Кунардонь пингонь велень эряфть колга мокшень классикнень произведенияснон лувомста сидеста васьфневи «сумання» валсь. Щашендозь сонь аванек-алянек, сиренек-однек. Мезе ся стамсь суманць, кодамоль сон лангс ванозь? Кие тяни мяляфтсы? Кда аньцек эряфкшу ломаттне. Суманць—тя лангань лямбе щам. Ташта фотографиятнень эса мокшаватне и эрзяватне няфтьфт мазы панарса, нуласа, сапоня-са и стак тов. Ланга щапт шуроста няят. А вов алятне, меколанкт, шнафнесть пря суманьцнон мархта. Улема, тяни минь лемделеськ суманть пальтокс.
Суманть щашендозь тунда и сёксенда, а стане жа кизонь кельме илядня. Сташендовсь сон кодаф эчке сукнаста—понань котфста. Кой-коста потма ширде лямбонди стакшневсть кедняса. Суманць сяда сидеста шобда тюссонель. Содаф этнографсь В.Н.Белицер, кона лама пинге макссь мокшэрзянь щапнень исследованияснонды, сёрмадсь суманень колма видонь колга. Суматть сташендсть виде копорня мархта, кона ащесь сукнань фкя оцю или несколька ёмла пяльксста, керф копорня и карксэземть лангса срмафкскя мархта, и суматть, конат сташендовсть карксэземть видеса бокова и фталда ицькол мархта. Сембе синь кувака ожатольхть, пунксневсть кержи шири крючокс и пуняс. Аф оцю стяда ащи сивось стакшневсь аньцек фталу.
Виде копорь суманть стамац сяда тёждяль. Учёнайхнень арьсемаснон коряс, сон сяда кунардонне. Белицер ульсь мокшэрзянь крайса 1950-1960 кизотнень, эста виде копорь мархта суматть нинге каннекшнесть Атерь аймакса. Срмафкс мархта щамсь эста васьфневсь сяда лама вастова. Сонь каннезь мокшетне и эрзятне кода Мордовияса, стане и шабра региоттнень эса. Срмафкснень инкса ломаттне лувондозь суматтнень сяда мазыкс. Эряви азомс, тяфтама щамсь сяда питниель, сяс мес стамстонза тушендсь сяда лама сукна. Алятне каннесть ицькол мархта суматть. Кепотьксонди, Зубу аймакса тяфтамот щакшнесть аватневок. Суманть карксакшнезь пиже или якстерь кушакса, тиендсть сюлма. сюролданя мархта петнень тонгондозь кушакть алу и меле нолязь бокнень эзга.
мокшень и эрзянь кой-кона велетнень эса аватне суманть мархта ряцок кизонда каннекшнесть нинге пониток. Сонь сташендозь подкладка лангса шобда тюсонь полусукнаста. Тя котфса основань сюретне иляназоннетольхть, а перьфкаст ашкорявсть понаннетне. Тя щамсь фталда карксэземда алга пяк лама срмафкс мархтоль. Эльть кувалмоц тиендсь 4,5-5 метра. Пунксневсь сон кафта пуня или кшнинь крючоконя вельде.
Ширеса эряй мокшетнень и эрзятнень васьфневсть нинге тяфтама щамсна, кода каратайка и куртка. Синь сташендовсть сумань лаца. Сонь кувалмоц плманжа видеваль или сяда алга, каратайкась ламода сяда нюрьхкяняль.
19-це векть песта, мзярда мокшетне и эрзятне лоткасть кирдемда оцю хозяйстват, ушедсть рамсексшнема фабрикань котфт-месть, кармасть эвондакшнема лангонь щапт. Кепотьксонди, нанкась. Сон ульсь кода сумання, потмоц стафоль ватаста, лангоц—котфста—нанкаста. 1920-1930 кизотнень тяфтама нанкаса яксекшнесть Зубово-Полянскяй райононь мокшаватне.
Тялонда мокшетне и эрзятне якасть орса, чапанца и тулупса. Орхнень сяда сидеста стакшнезь учань кедьста и срмафкс мархта. Сяда козя орнять элец алуда мазопневсь боранонь равжа понаса, сотнекшнелезь карксса.
Срхкамок ичкоздень кис, тялонда и сёксенда атяньке и бабаньке щашендсть чапатт—виде копорь мархта кувака щам. Сон тиендевсь кодаф эчке сукнаста шалькс ащи воротник мархта, кона лапиевсь эрь кодама пяли. Ульсть ломаттнень тулупсновок, сташендозь стане жа учань кедьняста, а кой-коста—нумолоннеста. Тяни теест мярьгихть дублёнка.
Тялонда алятне прясост каннесть понаста кевортьф шляпат, учань кедьста стаф васьть, аватне—руцят.