Национальнай драматическяй театрась панжезе од сезононц

Тядде Мокшэрзянь национальнай драматическяй театрась сембода рана лия театратнень коряс ушедозе од сезононц. 1 сентябрьста Саранск ошень эряйхне и инжихне пара мяльса тага васедсть кельгома актёрснон мархта. Кода фалу, од сезонць Национальнай театраса ушеткшни мокшень или эрзянь кяльса спектакльста. Тядде инжихненди няфтьфоль «Масторава» од постановкась, кона мольфтевсь 3 кяльса: рузкс, мокшекс, эрзякс. Мезе корхтавсь сценать лангса, артисттне синць эстокиге ётафнезь рузонь кяльс.
«Масторава» спектакльсь ладяф мокшэрзянь народть этническяй эпосонц коряс. Эсонза азондови масторть, ломанть, народть эвондамаснон колга. Национальнай театрать репертуарсонза ульсь аф кржа спектакль, конат лемтьфольхть тя темати. Но Москувонь режиссёрсь Анна-Ксения Вишневская варжакстсь лангозонза лия ширде. «Масторавати» анокламать сон ушедозе мокшэрзянь литератураста героическяй эпость сотцемста. Анна-Ксения якась мокшэрзянь велетнень ланга, коса эсь сельмосонза няезе народоньконь эряфонц, коензон, обуцянзон.
Режиссёрсь работай финно-угрань темать мархта аф васенцеда. Тяда инголе сон путнесь ни хантынь и мансинь, коминь нароттнень этническяй фольклорснон коряс спектакльхть, конатнень инкса получсесь «зрнянь шамафкст». Тяниень пингонь технологиятне лездсть козякофтомс «Масторавать» визуальнай лиякс арафтоматнень мархта. Кепотьксонди, мзярда азондовсь Ведявать колга, вярде тушендсь пизем, а Норовавать мархта сценаса венемкшнесь розь. Мокшэрзянь народть эвондаманц колга азондомась саласыне мяльснон эрь кодама кизоса ломаттнень.
Спектакльть няфтемац ушедсь интерактивста. Ваныхнень тердезь мокшэрзянь семьяв инжикс и азондозь, кода эвондасть ведсь, модась и «Великай нармонць» («Иненармунць»). Премьерать эсь лацонь ширец нинге и сянь эса, што ваныхне озафтольхть сценать лангс, ёфси маласа актёрхнень эзда. Тя лездсь тиемс Масторавать колга азондомать нинге сяда шарьхкодевикс и малакс. Инжихне синць арасть участникокс.
Спектакльса примай участия пцтай сембе актёрскяй составсь. Артистти Павел Михайловонди сатовсь эсь лацонь роль, сон налхкозе Вирявать. Тяфтавок серес оцю актёрти савсь путомс пильгозонза специальнай приспособленият, штоба няфтемс вирень шкайть нинге сяда сериста. Шамафксть пачк стакаль содамс, што налхки аля.
Мокшэрзянь национальнай драматическяй театрать директороц Светлана Ивановна Дорогайкина мярьгсь: «Васендакиге ёраме анокламс тя постановкать аньцек туристтненди, а лиссь мокшэрзянь эпость коряс башка оцю спектакль. Мзярс эсонза азондови аф сембе шкайхнень колга, но, надиян, пингонь ётазь минь касфтсаськ тя спектакльть. Пяк кельговсь артисттненди од режиссёрсь. Работатама мархтонза васенцеда, но, арьсян, аф мекольцеда».
Светлана Ивановна азондозе, што тяниень пингть сембе вийса мольфтеви аноклама и лия спектакльхненди, конат няфтевихть тя сезонцта. Режиссёрсь Б.Н.Манджиев, кона тяда ингольдень сезоттнень путозень национальнай театраса «Куйгорож», «Эрьзя. Валдос ливтиця», «Апак лемде эрзянть тейтерезэ» постановкатнень, тяни работай В.И.Мишанинать «Менелень нюрям» пьесанц лангса. Тя романтическяй комедиясь кармай сотф мокшень свадьбать мархта. Стане жа Санкт-Петербургста сай группать мархта национальнай театраса путови Н.В.Гоголень «Ночь перед Рождеством» произведенияц эрзянь кяльса. Билеттнень рамамста од ломаттненди ули кода нолдамс тевс «Пушкинскяй картать».
О.Белкина.