23 августста Саранскяйса ётафтовсь «Мы вместе!» национальнай творческяй коллективонь од ломанень Всероссийскяй марафонць.
23 августста И.М.Яуше-вонь лемса Оперань и балетонь государственнай театраса ульсь од ломанень Всероссийскяй марафононь участникнень—творческяй коллектифнень руководительснон мархта пресс-конференция. Эсонза примасть участия Межэтническяй журналистикань Гильдиять президентоц Маргарита Лянге, Мордовия Республикань культурань, национальнай политикань и архивнай тевонь министрсь Светлана Баулина.
Шобдава ушедсь работама «Креативные индустрии» выставкась, коса мишендевсть Мордовиянь и Россиянь лия региоттнень эзда мастерхнень, дизайнерхнень и модельерхнень авторскяй мазоптомбяльсна и щамсна.
«Инь мазы велесь». Тяфтама лем каннесь «Творческяй велетне» презентациять пяльксоц. Левжа, Теньгушева, Вирь Келгужа, Сире Сендру, Вирь Тавла, Аксёнова велетне няфтьфтольхть башка кудняса, конатнень потмоса ульсть синць эряйхне, паршисна, кядьгосна, щамсна. Азорхне заняфтольхть эрь шинь тевснон мархта. Эрь велень куднясь тифоль интерактивнай музейнай экспозициякс.
Шиньберьф Советскяй площадьса «Творческие деревни» презентацияса ашесть сетьмосе гармониясь, кштисть-морасть велень ансамбльхне, конат лочазь-лочазь сиде моронятнень. И, конешна, башка мяль шарфтфоль национальнай щапненди-каряпненди—дефилеть вельде няфтьфоль синь мазышисна.
Народнай художественнай промыслань и ремеслань Межрегиональнай выставкать лемоцоль «ТЕВ».
Мзярда маладоме «ТЕВ» выставкати, содаф фкя мастерицать мархта шумбракстонь мокшекс. Сон мокшава, а работанзон тя пингть ванондозь кафта алят. Кулемок корхтаманьконь, эняльдсь ётафтомс рузонь кяльс тев валть. Пцтай марса азоськ, што тевсь—тя дело.
«Это не просто дело, а прекрасные работы мордовских мастериц»,—мярьгсь алятнень эзда фкясь. Мялезонза пяк тусть ванфты някатне (оберекне), а нинге синь ламос ванондозь карксонь кодамань аф оцю станоконять. Нльне варжазь вийснон тя тевса. Тумстост рамасть лятфнембяленди ванфты няканят.
«ТЕВ» Межрегиональнай выставкаса-ярмаркаса ульсь кода кочкамс и рамамс народнай художественнай промыслань и ремеслань изделият, примамс участия мастер-класснень эса. А кода морофтома? Синьге кайгсть «Морот вайме ваксста» кельгома моронь марафонца.
Фонтаннай спускса шить омбоце пялестонза ушедсь работама «Ярхцатама Саранскяйса!» национальнай ярхцамбялень, авторскяй кондитерскяй изделиянь, симомбялень презентациясь, дегустациясь и мишендемась.
«КУЛЬТУРАZAПОБЕДУ!» республиканскяй патриотическяй проектсь эряфс ётафтовсь Сяськомань площадьса.
«Спасиба, кельгома солдатт! Учтядязь Сяськома мархта!»—тяфтама вал мархта открытка тусь СВО-нь ётафтома зонав и минь эздонк.
«Мордовиять этнокультурнай достоянияц!» выставкась тя шиня ульсь А.С.Пушкинонь лемса Национальнай библиотекать маласа. Тяса ётафтовсть этно-васедемат, книгань выставкат, А.С.Пушкинонь шачема шиста 225 кизонь топодеманцты фестиваль.
С.Д.Эрьзянь лемса изобразительнай искусствань мордовскяй республиканскяй музейть маласа площадьса стане жа ламоль ломаньда. Синь састь «Эрьзя-фест» пуромксти, коза сувсесть «Рисовандасаськ мяльть» искусствань фестивальсь, «Театральнай атмосферась» од художникнень и рисовандамать кельгиензон оцю пленэрсна, работась од художникнень и Мордовия Республикань Художниконь союзть од художниконзон произведенияснон выставкасна.
Шить омбоце пялестонза Советскяй площадьса ушедсь «Мы вместе!» национальнай творческяй коллективонь од ломанень Всероссийскяй марафонть фестивальнай программац. Оцю сценать лангса выступандасть Ульяновск ошста «Держава» государственнай духовой оркестрась, Москуста «Этносфера» группась, «КоленкорЪ» фолк-группась, Калмыкияста «Hagrin» этно-электропанк группась, Башкортостанцта «UZORITSA» фолк-группась, Казаньцта «Хмельная Ворга» фолк-рок группась.
«Мы вместе!» марафонть панжемдонза инголе Мордовия Республикань Оцюнясь Артём Здунов ванозень выставкатнень и локациятнень, тяконь лувксса «Творческие деревни» площадкать.
Илять ульсь «РОССИЯ. Время вперед!» лем ала «Мы вместе!» марафонть торжественнайста панжевомац.
Марафонть ушедовомста Мордовия Республикань Оцюнясь Артём Здунов мярьгсь:
—Президентоньконь ширень кирдеманц вельде тага ётафтсаськ тя фестивальть. Ёран азомс благодарностень валхт странать руководстванцты. Спасиба инжиеньконди, сембонди, кие сась ширезонк. Благодарностень башка валхт воиноньконди. Синь ванфтсазь странаньконь и макссихть тейнек ётафнемс тяфтама илат.Фестивальсь панчф. Катк сембе няфтьсазь эсь пряснон и мялезост туй республикасонк ётафтф пингсь.
