Мокшэрзятнень сюреса сёрмадомасна арси сядонга содафокс

Арьсян, ламотне кулендсть Мордовия Республикань Старошайговскяй райононь инь сире мокшень велетнень эзда фкять—Сире Теризморгать колга. Кда шарфтомс мяль историческяй уликс источникненди, эсост азф, што Сире Теризморгась эвондась XVI векть омбоце пялестонза. Велесь ащи Сивинь ляйть кержи трвасонза, конань кувалмова ускови ниле вайгяльбес.

Сире Теризморгать кунара ни лемнесазь мокшень кялень и мокшэрзянь литературань, культурань, моронь, национальнай щамонь, коень-обуцянь ванфты уженякс. Тяса пцтай сембе эряйхне мокшень ломатть и тянкса синь маряйхть гордость!
Мордовскяй ССР-нь народнай депутаттнень Старошайговскяй районнай советснон исполнительнай комитетонц 1992 кизонь 4 февралень решениянц коряс, Сире Теризморгаса панчфоль национальнай культурань центра. Тифоль тя мокшэрзятнень моронь творчестваснон виияфтоманц и сядовок цебярькс тиеманц, мокшень фольклорть, койхнень-обуцятнень, илатнень, народнай щапнень и прикладной творчествать ванфтомаснон инкса. Национальнай культурань центрати панжемдонза меле директоркс путфоль мокшавась-патриотсь, оцю и почётнай лама лемонь каннись Нина Михайловна Кадерова.
2018 кизонь 9 февральста сявомок национальнай культурань центраса директоркс покоди мокшавась Светлана Александровна Видясова. Валонзон коряс, центрав сашендыхть инжихть кода Россиянь ламоц уженятнень эзда, стане и омба масторста. 2012 кизоня национальнай культурань центрась арась лауреатокс «2012 кизонь клубнай инь цебярь учреждениясь» Республиканскяй смотрать-конкурсть «Инь цебярь национальнай центрась» номинациясонза.
Кда корхтамс национальнай культурань центрать сатфксонзон колга, эста ули мезе пачфтемс. Кепотьксонди, «Золотые кружева России-2021» идень прикладной Всероссийскяй конкурсть I степенень лауреатонц Дипломонц сатозе «Бабазень арзяняц» кружокти якайсь Ольга Живайкина. Кружокть руководителец А.И.Цыганова. Жюрись макссь оцю питне «Някать лангс авань свадьбань костюмть моделированияц» работанцты. Тияк О.Живайкина няфтезе маштомошинц и асушинц карксонь кодамаса, сюреса сёрмадомаса, мазоптомань тиемаса-анокламаса.
О.Живайкинать и А.И.Цыгановать лятфтайне аф стак. Сире Теризморгаса пцтай эрь кудса маштыхть аф аньцек морама, но и мазыста сюреса сёрмадома и кодама. Сяда эряфкшу ломаттне тянди тонафнесазь од аватнень и стирьхнень. И сидеста тянь тиендьсазь национальнай культурань центрать видеса работай кружокнень вельде.
Аф кунара Мордовия Республикань Старошайговскяй муниципальнай райононь «Национальнай культурань центра» культурань муниципальнай бюджетнай учрежденияв (ламотне сонь лемнесазь Сире Теризморгань центракс) сась кеняртьфти куля—центрать «Живое древнее искусство. Старинные мокшанские орнаменты» проектоц сяськсь культурнай инициативатнень Президентскяй фондснон Грантонь конкурссонза!
«Тяддеть ушетксста, январьста, ширесонк ульсть Мордовия Республикань Оцюнясь А.А.Здунов и Культурнай Инициативатнень Президентскяй Фондснон руководителец Р.В.Карманов. Содафтоськ синь культураньконь сембе ширензон мархта. Мялезост пяк тусь Центраньке, но башка мяль Р.В.Карманов шарфтсь Сире Теризморга велень кунардонь пингонь сюреса сёрматкснень лангс, конат кочкафт альбомс. Ламос ванондсь эсост, а сяльде мярьгсь: «Тинцьке аф шарьхкодьсасть, кодама козяши кядьсонт. Аньцек фкясь пичефти: а кда юмайхть ня альбопне, кда толса палыхть или саласазь? Ня сёрматфне—культурань кодонте, синь тяникиге эрявихть «араламс» сембе ширде».
Тевти кярьмодсть Мордовия Республикань Оцюнясь А.А.Здунов, МР-нь культурань, национальнай политикань и архивнай тевонь министрсь С.Н.Баулина. Ня ломаттне пяк пичедихть культураньконь вандыень шинц инкса. Синь лезксснон вельде араме сяськикс. Центрань сотрудникне, и, васендакиге монць, азонттама лямбе валхт и оцю сюкпря теест, мес верондайхть тейнек и надияйхть лангозонк»,—мярьгсь С.А.Видясова.
Целайнек творческяй тя проектсь арьсеф мордовскяй (мокшень) народть культурнай козяшинц и сонь коензон, конат няфтьфт традиционнайста сюрень сёрмадомаса, пуромкснень ётафтомаснон и эрявикс материалхнень анокламаснон вельде сядовок содафокс тиемаснон инкса.
