Мокшетне—инжиень примама машты ломатть

Кода пачфнеськ лувиеньконди газетаньконь ётай номерсонза, 28 августста Рузаевскяй райононь Приреченскяй велень поселениянь Левженскяй посёлкать маласа ётафтовсь «Кургоня» инжиень примама машты мокшэрзятнень VIII-це Межрегиональнай фестивальсна, конань ванома и эсонза участиянь примама пуромкшнесь пяк лама ломань аф аньцек Мордовиянь ошнень, райцентратнень, велетнень, но и шабрань региоттнень эзда.
Няевсь, што несколька кизода инголе арьсеф (тянь тиезь Рузаевкань эряйхне) «Кургоня» Межрегиональнай фестивальть тяни содасазь аф аньцек тя районца и Мордовияса. Национальнай ярхцамбяльть лемс лемтьф праздниксь сувафтфоль событиянь Федеральнай национальнай календарти.
Ужяль, но коронавирусть сюнеда мекольдень кафта кизотнень—2020 и 2021 кизотнень «Кургонясь» ульсь онлайн форматса. Самай тяфта ётафтовсть сонь котоце и сисемце фестиваленза.
Тядде «кургоня» VIII-це Межрегиональнай фестивальсь тага пуропнезень инжиензон и участниконзон тонатф вастти. Нинге ичкозде няевсь «Кургонять» пандоц»—сонь лемонц мархта акша оцю букватне, конат тернезь ся малава машинаса, лия транспортса ардыхнень оцю кужети мялень салай праздникть ванома. А ваномс ульсь мезе! Мзяра площадка работась фестивалень инжихненди—аф азови лувкссна. Инжиень примама машты мокшетне сембоса сафтозь, тяконь лувксса и национальнай щамонь-карямонь няфтемаса, моронь и сиде моронянь морамаса, кштимаса, пидемаса-панемаса. Лама нациянь кужеса—тяфтама лем каннесь площадкатнень эзда фкясь, башка кудняса работась Мокшэрзянь пирьфсь. И сон пирьфоль—куднять ваксса ащесть кош—покодеть-тиеть—сувак потмозонза эшеняти ваймама, эши—сась симомаце—таргак цинзерти сотф ведаркаса эшиень ведня и копордак танцтиняста. А вов и косьфтаф тишесь мараф капас—ули мезьда андомс тялонда жувататнень.
Инголи велетнень, да и ошнень эсовок сембе муськондсть кядьса—ашельхть муськомань машинат. Муськопне сяда шиморькшнесть и аруякшнесть муськомань доскать вельде, кона путневсь шуфтонь очкть потмос. Мокшэрзянь пирьфса ульсь и тяфтама васта—скомнять лангса ащи сембе эрявикссь муськоманди, таргаф пикскя, коса ару кожфса либордихть муськф муськопне.
Самай тяфтама фотозона ульсь тя пирьфть ваксса. Ламотнень мяльсноль варжамс вийснон ингольдень койхнень коряс муськомань тевса. Малаткшнесть фотозонати стирьшабат, стирьхть, ават. Щамга теест мушендовсь. Пряснон сотнезь руцяса—ингольденнекс, лангозост щафнесть панар и тевсь тушендсь. Муськсть-шовасть очкса стирьхне-аватне, нолямок тевс муськомань доскать и коль дивандакшнесть, кода инголи азораватне оцю семьяса тиендезь тя стака тевть вов тяфтама способса.
Тяса ульсь кода и пенгат узерьса мокорь лангса лазомс, и пиламс, и тяльмот сотомс. Путфоль котфонь кодама станок—тя тевтивок тонафтсть.
«Кургоня» Межрегиональнай фестивальти аноклазь и тиезь Мокшэрзянь пирьфть Рузаевскяй райононь Мокшень Пишля, Огарево, Левжа, Трускляй, Сузгярьге, Цифтамаз, Перхляй, Болду велетне. А сонцень пуромксть пингста инжихнень васьфнезь и каванякшнезь Мокшень Пишлянь и Огаревань стирьхне-аватне, цёратне-алятне. Мокшень щамсна-карямсна пиндолдсть-вандолдсть шить сюролданзон ала.
Мокшэрзянь пирьфса синь кштисть-морасть эрь инжить мархта, мушендсть теенза мяльс туф тев.
Россиянь нароттнень народнай искусствань и аф материальнай культурнай наследиянь кизостост, кодамкс азф тяддесь, Мокшэрзянь пирьфсь крхкаста содафтозень фестивальс пуромфнень ингольдень эряфоньконь мархта и нинге весть няфтезе, што мокшетне—инжиень примама машты ломатть.
Т.Альшина.