Пуромфнень ёткса ульсть и специальнай военнай операциянь участникт. Кафттне эздост—Саранск ошень округста Александр Тарасов и Рузаевскяй районцта Александр Тиверетин Россиянь Президентть Указонц мархта казьфт «За отвагу» медальса. Оцю казнеть синь получазь республикань Оцюнять Артём Здуновонь кядьста. Воиттне няфтезь эсь пряснон аф пели, кеме ломанькс воинскяй шумоснон пяшкодемста.
Марафононь участникненди и инжихненди приветствиянь валхт азсь Россиянь Государственнай Думань Национальносттнень тевснон коряс комитетть председателенц васенце заместителец Ильдар Гильмутдинов:
—Спасиба Саранскяйти тяфтама мероприятиянкса! Минь—оцю страна, миньцонк 190-да лама национальность, корхтатама 277 кяльса. Минь—мирса инь цебярь странась, минь аф сяськофтяма!
Ульсть поздравленият и Мордовия Республикать эзга Главнай федеральнай инспекторть Анатолий Гулинонь эзда. Сон эсь лемстонза и Приволжскяй федеральнай округса Президентть Полномочнай представителенц Игорь Комаровонь эзда поздравляндазень сембонь марафонть ётафтоманц и панжеманц мархта.
Фестивальнай программась поладовсь сяда тов. Тя илядня ётафтовсь «Этнокостюм на языке современной моды» спектакльсь-показсь, конань аноклазе Саранскяйста «Варма» Этно-арт театрась.
Сценаса кштисть-морасть Дагестан Республикань Левашинскяй райононь «Авадан» Народнай хореографическяй ансамбльсь, Удмуртияста «АЙКАЙ» моронь и кштимань театрась, Владимирста «Владимирские рожечники» государственнай ансамбльсь, Москуста «Партизан FM» фолк-группась, «После 11» фолк-рок группась и лия коллектифне.
***
Омбоце шиня, 24 августста, «Мы вместе!» марафонць поладозе эсь работанц Старошайговскяй муниципальнай райононь Сире Теризморга мокшень велеса, коса ётафтовсь «Шумбрат» VII-це Межрегиональнай национально-фольклорнай илась.
Мордовиясь фалу маштсь и машты инжиень примама. Тя мезтьке синь васьфтезень фермерхнень ярмаркасна, Старошайговскяй райононь велень поселениятнень подворьясна, кона каннесь «Сашендода велезонк, пара ули мялезонк» лем.
Эсь маштомошиснон ломаттне няфнезь спортса, кштимаса, морамаса.
Цють сяда ширеса пялькстсть фкя-фкянь мархта «Поющее дерево» Межрегиональнай фестивальнай конкурсонь участникне—шуфта ланга керсихне.
Ёмла сценать лангса шиньберьф мольсь «Поёт душа Мордовии» межмуниципальнай фестивальсь. Теенза участникокс ульсть Мордовиянь и Россиянь ся региоттнень эзда творческяй коллектифне, коса компактнайста эряйхть мокшет и эрзят.
Главнай сценаса «Шумбрат объединяет» концертнай программать пингста морасть Г.И.Сураевонь-Королёвонь лемса «Келу» ансамбльсь, Мордовскяй госфилармониянь солистсь Александр Сергеев и сонь рьвац Карина Сергеева, лиятне.
«Шумбрат! Здравствуйте, друзья!» тяфтама лем каннесь «Шумбрат» илать торжественнайста панжевомац. Тя праздникти сашендсть Россиянь 14 регионцта национально-культурнай автономиянь представительхть.
Пуромфненди приветствиянь валхт азсь Мордовия Республикань Оцюнясь Артём Здунов:
—Конашка паваз, што ули «Шумбрат» иланьке. Вельденза аф сязевихть атянь-атяньконь мархта сотксоньке. Тя лезды тейнек ванфтомс коеньконь, пачфнемс синь иденьконди и уноконьконди. Минь тружениктама, машттама и лац покодема, и лац ваймама. Тячи ётксонк боецоньке, героеньке. Кие-бди эздост сась отпускс, кие-бди—пчкама. Эрьда кирдьсаськ ширеснон. Мзяра ломань тусь небытияс, сяс мес синь ашельхть тяфтама боецсна, ашель ширень кирдемасна, а минь ули. Слава боецоньконди!
Меле Артём Алексеевич казезень государственнай казнеса культурань работникнень.
Мордовскяй (мокшень и эрзянь) народть Межрегиональнай общественнай организациянц председателец Юрий Мишанин азозе, што «Шумбрат» илась коль кочкси вийхть. Тядде сон васенцеда ётафтови Челябинскяй областьса и Владимир ошса.
Мордовияса «Шумбрат» праздниксь 2025 кизоня ули Большеберезниковскяй райононь Паракина велеса.
Старошайговскяй муниципальнай райононь оцюнясь Геннадий Мухин максозе илать символонц—Штатолть—Большеберезниковскяй райононь оцюнять васенце заместителенцты Андрей Бояркинонди.
Шить омбоце пялестонза главнай сценать лангса ульсь «Звёзды народного искусства» Гала-концертсь.
«Мы вместе!» марафонць, «Шумбрат» илась нинге весть няфтезь, што виеньке—марса улемаса, ладязь эрямаса!
Татьяна АЛЬШИНА.
Фототне Николай КАРАНОВОНЬ.