29 июньцта Лямбирскяй райононь Аксёнова велеса ётафтовсь «Сабантуй» XVII Республиканскяй национально-фольклорнай ила. Тя праздниксь шачема-касома масторти кельгомать и Мордовиянь нароттнень межнациональнай кеме ялгаксшиснон символоц.
Мордовиянь Оцюнять Артём Здуновонь лемста илань инжихненди и участникненди пшкядсь МР-нь Государственнай Собраниять Председателец Владимир Чибиркин. Сон шарфтсь мяль сянди, што «Сабантуйть» оцю историяц. И минь задачаньке ванфтомс койхнень-обуцятнень, ламолгофтомс сянь, мезьса тячи вии минь Россияньке.
«Тя илась васенда лемневсь сокань праздникокс. И тячи минь спасибатама трудонь ломаттненди ся трудть инкса, кона лезни тейнек сатнемс оцю сатфкст республикаса. Стройсемс промышленнай предприятият, виияфнемс велень хозяйствать, решандакшнемс социальнай кизефкснень, стройсемс социальнай объектт. А странаньконь тячи сембода главнай задачац—тя специальнай военнай операцияса сяськомась. И минь няеськ ни, кода сембе ломаненьке лезнихть, штоба сяськомась саль кода можна сяда курокста»,—мярьгсь Владимир Чибиркин.
Мордовияса Татарстанонь Раисть Рустам Миннихановонь лемста «Сабантуень» инжихнень приветствовандазень Татарстан Республикань экологиянь и природнай ресурсонь министрсь Александр Шадриков: «Тячи сире пингонь тя илась лац пяшкотькшневи тяниень пингонь тюсса. Сон кизоста кизос арси эрь-кодама национальностень и верань ломаттненди васедема вастокс, лезни сяда лац шарьхкодемс фкя-фкянь, кемокснемс нароттнень ёткса мирть и согласиять. Койс коре ня шитнень сашендыхть радня и мала ломаттне, штоба тага марямс седиень лямбонять, петнемс мяльснон тядянь-алянь кяльса корхнемаса. Семьять, нароттнень, странать марстоньшисна—вов мезсь няфнесы «Сабантуйть». Сяс Российскяй Федерацияса Семьянь кизоня илась арси эсь лацоннекс, сядонга мялень салайкс».
«Сабантуй» праздниксь васенце минутаста ни пяшксель кеняртькшнемада и мазышида. Сельмос пови наряттне, кштима терди-кошарды мелодиятне, национальнай ярхцамбялень шиненясь и седи ваксстонь мзолфкятне—сембось тя тиендезе «Сабантуйть» эсь лацонь ваймопожфонц. Илать торжественнайста панжемац ушедовсь театрализованнай представленияста, кона лемдевсь шачема-касома масторти и семьянь питнишитненди кельгомати. Сяльде спасибамань лямбе валхт кайгсть велень труженикнень, СВО-нь участникнень и синь семьяснон, трудовой династиятнень лемс—сембонь, кие эсь трудонц, мужестванц и Отчизнати кельгоманц мархта тиендьсы Россиять и родной Мордовиять сядонга мазыкс и виикс.
«Минь марсотама!» культурно-выставочнай проектсь «сувафтозень» инжихнень Мордовиять историязонза и культуразонза, азондомок республикаса эряй нароттнень козя койснон-обуцяснон колга. Тематическяй эрь павильонць—«Семья», «Марса минь—Вий!», «Эрямс и работамс странать инкса!», «Пинкнень эрек соткссна», «Сай пингонь пилот», «Аноктама лездомс!»—няфтезь поколениятнень ёткса кеме сотксть и Мордовиянь и Россиянь нароттнень традиционнай питнишиснон—шачема-касома масторти, семьяти и Отчизнати кельгомать. Народнай ремеслатнень коряс мастер-классне салазь и шабатнень, и оцюфнень мяльснон.
«Минь пуроптомазь «Сабантуйсь» музыкальнай программась арась цебярь казнекс музыкань кельгихненди. «Нейтральная полоса» клубть эзда седиень токай авторскяй моротне, «Казачья вольница» ансамбльть кштима кошарды мелодиянза, Мордовиянь и Татарстанонь артисттнень мяляфтови номерсна, «Стихия авторская» фестивальнай движениянь участникнень композициясна—эрь выступлениять ваныхне васьфнезь лямбоста и кядень кайги цяпама мархта.
Спортивнай площадкатнень эса азорондась спортонь ваймопожф. Инь цебярь атлеттне пялькстсть «Корэш» национальнай бароцямань чемпиононь лемть инкса, а стане жа няфтезь маштомошиснон греко-римскяй бароцямать коряс.
Илань сембода ёмла инжихне пара мяльса ётафнезь пингть идень зонатнень эса, коса синь учендозь народнай налхкоматне, мялень салай мастер-классне, аквагримсь и весяла аттракциоттне.
Аксёноваса ётафтф «Сабантуйсь» тага весть няфтезе, што койхне-обуцятне эряйхть фалу, пуропнемок марс поколениятнень и пяшкотькшнемок эряфоньконь сельмос пови тюсса. Тя илась арась афкуксонь гимнакс межнациональнай ялгаксшити, гражданскяй единствати и шачема-касома масторти кельгомати—ся питнишитненди, конат фалу кармайхть важнайхть Мордовиянь эряйхненди и Россиянь сембе граждаттненди.