Мордовия Республикань Государственнай премиянь лауреатсь, Международнай и Всероссийскяй фестивальхнень и конкурснень лауреатсна, «Умарина» моронь и кштимань Мордовскяй государственнай ансамбльсь содаф ламоц вастова. Тяддесь и сай кизось теенза юбилейнайхть—коллективти топоди 85 киза. Тячи оцю мяльса пачфттяма «Умаринать» «панчфонзон» эзда фкять—Мордовия Республикань Заслуженнай артисткать, хоронь артисткать, кона морай сопрано омбоце вайгяльса, асу мазы стирть Ирина Учаевать колга.
Шачсь-кассь Ирина Сергеевна Большеигнатовскяй райононь Андреевка велеса. Пяк мазыель вайгялец тядянц, Вера Учаевать. Вера Алексеевна лама киза морсесь Андреевкань самодеятельнай хорса, конанди сувсесть школань учительхне, культурань работникне, велень ся эряйхне, конат кельгозь мороть и маштсть морама.
Велень школаса тонафнемста Ирина Учаевась примсесь участия морамань ламоц конкурснень эса, сяс сидеста сашендсь Саранскяи. Культурань республиканскяй Дворецса—Мокшэрзянь государственнай филармонияса арась содафокс лия конкурсанткань мархта, кона пачфтсь, што республиканьконь столицаса ули Л.П.Кирюковонь лемса музыкальнай училища. Иринань эса эстокиге «крьвязсь» мяль—поступамс училищав тонафнема.
Мрдамок Андреевкав, 9-це класса тонафнись мярьгсь тядянзонды-алянзонды, што тонафнемань тя кизоть шумордамдонза меле ёрай тумс Саранскяи музыкальнай училищав.
Аляц васенда ашезе кирде оцю стиренц ширенц. Кие, кле, кармай лездома тядяцти кудъётконь тевса? Велеса эздост лама кизоньберьф. Но меколи Учаефне састь марстонь мяльс и нолдазь стирьснон ошу тонафнема.
Тяфта Ирина сась экзаменонь максома Л.П.Кирюковонь лемса музыкальнай училищав, коза и поступась. Училищаса стирть приметазе Мордовиянь Заслуженнай артисткась Инна Учватова. Инна Павловна кулхцондозе стирть и сявозе эстеенза. Сон и арась Ирина Сергеевнанди вокалть коряс васенце преподавателькс.
Тонафнесь Андреевкань асу «цёфкскясь» вокальнай отделенияса. Сяда тов ётафтозь педагогти Елена Мелякинати, кона ульсь «Млада» ансамблень руководителькс («Строитель» клубть видеса).
Елена Михайловна колмоце курсса тонафнить Ирина Учаевать тердезе «Младав».
«Тя ульсь 2008 кизоня, эста тя ансамбльса морсесть вете ломатть»,—лятфни Ирина Сергеевна.
Музыкальнай училищать шумордамдонза меле стирсь поступась Н.П.Огарёвонь лемса Мордовскяй государственнай университетонь Национальнай культурань институту, коса сяда тов касфнезень и кемокснезень содамошинзон вокалть коряс.
Институтть шумордамста, дипломнай работань тяштемста, «Млада» коллективста тусь.
Высшай образованиять колга дипломть получамдонза меле («Музыкальное искусство» направлениясь) Ирина Сергеевна тусь Большеигнатовскяй району, коса работась хормейстеркс. Весть аноклазень иттнень «Шумбрат, Мордовия!» фестивальти, конань эса сонцьке примась участия. Жюриса ульсть «Умаринать» эстонь руководителец Василий Четыркин и морсись Инна Учватовась.
Инна Павловна гайфтсь теенза и азозе, што ули васта «Умаринаса». Ансамбльсь самай срхксесь Москуву гастрольс. 2013 кизонь 2 декабрьста стирсь арась тя коллективти «панчфокс», 12 декабрьста ни тусь мархтонза Москуву.
