Святой Тройцясь мяляфтовиста ётни мокшень ламоц велетнень эса. Сидеста сашендови сон пси шинди. И аф аньцек мани перьфпяльть и шить пиди сюролданзон сюнеда. «Псиста» Святой Тройцясь уленди ётафневи илатнень—радня ломаттнень мархта васедематнень, инжиень васьфнематнень, моротнень, сиде моронятнень инкса. Кода, кепотьксонди, тядде сон ётась Ковылкинскяй райононь Рыбкино велеса, кона содаф тевонь содай, асу, ёмла родинань кельги ломанензон мархта. Самай синь анокласть землякснонды концерт. Оцю путкс тя тевти тисть Москуса эряй ниле акатне-сазорхне—«Эх, Мордовочка!» Мордовия Республикань Народнай самодеятельнай семейнай ансамблень солисткатне-мокшаватне Татьяна Чумбаева, Анна Ткачёва, Елена Чинилина и руководительсна Наталья Кувезенкова.
Творческяй коллективснонды тяддень февральста топодсь 23 киза. И сембе тя пингть аф озадонь седихть ащи мокшаватне тиендьсазь семботь шачема шири сяда сидеста сашендомать инкса. Эрь концертсна ётни фкя ваймоса, ваныхне ламос озада аф кирневихть, а лисендихть мархтост морама и кштима. Меле азондыхть акатненди-сазорхненди оцю спасиба и теест уленди цють ужяль явомс мокшаватнень-баяраватнень мархта, вдь синь моросна мушендыхть «киня» ваймозост и седизост.
Тядде Тройцяста Рыбкино велень Культурань кудса марьти ашель коза прамс—лама ломань пуромкшнесь концертть ванома. Ушедсь сон «Луганяса келунясь» мороста, сонь моразе Рыбкинань Культурань кудонь «Ляйне» ансамбльсь, конань солисткац Светлана Калташкина.
Отечествань аралаень кизоня кайгсь «Катюша» морось.
«Эх, Мордовочка!» коллективсь казсь сембонди оцю концерт, конань пингста кайгсть рузонь, мокшень, мокшэрзянь морот. Тяда башка, моротнень и кштиматнень мархта пуромфнень кеняртьфтезь Елена и Семён Самородофне.
Наталья Кувезенковась азондозе, што тядде концертса ульсь специальнай инжи—Саранскяйста тертьфоль «Земляки» группась. А вятезе марнек программать Пензань цёрась, кона тяни эряй Москуса, Алексей Марутин. Сон—профессиональнай режиссёр, сценарист. Наталья Тимофеевна шарфтсь мяль, што сяда тов коллективсь кармай кирдема кеме соткст мархтонза и марса арьсекшневи ётафтомс эряфс «Эх, Мордовочка!»-трансформация» эсь лацонь проектсь. «Седикуцюнясь» ляды сякось—мороньке, Мордовиять, коеньконь-обуцяньконь, щамоньконь содафокс тиемасна, но репертуарти сувафтови и лама мезе одня».
Улеза, кле, мяль, и арьсефоньке сатови!
Ниле акатне-сазорхне—аф профессиональнай артистт, концертт ётафнихть сяс, мес тянь вешси ваймосна. И тиендьсазь ваныхненди казне лаца. Сценать лангс эрь лисемасна—аф работасна, а кельгома тевсна.
Рыбкино велеса илань концертть ванома сашендсь и Ковылкинскяй райононь Почётнай гражданинць, патриотсь, Москуса Мокшэрзянь землячествать членоц Егор Сорокин. Сон лама лезни земляконзонды (сонць Бранчеевкаста) и аф аньцек теест: пуромкснень эзда сявомок специальнай военнай операциянь боецнень ширеснон кирдемаснонды молемс. Тя мезтьке лездсь концертть аноклаензонды и ётафтыензонды.
Тя шиня сембе пуромфнень Святой Тройцять мархта поздравляндазень велень поселениянь оцюнясь Алексей Трунькин.
Рыбкинань Культурань куду пуромфне нинге ламос кармайхть лятфнемонза «Эх, Мордовочка!» коллективть и лия исполнительхнень колма частонь кувалмоса концертснон!
Татьяна АЛЬШИНА.