«Россия» Международнай форумса ётафтовсь «Шумбрат» национальнай ила
19 июньцта Москуса, «Россия» Международнай выставкать-форумть площадкаса, ётафтовсь «Шумбрат» мокшэрзянь национальнай ила.
Праздниксь ушедсь народнай художественнай промыслатнень и ремеслатнень коряс мастер-класснень ваномаста. Мордовиянь машты кядь ломаттне няфтезь сембе ся кядьтефнень, конатнень мархта мокшетне и эрзятне занцельхть пря сире пинкнень эзда сявомок. Тяса и тавлинскяй налхкшсь, и мокшэрзянь котф лангс сёрмадомась, кона содаф марнек Россиять келес и эздонза ширеса, и художественнай керамикась, и бисерста национальнай мазоптомбялень кодамась. Лама мезьса сафтсы мокшэрзянь народсь—и валенцянь кевордамаса, и теньгушевскяй семицветкань уникальнай орнаментонь кодамаса, и исань тарадста кядьгонь-мезень тиемаса… Сембе ня маштомошитнень мокшэрзянь мастерхне тячемс мяляфтсазь, содасазь и анокт пачфтемс синь од поколенияти.
«Шумбрат»—тя ялгаксшинь и кеняртькшнемань ила, конань эса марс шоворькшнихть мокшэрзянь народть коенза-обуцянза, сонь культурац и историяц. Илань фкя инь мялень салай событиякс ульсь Мордовиянь и Москувонь мокшэрзянь землячествань национальнай коллектифнень театрализованнай шествиясна-хороводсна, конань эса примасть участия илань сембе инжихне.
«Сембе минь—Россия!» представленияда-прологта меле пуромфнень приветствовандазень Мордовиянь Оцюнясь Артём Здунов.
—Мордовиясь—великай Россиять пяльксоц! Минь тага ётафттама Москуса тяфтама оцю ила—«Шумбрат». Шумбрат, Моску! Шумбрат, Россия!—мярьгсь Мордовиянь Оцюнясь.—Минь старандаме няфтемс народнай промысланьконь, театральнай шоуньконь, модань национальнай театраньконь. Катк тячиень илась туй мялезонт, штоба теенть кельговоль Мордовиясь, улель мяленте самс ширезонк!
Артём Здунов спасибась выставкань пуроптыхненди-аноклайхненди: лама ков синь покодсть Россиянь региоттненди, штоба эрсь араль сяда содафокс, тяза сашендоль сяда лама ломань.
Тяфта ладявсь, што мокшэрзянь народсь эряй марнек странаньконь келес, кемотть тёжянь представительсь эряйхть Москуса. Эсь народснон кялензон и коензон-обуцянзон ванфтомаснонды оцю путкс тиендихть ся земляконьке, конат Мордовиять эзда сядот вайгяльбень вастса эрязь аф юкснихть эсь юрснон колга, шарфнихть мяль ёмла родинаснон судьбанц лангс. Республикань руководительсь макссь оцю казнет историкненди, артисттненди, бизнесонь и Мордовскяй землячествань представительхненди мокшэрзянь народть культурнай наследиянц ванфтоманкса и содафокс тиендеманкса.
Россиянь Сенаторсь, РФ-нь финно-угорскяй нароттнень Ассоциацияснон председателец Пётр Тултаев азозе, што Россиянь эрь народть сонцень лама веконь историяц, уникальнай, самобытнай культурац. «Эрь народть историяц—тя, ламода, и кельгома Россияньконь историяц. Минь фкя лацоннетама, но минь—фкя оцю, ялгафты семья. Россиясь тейнек—тя минь марстонь оцю Родинаньке! Тернесайне сембонь Мордовияв—сяда пара весть няемс, а сяльде нинге несколькаксть самс!»—мярьгсь сон.
«Шумбрат» илась поладовсь «Мордовияста кельгома мархта!» республиканьконь творческяй коллективонзон и искусствань деятелензон гала-концертснон мархта.