«Мордовиясь. Военнай историять пильгокинза»

Аф кунара Российскяй военно-историческяй обществать Мордовскяй региональнай отделенияц «Мордовия. По следам военной истории» проектонц мархта лиссь сяськикс Культурнай инициативань Президентскяй фондонь конкурсса.
Проектть партнёроц—Мордовия Республикань Оцюнять и Мордовия Республикань Правительствать Администрацияц, республикань Культурань, национальнай политикань и архивнай тевонь министерствась, Мордовия Республикань Правительствать видеса гуманитарнай наукань НИИ-сь, республикань Центральнай государственнай архивсь, «Сурский рубеж» военно-историческяй реконструкциянь клубсь, «Поиск» и «Память» патриотическяй отряттне.
Кода азозе Российскяй военно-историческяй обществать Мордовскяй региональнай отделениянц председателец, Мордовиянь Правительствать видеса гуманитарнай наукань НИИ-ть директороц, историческяй наукань докторсь, профессорсь Галина Куршева: «Мордовия. По следам военной истории» проектть анокламаса лама вий путсть региональнай отделениянь члеттне, гуманитарнай наукань НИИ-нь учёнайхне, а тяфта жа республикань общественнай организациянь активисттне. Марстонь работась тифоль кота ковста и вятевсь сон кирдемок мяльса Сурскяй оборонительнай рубежень строительхнень трудовой подвигснон. Проектсь лемтьф Великай Сяськомати!
Галина Куршевать валонзон коряс, проектть целец—ванфтомс Мордовиянь эряйхнень подвигснон колга историческяй мялямть кода тылса, стане и фронтса. Тяфта жа проектть вельде тядде кармай мольфтевома Мордовия Республикаса народоньконь сембе поколениянзон ёткса патриотическяй работа. Мероприятиятне ётафтовихть Саранскяйса и республикань муниципальнай сембе райоттнень эса.
Тяфта жа арьсекшневихть ётафтомс Сурскяй рубежень строительхнень лемс военно-историческяй реконструкцият, «Мялямонь марш», военнай историять видешинц ванфтоманкса Межрегиональнай научно-практическяй конференция, республикань эрь районца Мужествань выездной урокт и нолдавихть историческяй документонь альбопт-каталокт и сборникт.
Сембе ня мероприятиятне кармайхть лездома тяниень пингонь од ломаттненди касомс ёмла и оцю Родинань афкуксонь патриотокс!
Владимир НЕСТЕРОВ.