Торбеевскяй райононь Мокшень Ювня велеса шачф-касф мокшавать Мария Сараевать Саранскяень эряйхне ушедсть содамонза 2023 кизоня, мзярда ётафтовсь «Иненармонь» мазышинь и асушинь Межрегиональнай васенце конкурссь.
Финалса сяськомать инкса пялькстсть Мордовияста, Москуста, Подмосковьяста и Пензаста 18 кизоса сявомок 35 кизоти молемс мокшень од аватне.
Мария Сараева салазе жюрить мяленц аф аньцек удалаф шамапутксонц, ронгонц-пондонц, но и атянь-атяньконь койснонды кельгозь и кородозь малаткшнеманц, мезть мяль вельде няфнесыне сембе вастова, мархта. Идькс пингстокиге кярьмодсь декоративно-прикладной кядьтефненди и тянивок тиенди национальнай аксессуархт.
Мария Сараева-Шумкина кемоньда лама киза ни эряй Мытищи ошса, но кирди соткст ёмла родинанц мархта. Тяда башка, сувси Москувонь и Московскяй областень Мокшэрзянь землячествати.
Ковылкинскяй районцта Ольга Живайкинать и Пензенскяй областьста Елена Широковать мархта пуроптсть «Эряма» вокальнай трио и морсихть столицань площадкатнень лангса рузонь и мокшень кяльса авторскяй и народнай морот.
Мария оцю мяльса кеняртьфнесыне и эсь земляконзон. 12 июльста «Край родной—ближе к сердцу моему» сольнай программанц мархта тись выступления Торбеевань Культурань кудса.
«Гордость марян сянкса, што ёмла родиназе эряфонь оцю кис лихтезень Мордовия Республикань Заслуженнай артисткать Любовь Князьковать, Мордовия Республикань Государственнай Гербть авторонц Николай Чикриневонь, Мордовия Республикань Заслуженнай поэтть Василий Кригинонь и ламотнень лиятнень»,—мярьгсь сон.
Нинге шабакс Мария Петровна кельгозе народнай творчествать. Морсесь морот гармониять коряс. Гармонистокс теенза ульсь аляц Пётр Иванович Сараев.
Школаса тонафнемста примсесь участия вокальнай морамань ламоц конкурснень—народнайхнень и тяниень пингоннетнень эса. Няфнезе маштомошинц изобразительнай искусствань, декоративно-прикладной творчествань пялькстоматнень пингста. Кафксть сявондезе Гран-прить «Одарённые дети» конкурсть декоративно-прикладной творчествань номинациясонза, коса няфнезень сюреса сёрматф, ёмла ожнаста, кедьста работанзон, а стане жа национальнай щапнень, конатнень аноклакшнезень сонць.
Тонафнемок Москувонь Вирень государственнай университетонь ландшафтнай архитектурань факультетса, стаки примсесь участия ламоц пуромкснень эса. Морсесь мокшэрзянь морот, содафнезень ломаттнень национальнай ярхцамбяльхнень мархта.
Ламотнень мяльс тушендсть сольнай выступлениянза. Тяда башка, морсесь и морси «Азорава» народнай моронь коллективса.
Мокшавать валонзон коряс, кассь сон творческяй, национальнай ширень кельги семьяса. Бабац, Мария Васильевна Сараева, эрясь 90-да лама киза. Эряфоньберьф морсесь мокшэрзянь кунардонь морот, ламотнень эздост тяниень поколениясь аф содасыне и ашезень куленде. Кефкие идень тядясь, аф ваномок кизонзон лангс, оцю мяльса синь морсезень илатнень, радня мархта васедематнень пингста.
Мария Петровнань аляц, Пётр Сараев, цебярь гармонист. Лама киза мельцек морсесь гармонияса районнай и республиканскяй пуромкснень пингста. Шумбрашить мархта сотф прябалатнень сюнеда, гармониять савсь кадомс, но шуфтть ланга керсемась лядсь асу мокшаляти кельгома тевкс. Тяни сон работай Москуса.
Мокшавать тядяц, Галина Николаевна, пенсияса, лезни стиренцты уноконзон мархта.
Мария Петровнань колма иденза. Оцюсь, Арсений, ётась 5-це классу, омбоцесь—Всеволод—омбоцети, стирнянцты, Евати, 9 ковнят.
