24 январьста Саранск ошень Военнай и трудовой подвигонь Мемориальнай музейса ётафтовсь «Мяляфтомс и мзярдовок аф юкснемс!» лем ала историческяй част, кона лемтьфоль Холокостонь жертватнень колга мялямонь Международнай шити.

Минь справканьке: Холокостонь жертватнень колга мялямонь Международнай шись ладяфоль 2005 кизонь 1 ноябрьста ООН-нь Генеральнай ассамблеять заседанияса. Сон васьфневи эрь кизоня 27 январьста, мзярда советскяй армиясь 1945 кизоня сявозе «Освенцим» концентрационнай лагерть и нолдазень воляс сонь узниконзон. Сембоц ульсь 7000-да лама ломань.
Кода содаф историческяй докуметтнень эзда: «Освенцим» («Аушвиц») концлагерть пачк Великай Отечественнай войнать кувалмоста ётась 1,3 миллионда лама ломань, конатнень эзда 1,1 миллионць шавфоль газовай камераса. Великай Отечественнай войнать пингста фашисттне шавсть 27000000 советскяй гражданин, конатнень синь лувозь коммунистокс.
Сембе ня преступлениятнень инкса германскяй фашисттнень оцюнясна казниндафтольхть 1946 кизоня Нюрнбергскяй Международнай военнай трибуналть приговоронц коряс.

«Мяляфтомс и мзярдовок аф юкснемс!» историческяй частть панжезе и вятезе музеень научнай пропагандань отделонь научнай сотрудниксь Татьяна Чиндяйкина. Сон азозе, кле, Холокостсь—тя евреень шавондомась, конань мольфтезь германскяй фашисттне 1933-1945 кизотнень Германияса, Европань лия странаса и Советскяй Союзса. Тя шавондомась тяфта жа вятевсь рузонь военнопленнайхнень, цыгаттнень, полякнень и лия нароттнень каршес, конатнень синь ашезь лувонда ломанькс.
Холокостсь ушедовсь Германияса, мзярда 1933 кизонь 30 январьста рейхсканцлеркс путфоль Гитлер. И тяка кизонь 20 мартста Германиянь Дахауса строяфоль васенце концлагерсь. И ся пингста ушедовсь Холокостсь, конань германскяй фашисттне вятезь 1945 кизонь 9 майть самс.
Сяльде пуромфнень инголе выступленият тисть «Педагог-13» проектнай тевонь лабораториянь методистсь Александр Рагозин и специальнай военнай операциянь ветеранць Юрий Полобичев.
Саранскяень 41№ школаса тонафнись Варвара Лапшина лувозень «Реквием» и «Бабий Яр» стихотворениятнень, конат лемтьфт Холокостонь жерватнень колга мялямти.
«Мяляфтомс и мзярдовок аф юкснемс!» историческяй частсь аделавсь кафта нюрьхкяня документальнай кинофильмаса. Эсост азондовсь Холокостонь жертватнень колга.
Владимир Нестеров.