«Мзярда сань и кулине, кода моразевсь «Умаринась», фатямань таколдома: кали карман работама ётксост и мархтост? Кремляса выступленияньконь мяляфтса бта исяк, тоса няфтеськ «Луганяса келунясь» концертнай номерть»,—азонды Ирина Сергеевна.
Тяддень 2 декабрьста топодсь 11 киза, кода сон работай «Умаринаса». Тняра пингста коллективть мархта ульсь Россиянь ламоц региоттнень и ошнень эса, но Москуву васенце гастроленза лядсть мялямозонза валда тяштенякс.
Ирина Учаева кунара морси сольнайстовок. Весть теенза Василий Четыркин мярьгсь: «Ламос кирттядязь ни, пинге сольнайста няфтемс пряцень. Вештяма тейть морот!»
Самай эста «Умаринась» якась Ельники вели, коса Ирина Сергеевна и моронь ушедыель (запевала). И тя ульсь коллективть визитнай карточкац—«Умарина» морось.
Стирсь, шарьхкотьф, таколдсь, но мархтонза работайхне кирдезь ширенц, лездсть, кода маштсть. И сембось лиссь лац!
Сяс сон аф аньцек сольнайста морси, но и моронь ушеды. Сольнай васенце моронза: «Ты мне нитки не мотай» и «Крапивушка». Тяниеннетнень ёткс сувси Андреевка велеть колга морось, конань Ирина Сергеевнанди тяштезь Василий Родионов (музыкать) и Тамара Баргова (валхнень).
Кафта кизода инголе теенза максф Мордовия Республикань Заслуженнай артисткань лем. Но тя казнеть стирсь лувсы марстоннекс. И оцю спасиба азонды сятненди, кинь мархта работась и работай сембе ня кизотнень.
«Мзярда сань «Умаринав», сонь руководителец Василий Иванович мярьгсь, што тя аф коллектив, а семья! И тя афкукс тяфта тянемс. Инголи хорса морсесть Мария Грачева, Любовь Числяк, Фаина Четыркина, конат пяк лезнесть сайхненди. Эздост тонафнеме. Макссесть тейнек морсемать мархта сотф тефнень коряс эрявикс советт. Теест пшкятькшнеме, кода ялганди. Семьяса, конань лемоц «Умарина», тяфта тефне ащихть тянивок. Оцю спасиба директорти, художественнай руководительти Наталья Касаткинати, кона фалу ащи творческяй вешендемань киса. Цебярь ялгатама Мордовиянь Заслуженнай артисткать, хоронь артисткать Елена Зайцевать мархта. Кафцьке эрзяватама, сяс ули кинь мархта корхтамс шачема кяльса»,—мярьгсь республикань Заслуженнай артисткась.
А нинге сон казьф Российскяй Федерациянь Оборонань министерствать «Участник военной операции в Сирии 2018» медаленц, «Футболть коряс Миронь чемпионатть ётафтоманцты путксонкса» медальть, «Мордовия Республикать касфтоманцты-виияфтоманцты личнай путксонкса» Мордовия Республикань Оцюнять Почётнай знаконц мархта.
Учаефнень и омбоце стирьсна, Елена Пьянзина, сотозе эсь эряфонц музыкать мархта. Елена Сергеевна работай музыкальнай руководителькс Чамзинкаса музыкальнай школаса.
Эрзявась Ирина Сергеевна сидеста уленди Андреевкаса, коса тядянь-алянь кудсна. Тяса ётафнесы отпусконц. Ужяль, но шачфтыенза-касфтыенза ашет шиса. Родной кудюрхтсь максси теенза творческяй од вийхть-эрьгат, тяса сидеста лятфни идькс пингонц колга.
Ирина Учаева арьсесь кельгома коллективонцты и сяда товга панчфокс панжема, сембе цебярть. И аф аньцек юбилейнай кизоня, а фалу!
Татьяна АЛЬШИНА.