«Мокшеть эзда Сурати»

Тяддень ноябрь ковста Россияса ётафтови «Народнай моронь декада» лем ала Всероссийскяй акция, кона лемдеви Культурань и искусствань кизоти.
«Народнай моронь декадать» мяльса кирдезь Россиянь региоттнень эса (Мордовия, Адыгея Республикатнень, Красноярскяй и Ставропольскяй крайхнень эса) ётафтовихть морамань фестивальхть. Эсост примайхть участия творческяй коллектифне и солисттне, конат работайхть эрь кодама направленияса: исполнительхне, конатнень репертуарсост няфтьфт народнай моротнень обработкасна, народнай стильса авторскяй произведениятне; ансамбльхне и солисттне, конат морсихть сире пингонь морот.
«Народнай моронь декадать» панчсы Мордовия Республикась. И тя аф стак. Мокшэрзянь крайса кородозь ванфневи народнай творчествась. Тяса тячемс ванфтови мокшэрзянь народть лама вайгяльса морамань коец, конань лаца косовок аф васьфтят.
«Народнай моронь декадать» пингста 9-11 ноябрьста Мордовияса ётафтови «От Мокши до Суры» морамань межрегиональнай фестивальсь. Инжиень примама машты мокшэрзятнень масторса фестивальсь пуроптсыне Российскяй Федерациянь региоттнень эзда творческяй коллектифнень. Проектсь арай культурно-образовательнай площадкакс, коса кармайхть ётафневома аф фкя лацонь мероприятият: «Народнай моронь декадать» торжественнайста панжемац, конкурснай прослушиваният, конатненди максови оценка колма номинацияс коре—«Фольклорнай ансамбль», «Народнай моронь ансамбль», «Сольнайста морама». Стане жа творческяй коллективонь руководительхненди ётафтовихть народнай исполнительствать коряс учебно-практическяй лаборатория и мастер-класст. Большеберезниковскяй и Старошайговскяй райоттнень эса культурань учреждениятнень видеса кармайхть творческяй васедемат сире пингонь народнай моронь морсихнень мархта. Участникне содафтыхть эрзянь и мокшень народть культураснон мархта, а стане жа няфтьсазь тя аймаконь эряйхненди морамань эсь асушиснон.
«От Мокши до Суры» морамань Межрегиональнай фестивальть гала-концертоц, участникнень каземасна кармай 11 ноябрьста 17 частста Л.П.Кирюковонь лемса Саранскяй музыкальнай училищаса.
Кода содавсь, фестивальса участиянь примаманкса заявкат максфт Россиянь 13 регионцта: Воронежскяй, Калужскяй, Костромской, Липецкяй, Нижегородскяй, Ростовскяй, Тамбовскяй областтнень, Башкортостан, Коми, Удмурскяй, Чувашскяй Республикатнень эзда, Пермскяй крайста. Мордовия Республикать няфтьсазь 7 фольклорнай коллектифт, народнай моронь 5 ансамбльхть и 6 солистт.
Народнай моронь сембе кельгихне терневихть фестивальнай мероприятиятненди, конат ётафтовихть 9 ноябрьста 15 частста Культурань Республиканскяй дворецса и 11 ноябрьста 17 частста Л.П.Кирюковонь лемса Саранскяй музыкальнай училищаса.
З.ЛЯШИНА,
«Народнай творчествань республиканскяй куд» ГБУК-нь традиционнай народнай
творчествань отделть заведующаец.