30 январьста Москуса, «Россия» Международнай выставкаса-форумса, ётафтовсь Культурань ши. Мордовиясь эсь стендонц лангса няфтезе «День национальных брендов Республики Мордовия» программать. Тяса кайгсть мокшень и эрзянь морот, ётафтовсть эрь-кодама мастер-класст.
Кепотьксонди, сембонди, кинь мялец, ульсь кода тонафнемс карксонь кодама, народнай инструментса морама, содаф Теньгушевскяй семицветкать сёрманзон тиема и стак тов.
Башка васта максфоль асу земляконьконди, марнек мирса-масторса содаф скульпторти Степан Эрьзянди. Мокшэрзянь национальнай драматическяй театрань актёрхне няфтезь «Эрьзя. Летящий к свету» спектакльста пакшть. Стане жа аноклафоль виртуальнай экскурсия мастерть работань коллекциянц эзга. Мокшэрзянь народть эсь лацонь культуранц мархта пуромфнень стане жа содафтозень «Варма» этно-арт-театрась.