Мордовиянь мастерхне—Беларусь Республикаса

Июльть васенце пялестонза Беларусь Республикань Могилевскяй областень Шкловскяй райононь Александрия агроошкаса—Днепр ляйть трваса ётафтовсь «Купалье»—«Александрия собирает друзей» республиканскяй оцю ила. Эсонза примась участия кафта сядода лама белорусскяй мастер и сядода лама мастер Россияста, Азербайджанцта и Узбекистанцта. Сембе синь работаснон вельде няфтезь народнай культурать, промыслатнень, наукаса сатфкснень и техническяй творчествать.
Мордовия Республикань Культурань, национальнай политикань и архивнай тевонь министерствать и муниципальнай райононь оцюнятнень ширень кирдемаснон вельде «Купалье»—«Александрия собирает друзей» илати Мордовияста якасть декоративно-прикладной искусствань кота мастерхт. Народнай творчествань республиканскяй Кудсь примась участия Беларусь Республикав минь мастероньконь и ремесленниконьконь молемаснон анокламаса.
Миньцтонк Александрия агроошкаса ульсть мастерхт Рузаевскяй районцта: национальнай сюреса сёрмадомать, ёмла ожнаста кодамать, традиционнай сюреса сёрмадомать коряс Светлана Сараева, Татьяна Китаева няфтезень традиционнай кодамать коряс мастер-классть, национальнай щамса някань выставкать, Екатерина Буряк мархтонза усксезень национальнай някатнень-скруткатнень. Тяда башка, Беларуси якасть мастерхт Ковылкинскяй районцта. Нят шуфтста керсемать коряс мастерхне, алятне-стирьхне Павел и Кристина Акульшиттне и ёмла ожнаста кодамать коряс зрнянь кядь ломанць—Зинаида Кимяева.
Республиканскяй тя фестивальса Мордовиянь мастерхне няфтезь пряснон васенцеда. Целайнек тоса ульсть представительхть Россиянь 22 регионцта, тяконь лувксса и Пензенскяй областьста.
Мастероньке башка мяль шарфтсть сянди, што Беларусь Республикаса синь васьфтезь аш ни кода лац. Примай ширеть мяльс пяк тусть национальнай щамоньке. Ламотне ёрасть коль сяда лама содамс мокшэрзянь культурать колга. Сяс синь кизефнесть, тифнесть мастероньконь и выставкаснон мархта фотографият, примасть участия мастер-класснень эса. Фестивальса азорондась ялгаксшись. Участникне марязь пряснон фкя оцю семьякс.
Мезьста и мзярда сембось ушедсь? Васенце фестивальсь ульсь 2010 кизоня. Меле кассть участникнень лувкссна и тя цебярь койсь коль кемокстась.
«Купалье» фестивальсь кенерсь арамс Беларусь Республикати культурнай брендокс. Хоровоттне, толмарть вельхкска комотнематне, коняфксонь кодамась, «мастеронь ошсь», выставкатне-ярмаркатне, аттракциоттне, мастер-классне, конкурсне тушендыхть участникнень мяльс. Тядде агроошкав пуромкшнесь пцтай сяда тёжянь инжи!