«МОКШЕТЬ ЭЗДА СУРАТИ МОЛЕМС» КАЙГСТЬ НАРОДНАЙ МОРОТНЕ

9-11 ноябрьста Мордовияса ётафтовсь «Мокшеть эзда Сурати молемс» морамань Межрегиональнай фестивальсь. Сон сувась «Народнай моронь декада» Всероссийскяй акцияти, кона лемтьф Культурань и искусствань кизоти. Сембоц фестивальса примась участия 29 народнай коллектив, фольклорнай ансамбль и исполнитель 8 региоттнень эзда. Мордовиянь артистта башка маштомошиснон няфтезь Калужскяй, Костромской, Нижегородскяй, Тамбовскяй областень, Коми, Удмуртия, Чувашия Республикань артисттне.

—Россиянь народсь козя мазы и вии вайгяльса. Эрь кодама аймакнень и региоттнень эса синцень морамань койсна. Кеман, што мялень салай тя проектсь лезды ванфтомс и вихонзафтомс национальнай морамань койхнень, кемокстасыне региоттнень творческяй коллективснон ёткса ялгаксшинь соткснень,—азфоль видеообращениять эса, конань кучезе фестивалень участникнень и ваныхнень лемс В.Д.Поленовонь лемса Народнай творчествань российскяй кудть директороц Тамара Пуртова.
Сонь валонзон коряс, «Народнай моронь декадань» мероприятиятне Саранскяйда меле поладовихть Ставропольса, Красноярскяйса, Майкопса и Оренбургса. Сембоц Россиять келес эсост примай участия тёжятть исполнитель.
«Мокшеть эзда Сурати молемс» фестивальть пингста творческяй коллектифненди и синь вятиснонды ётафтовсть народнай моронь морамаса маштомошить касфнеманц коряс мастер-класст. Лия региоттнень эзда саф инжихне содафтфтольхть мокшень и эрзянь морамань койхнень мархта. Синь ульсть Большеберезниковскяй и Старошайговскяй райоттнень эса, коса стане жа няфтезь эсь номерснон ваныхненди.
Фестивальсь ётафтовсь пялькстома лаца. Жюрись, конанди сувсесть Россиянь Заслуженнай артистсть, В.Д.Поленовонь лемса Народнай творчествань российскяй кудть народно-певческяй искусствань отделонц заведующаец П.А.Сорокин, Ульяновск ошень Культурань и искусствань колледжть директороц Н.П.Аринина, Мордовия Республикань культурань Заслуженнай работниксь, «Мерема» фольклорнай коллективть вятиец Е.О.Модина, колма шит кулхцонкшнезь сембе коллектифнень и солисттнень, штоба ёткстост кочкамс инь цебярьхнень. Аделавсь фестивальсь гала-концертса, кона ётась Саранскяйса Культурань республиканскяй Дворецть сценанц лангса 11 ноябрьста. Тя ульсь афкуксонь ила. Ломатть пара мяльса састь седиень токай вайгяльхнень кулхцондома и минцень и лия региононь мазы народнай щапнень ванома. Кивок ашезь ту колаф мяльхть! Ваныхне, сиренек-однек, цяпасть «народнай» артисттненди. Гала-концертть пингста фестивалень участникненди и инжихненди пшкядсь Мордовиянь культурань, национальнай политикань и архивнай тевонь министрсь Светлана Баулина.
—Сюкпря участникненди сянкса, мес содафтомазь Россияса эряй нароттнень эсь лацонь морамань койснон и культураснон мархта. Мордовияське козя эрь кодама койса-обуцяса. И пяк пара мялезонк, мес «Народнай моронь декадась» панжевсь минь моданьконь лангса,—мярьгсь Светлана Никитовна.
Сяськихне казьфтольхть дипломса и «Тавлань налхкш» сувенирса. Васенце, омбоце и колмоце степенень лауреаттне кочкафтольхть колма номинацияс коре. Инь цебярь фольклорнай ансамблькс арась Рузаевскяй райононь «Ару лихтибря» народнай фольклорнай коллективсь, конань руководителец МР-нь культурань Заслуженнай работниксь Татьяна Канаева. Ансамбльсь явозе васенце вастть Нижегородскяй областень «Русичи» фольклорнай коллективть мархта. «Народнай моронь ансамбль» номинацияса васенце степенень лауретонь лемсь максф Атяшевскяй райононь «Валскень зорят» ансамбльти (руководительсь Ольга Ивашкина). «Сольнай морамась» номинацияса жюрись и ваныхне кочказь сяськикс Калужскяй областень Товарково посёлкань «цёфксть» Николай Калиничевонь. Сон аф аньцек седиень токазь моразе «Выйду на улицу…» сембонди содаф мороть, но и кургса вяшкоманц мархта дивандафтозе залть.
«Мокшеть эзда Сурати молемс» фестивалень гран-прить сатозе Тамбовскяй областень Покрово-Пригорное велеста РФ-нь народнай творчествань «Весёлый сувенир» Заслуженнай коллективсь.
—Минь пяк пара мялезонк, мес тердемазь тя фестивальти. Пяк ни лажадоме тяфтама мероприятиятненди. Вдь мекольдень кизотнень ашезь удалсе козонга лисендемс, сембе ащекшнеме кудга. Саранскяи саме васенцеда, ошсь пяк тусь мялезонк,—азозь Тамбовонь артисттне.
Фестивальть аноклаенза-ётафтыенза: РФ-нь Культурань министерствась, В.Д.Поленовонь лемса РГДНТ-сь, МР-нь Культурань, национальнай политикань и архивнай тевонь министерствась, Народнай творчествань Республиканскяй кудсь.
И. ФАДЕЕВА.