Проектсь мольфтеви ни национальнай культурань центрать, кона Сире Теризморга велеса, сотрудниконзон мархта кочкаф мокшень кунардонь орнаменттнень и сюреса сёрмадомать узоронзон коллекциянц коряс.
Сатф Грантть лувксоц пцтай кемонь миллиотт цалковай.
Синь карьхцявихть Сире Теризморга велеса сюреса сёрматф образецнень тонафнемаснон и ванфтомаснон коряс научно-исследовательскяй тевть пуроптоманцты и ётафтоманцты, мокшень тя велеса сюреса сёрматкс и орнамент мархта образецнень цифровой архивснон, сюреса сёрмадомань и национальнай мокшень щапнень-каряпнень мархта видеофильматнень тиемаснонды. Нинге арьсекшневи анокламс и нолдамс Сире Теризморга велеса сюреса сёрматкс и орнамент мархта каталог, арьсемс эскист и тиемс стилизованнай костюмонь коллекция, конанди «седи куцюнякс» арай Сире Теризморгаса сюреса сёрмадомась. Тяда башка, Сире Теризморгаса национальнай культурань центрать видеса панжеви креативнай мастерской и стак тов.
«Живое древнее искусство. Старинные мокшанские орнаменты» проектть вельде ломаттне содафтовихть Старошайговскяй райононь Сире Теризморга велень мокшень орнаментонь сюреса сёрмадомать мархта. Проектсь арьсеф атянь-атяньконь койснон вельмофтемаснон инкса.
Оцю мяльса содафттядязь центраса покодихнень мархта. Проектть руководителец—Старошайговскяй муниципальнай райононь «Национальнай культурань центра» культурань муниципальнай бюджетнай учреждениять (самай тяфтама лем канни Сире Теризморгань центрась) директороц С.А.Видясова.
Светлана Александровна тя организацияса работай несколька киза. Валонзон коряс, центраса покодихне и сон, кода руководитель, васенце тевкс лувсазь пуроптф духовнай козяшить ванфтоманц, виияфтомац и од поколенияти максоманц. С.А.Видясова надияй, што проектсь лезды тянь тиемс.
Кода азфоль, проектти результаттнень эзда фкясь кармай мокшень узоронь-орнаментонь, сюреса сёрмадомать коряс каталогонц нолдамац. А тянкса ётафтома орнаменттнень тонафнемаснон и синь няфтемаснон коряс оцю работа. Сяс научнай руководителькс проектти кочкаф этнографсь, Мордовия Республикань нароттнень традиционнай костюмснон, мокшэрзятнень сюреса сёрмадомаснон исследовательсна, И.Д.Воронинонь лемса Мокшэрзянь краеведческяй музейть этнографиянь отделонц заведующаец И.Н.Кудашкина.
Сире Теризморга велень мокшень щапнень орнаментсна, конатненди тиеви оцифровка, арайхть «Масторланга» этнокостюмть коллекциянцты пуроптома вастокс. Сонць коллекциясь кармай ащема авторскяй оригинальнай щапнень эзда, конатнень эса кемоста сюлмавихть ётай, тяниень и сай пингсь. «Масторланга» этнокостюмть коллекциянц руководителец—Мордовия Республикань культурань Заслуженнай работниксь, Мордовия Республикань Государственнай премиянь лауреатсь, культурологиянь кандидатсь, «VARMA» Этно-Арт-Театрать руководителец Т.Н.Сидоркина.
«Живое древнее искусство. Старинные мокшанские орнаменты» проектть мяльса кирдезь, арьсекшневи ётафтомс 20-да лама мероприятия—рабочай васедемат, мастер-класст и стак тов. Проектти итогонь тии пуромксокс арай «Живое древнее искусство» форумсь, кона ётафтови Сире Теризморгань национальнай культурань центраса.
Проектть мероприятиянзон координаторсна—И.Д.Воронинонь лемса Мокшэрзянь краеведческяй музейть музейнай виияфтомань отделть заведующаец, «Волонтёры культуры» Всероссийскяй общественнай движениять Мордовскяй региональнай отделениянц руководителец, «Ресурсный центр «Волонтеры культуры Мордовии» АНО-ть директороц Т.Н.Червячкова.
Культурнай инициативатнень Президентскяй фондснон ширень кирдеманц вельде эряфс ётафтови проектсь мольфтьсы ни эсь работанц.
Пцтай шумордаф каталогть лангса работать васенце пяльксоц: сканировандаф альбопнень эзда сюреса сёрмадомань 318 образецсь. Тиема идентификация эрь фрагментти. «Бабазень арзяняц» кружокть руководителец А.И.Цыганова, кона пяк лац содасы сюреса сёрмадомать, кячкаскаса, бердоть и доскатнень лангса кодамать, азондозень термиттнень, конатнень нолясазь тевс сюреса сёрмадомста Сире Теризморгань машты кядь мокшаватне. Теенза лездсь Сире Теризморгань Народнай хорть художественнай руководителец В.П.Ямашкина. Башка мяль шарфтфоль панарти, конань Анна Ивановна стазе и сюреса сёрмадозе эстеенза.
Т.АЛЬШИНА.