Аф ваномок сянь лангс, што сонь колма шабанза, мокшавась аф аньцек морси, но и мушенды пинге кельгома тевонзонды. Башка васта эряфсонза занци прикладной творчествась. Тиенди ёмла ожнаста национальнай мазоптомбяльхть. Схематнень арьсесыне, тюснень кочксесыне сонць. Нолясыне тевс национальнай орнаментть, лама тюснень, конатнень фалу кельгозь и кельгсазь Мордовиянь эряйхне.
Кда корхтамс морамань асушинц колга, то тянь оцю мяльса тиендьсы кода коллективса, стане и ськамонза.
«Эряма» триось сидеста примси участия благотворительнай мероприятиятнень эса и максси концертт госпитальса пчкси специальнай военнай операциять пингста ранендафненди.
Аф кунара Мария Сараевать «Минь марсотама!» сольнай концертоц ульсь Торбеевскяй райононь Жуку велеса. Пуроптозь и ётафтозь сонь велень поселениянь оцюнять тевонзон тиендиснон Любовь Петровна Велинать, Культурань кудонь работникнень Людмила Фёдоровна Афонинать и Елена Васильевна Салайкинать мархта.
Концертть пингста кочкаф ярмакне нолдафтольхть специальнай военнай операциянь участникненди коське шонгарямонди. Жуку велеса кунара мольфтеви тяфтама благотворительнай тев.
«Край родной—ближе к сердцу моему» мокшавать сольнай концертоц удалась.
Мес сась мяльс ётафтомс сонь Торбееваса? Вов мезе отвечась Мария Петровна:
—Аф кунара лиссь краезень, коса шачень-касонь, кона учсамань лямбоса и кельгомаса, колга мокшень кяльса од морось. Самай Торбееваса васенцеда ёрань «няфтемс» сонь. Вдь тяса тонафнень и ушедонь морсема. Концертть программаса кайгсть морот кода мокшэрзянь, стане и рузонь морот. Ульсть патриотическяйхть, родинать, кельгомать и, конешна, семьять колга.
Мероприятиять программанц тиемста тейне лездсть ялгане. Ламотне эздост работайхть мокшэрзянь культурать виияфтоманц и содафокс тиеманц инкса. Пцтай сембе кирдезь ширезень и лездсть. Мялезе-арьсемазе ётафтовсь эряфс. Тя—семьянь питнишитнень содафокс тиендемасна, Родинати кельгомась и од ломаттнень вельде народоньконь коензон ванфтомасна.
Спасибан сембонди, кие сашендсь концертозон. Оцю сюкпря Торбеевань Культурань кудть коллективонцты лямбоста примаманкса и Культурань кудть директоронцты Андрей Леветаевонди мероприятиять анокламаса лезксонь максоманкса.
Башка сюкпря приветственнай валонкса РФ-нь Государственнай Думань депутатти Юлия Васильевна Оглоблинати и Мордовскяй народть Межрегиональнай общественнай организациянц председателенцты Юрий Александрович Мишанинонди.
Концертть пингста мораф «Шкаень уженяньке» мороть валонзон тячи макссаськ газетаса. А кельгома мокшаваньконди Мария Сараевати арьсетяма творческяй од сатфкст и сембе цебярть!
Татьяна АЛЬШИНА.
ШКАЕНЬ УЖЕНЯНЬКЕ
Валхне Галина Будкоть (Лаушкинать)
Музыкась Мария Сараевать
Мокшень модать лангса,
Сетьме шиста шачень.
Най ни кельгомаса,
Эрь пингоня ащень.
Тейть мон пара мяльса,
Шачем крайняй, моран.
Тядянь-алянь кяльса,
Вайме панжемс ёран.
Шкаень уженяньке,
Тейнек аф юкстави.
Арьси фалу пряньке,
Седистонк аф яви.
Варманясь уфамазь,
Лия мастор ланга.
Маланяса улелеме,
Ласьколеме ялга.
Васьфнят эсон тяса,
Фалу кшиса-салса,
Корхтайхть эрь курняса,
Пара, ляпе валса.
Кда улельхть пацят,
Кеподелень вяри
Вишкста, нармонь лаца,
Лиелень куд пяли.