь лемса МГУ-нь историко-социологическяй институту. Вузть аделамдонза меле лиссь рьвакс. Мирдец, С.Д.Челмакин, полициянь подполковник. Кафта идьсна: стирьсна и цёрасна. Цёрасна колмоце курсонь студент. Тонафни Н.П.Огарёвонь лемса Мордовскяй госуниверситетонь электроннай техникань факультетса информационнай безопасностень направленияса. Наталья Николаевна 2002 кизоста сявомок трудендай С.Д.Эрьзянь лемса изобразительнай искусствань музейса. 2014 кизоста сявомок вятьсы декоративно-прикладной искусствань фондонь отделть. Лама тиенди мокшэрзянь костюмонь коллекциять ванфтомаса, тонафнемаса, ломаттненди няфнемаса-азонкшнемаса. Сон экспозиционер, выставкань куратор, проектонь вяти. Покоди фондонь кочкамать, каталокнень мархта. Трудендай Российскяй Федерациянь Государственнай каталогонь сайтть мархта. Наталья Челмакина декоративно-прикладной искусствань залонь экспозициянь научнай автор. Сонь вельденза тиевсь экспозициянь художественнай образсь, кона панжезе мокшэрзянь народть самобытнай материальнай и духовнай культуранц. Музейса покодемань козя опытоц лездсь ётафтомс эряфс традиционнай культурать ванфтомаса, кеподемаса аф фкя проект. Аф весть лисендсь сяськикс «Музей без границ» благотворительнай пялькстомаса. Грантса добуваф средстватне лездсть пуроптомс шаржу пингонь артефакттнень эзда сявомок тячити самс мультимедийнай вебресурс, нолдамс «Мордовский костюм: вышивка, ткачество, бисероплетение» лем ала научно-популярнай издания. Нолдафт лия изданият, проектт. Ня проекттне пяк лездыхть кемокстамс и касфтомс музейть имидженц, культуранц, кеподемс креативнай и актуальнай форманзон. Сембонди тянди оцю питне макссь профессиональнай сообществась. Мокшэрзянь костюмти лемтьф книгась лиссь сяськикс «2022-2023 кизонь инь цебярь книгась» пялькстомаса «Этногроафия. Этнология. Фольклор» номинацияса. «Звуки и краски мордовского костюма» проектсь арась финалистокс Д.С.Лихачёвонь лемса музеень тевса, сявомок васенце национальнай премиять. Проекттнень эряфс ётафтомаснон колга азондови Владимир Потанинонь благотворительнай фондсонза.
Наталья Николаевна аф кельгсы фкя вастса ащеманц, фалу вешенди одня эсь тевсонза. Ётафни тематическяй мероприятият, экскурсият, луви лекцият. И аф аньцек рузонь, но и мокшень кяльса. Старандай аф юкснемс иттнень, од ломаттнень. Корхтамась моли «Эрьзянь пингоц», «Мазы тюс», «Содак эсь кяльцень» и лия илатнень колга. Тяниень пингонь технологиятне пяк лездыхть мокшавати кочкамс сяда оцю аудитория. Социальнай сетьтнень эса вяти группа мокшэрзянь народть культуранц колга. Сон книгань автор.
Наталья Челмакинась лама оцю выставкань проектонь автор, региональнай, российскяй и международнай конференциянь, фестивалень, культурнай программань и форумонь участник. Нят «Интермузей-2025 (Моску), «Музей гид—2025» (Моску), «Тяниень пингонь костюмть дизайнанц традиционнай этническяй мотивонза (Казань), «Музейсь и эпохась» (Санкт-Петербург), лият.
Наталья Николаевна вяти оцю общественнай работа. Аф аньцек сонць аноклакшни, ётафни мероприятият, но и примси участия лия илатнень эса. Сувси мокшэрзянь народть Межрегиональнай общественнай организациянц исполнительнай комитетозонза, МР-нь Правительствать видеса народнай художественнай промыслань Совету, кирди кеме соткст республиканскяй газетатнень, телевидениять, радиоть мархта, аноклай мокшень кяльса анонст музейса ётафневи выставкатнень, лия илатнень колга. Аф юкснесыне общественнай организациятнень, лия музейса покоди ялганзон, эряфс ётафнесазь марстонь проектснон. Оцю и пяк эрявикс работа вяти и эсь отделсонза, тиенди цебярь условият сотрудникнень профессиональнай ширде касомаснонды, лезды синь творческяй ушеткссост. Отделсонза покодихне ётасть стажировкат, творческяй работаснон мархта примасть участия выставкатнень эса, грантонь пялькстомаса арасть сяськикс.
Трудс коре и казнетневок. Лац покодеманкса мокшавась казьф Мордовия Республикань Государственнай Собраниянь, Правительствань, Культурань, национальнай политикань и архивнай тевонь министерствать Почётнай грамотаснон мархта, Республикань Оцюнять Благодарностьса. 2024 кизоня теенза максф «Культурань Заслуженнай работник» почётнай лемсь.
Крхтаж велень средняй общеобразовательнай школаса, коса сон тонафнесь кефкие киза, ули стенд, кона азонды велеть содаф ломанензон колга. Афоль шоря тя уженяти путомс и Наталья Челмакинать фотографиянц.
Илья Вешкин.