Последние новости

Тядянь-алянь седиень и ваймонь лямбосна сатни лама иденди!

2024 кизось странасонк Россиянь Президентть Владимир Путинонь Указонц мархта...

Пееди—и ломанть ваймос арай сяда пара

Тячи азонттама Моску ошень «Азорава» ансамблень участницать Елена Куфтиновать...

Ётафтови «Акша Келу» Республиканскяй национально-фольклорнай ила

23 июньцта Зубово-Полянскяй райононь Вадовские Селищи велеса ётафтови «Акша...

Спортсменоньке сатсть «зрня» и «сия»

Казаньца ётафтовсть БРИКС странатнень Налхкомасна. Сяськомаса пялькстсь 5000-тнень малава...

Петевихть-мазоптовихть куд пирьфне

«Жильё и городская среда» национальнай проектть «Формирование комфортной городской...

Занятостень службась одкстоптови

Мордовиясь сувась занятостень службань комплекснай модернизациянь пилотнай региоттнень лувксс....

«Торама» ансамбльсь няфтезе прянц оцю фестивальса

«Торама» фольклорнай ансамбльсь примась участия «Лето в Москве. Все...

Тядянь-алянь седиень и ваймонь лямбосна сатни лама иденди!

2024 кизось странасонк Россиянь Президентть Владимир Путинонь Указонц мархта азф Семьянь кизокс. Но аф аньцек тядде миньцонк семьятненди шарфневсь и шарфневи башка мяль. Коль...

Пееди—и ломанть ваймос арай сяда пара

Тячи азонттама Моску ошень «Азорава» ансамблень участницать Елена Куфтиновать колга, кона нинге шабакс кельгозе мораманц и фалу примсесь участия художественнай самодеятельностьса.Вов кода мокшавась азонды...

Ётафтови «Акша Келу» Республиканскяй национально-фольклорнай ила

23 июньцта Зубово-Полянскяй райононь Вадовские Селищи велеса ётафтови «Акша келу» (Белая берёза) Республиканскяй национально-фольклорнай ила. Койс коре сон уленди Тройцянь шиня.Инжихнень учсазь концертнай козя...