Последние новости

В Мордовии открылись новые благоустроенные зоны отдыха

В Мордовии в этом году открылось сразу 7 новых...

Благодаря нацпроекту малый и средний бизнес Мордовии получает господдержку

Министерство экономики, торговли и предпринимательства РМ совместно с Центром...

В Ичалковском районе приводят в порядок 14 км дорог

В Ичалковском районе Мордовии по национальному проекту «Безопасные качественные...

Нацпроект помогает бизнесу Мордовии стать узнаваемым и привлекать новых клиентов

Министерство экономики, торговли и предпринимательства РМ совместно с Центром...

Дан старт приемной кампании по программам «Профессионалитета»

В Мордовии начинается приемная кампания в колледжи и техникумы...

Нацпроект помогает семейному бизнесу Турбиных из Мордовии 

Министерство экономики, торговли и предпринимательства РМ совместно с Центром...

В Мордовии модернизируют службу занятости

Мордовия вошла в число пилотных регионов комплексной модернизации службы...

В Мордовии открылись новые благоустроенные зоны отдыха

В Мордовии в этом году открылось сразу 7 новых пляжей. Средства на их благоустройство были предоставлены предпринимателям республики в качестве грантовой поддержки. Работы велись...

Благодаря нацпроекту малый и средний бизнес Мордовии получает господдержку

Министерство экономики, торговли и предпринимательства РМ совместно с Центром «Мой бизнес» оказывает поддержку предпринимателям Мордовии. Так, благодаря реализации национального проекта «Малое и среднее предпринимательство...

В Ичалковском районе приводят в порядок 14 км дорог

В Ичалковском районе Мордовии по национальному проекту «Безопасные качественные дороги» в 2024 году будет капитально отремонтировано порядка 14 км дорог. В мае начались работы на...