Мокшетнень пачасновок танцтихть, позасновок шову!

Аф кунара Москуса, С.Г.Строгановонь лемса РГХПУ-нь «Промышленный дизайн» кафедраса, аралафтольхть «Дизайн-кураторство: креативные технологии и экспертиза» очнай-заочнай магистратурать васенце выпусконц дипломнай проектонза.
Магистерскяй работатнень ёткса ульсь и «Союз дизайнеров» Международнай общественнай организациять Мордовскяй региональнай отделениянц председателец Юлия Горюнова.
Юлия Александровнань проектоц сотфоль земляконьконь, марнек мирса-масторса содаф скульпторть Степан Эрьзянь мархта и каннесь «Степан Дмитриевич Эрьзя. 13 мифов своего народа. Разработка концепции музейно-выставочного пространства скульптора С.Д.Эрьзя» лем.
Юлия Горюновать валонзон коряс, проектонц авторскяй ширец сянь эса, штоба тиемс мокшэрзятнень мифологическяй эпосснон, этнографическяй фотоматериалть, декоративно-прикладной искусствать объектонзон и Степан Эрьзянь работанзон коряс 13 визуальнай история.
Магистерскяй работать араламста Юлия Александровна ёразе няфтемс скульпторть Степан Эрьзянь найциональнайть мархта сотф ширенц, башка мяль шарфтомс национальнай культурать мархта сотксонзон лангс. Мялецоль пачфтемс комиссияти мокшэрзятнень культураснон, щамснон-карямснон, штоба сон кулелезень мороньконь и марялезень коеньконь-обуцяньконь «таньфснон». Сяс проектонц араламста Строгановкав тердезень «Эх, мордовочка» ансамбльста акатнень-сазорхнень Татьяна Чумбаевать и Наталья Кувезенковать. Мокшаватне-патриоттне ашесть атказа, оцю кенярдемаса примазь тя тердемать. Щафтольхть-каряфтольхть мокшавань-баяравань щамса. Морасть мокшень, эрзянь морот.
Тяда башка, машты кядь акась и сазорсь каванязь пуромфнень мокшень пачаса, симдезь синь шову позада, няфтемок тянь мархта сянь, што мокшетне сембе пингть ульсть и лядондыхть инжиень васьфти, каваняй ломанькс. И фалу тяфта: мокшетнень пачасновок фалу танцтихть, позасновок фалу шову!
Татьяна Альшина.