«Мерема» народнай фольклорнай ансамбльсь—руководителец МР-нь культурань Заслуженнай работниксь Екатерина Модина («Саранск ошень округонь Культурань дворец» МБУК-сь), «Лаймоня» идень фольклорнай ансамбльсь—руководителец МР-нь культурань Заслуженнай работниксь Виктор Пивкин («Национальнай культурань центра» МБУК-сь) и Сире Теризморга велеста машты кядь авась, котф лангс сёрмадысь Анна Цыганова примасть участия Всероссийскяй оцю мероприятнень эса, конат ульсть Чувашия Республикаса.
22-27 июньцта Чувашияса ётафтовсть ниле Всероссийскяй фестивальхть: «Родники России» Народнай творчествань ХХХ Всероссийскяй фестивальсь, Идень васенце Всероссийскяй фольклориадась, Идень российскяй фольклорнай Ассамблеясь, «Русь мастеровая» декоративно-прикладной искусствань народнай мастеронь ХХ Всероссийскяй конкурссь.
23 и 24 июльста Чебоксары ошень Якстерь площадьса Россиянь 20 регионцта саф 48 мастерсь няфтезь эсь маштомошиснон котф лангс сёрмадомаса, кодамаса, бисерть и сёвонть мархта работамаса, шуфтста керсемаса и лия тевса. Ваныхне и участникне примасть участия мастер-класснень эса, содафтсть Россиянь инь цебярь машты кядь ломаттнень мархта. Мордовиять эзда «Русь мастеровая» декоративно-прикладной искусствань народнай мастеронь конкурсса примась участия Анна Ивановна Цыганова—Старошайговскяй райононь Сире Теризморга велень Национальнай культурань центраста котф лангс сёрмадысь. Анна Ивановна няфтезень мокшень сёрмать эсь лацонь ширензон.
22-24 июльста Чувашиять столицанц главнай площадьсонза ётафтовсь «Родники России» Народнай творчествань ХХХ Всероссийскяй фестивальсь. Сон пуропнезень Волга ляйть трвас странань кемонь регионцта творческяй коллектифнень. Фестивальса примась участия пцтай 200 артист Чувашияста, Башкирияста, Татарстанонцта, Ульяновскяйста, Тверь ошста, Коми Республикаста, Марий Элста, Мордовияста, Пермскяй крайста, Нижегородскяй и Рязанскяй областтнень эзда. Мероприятиятне ётафтовсть Чебоксаронь и Чувашия Республикань кой-кона лия ошень творческяй площадкатнень лангса.
Мокшэрзянь народть морамань культуранц фестивальса няфтезь «Мерема» народнай фольклорнай ансамблень участникне. Коллективть концертнай программац пяк тусь ваныхнень мяльс, ламотне кштисть артисттнень мархта ряцок. Ваймонь путозь мораф мокшэрзянь моротне киньге ашезь када озадонь седихть ащема.
Ансамбльсь казьфоль дипломса и питни казнеса. А ансамбльть руководителец Е.О.Модина тертьфоль Идень Всероссийскяй Ассамблеять жюринц лувксс.
25 июньцта сявомок 27 июнти молемс Чувашия Республикась примазень Идень васенце Всероссийскяй фольклориадань инжихнень и участникнень.
Фольклориадать пингста ётафтфтольхть торжественнай церемоният и шествият ульцятнень эзга, региоттнень презентациясна, ялгаксшинь илятть, выставкат, мастер-класст, творческяй мастерскойхть, ярмаркат и флешмопт.
Фольклориадать поладозе Идень российскяй фольклорнай Ассамблеясь, коса пялькстсть творческяй конкурсса идень и од ломанень фольклорнай коллектифне.
Мордовиять Идень Всероссийскяй фольклориадаса няфтезе Старошайговскяй райононь Сире Теризморга велень Национальнай культурань центрань «Лаймоня» идень фольклорнай ансамбльсь. Сон арась Идень васенце Всероссийскяй фольклориадань дипломантокс и казьф дипломса национальнай койхнень-обуцятнень ванфнеманкса и фестивальса участвовандаманкса.
З.Ляшина,
«Народнай творчествань республиканскяй куд»
ГБУК-нь традиционнай
народнай творчествань
отделонь заведующай.