Тяддесь пяк козя юбилеень и мяляфтови датань ширде Мордовскяй АССР-нь искусствань Заслуженнай деятельти, Мордовия Республикань Народнай артистти, Российскяй Федерациянь искусствань Заслуженнай деятельти, Россиянь Композиторонь союзть Почётнай деятеленцты, Россиянь Композиторонь союзть Д.Д.Шостаковичень лемса премиянц лауреатонцты, Мордовия Республикань Оцюнять музыкальнай искусствань премиянь лауреатонцты, Мордовия Республикань Славань III-це степенень орденть мархта, «Мордовия Республикать инголе заслугатнень инкса» медальса казьфти, мокшавати, газетаньконь морафниенцты и кунардонь ялганцты Нина Васильевна Кошелевати. Азсаськ, што тядде теенза максфоль «Мордовия Республикань Оцюнять театральнай искусствань премиянь лауреат» лемсь.
2022 кизонь июльть васенце шистонза Нина Васильевнань сонцень юбилеец-шачема шиц, тяда башка, тядде топодсь 50 киза творческяй деятельностенцты, 45 киза—педагогокс улеманцты, 40 киза кода сон Россиянь Композиторонь союзонь член, 20 киза Российскяй Федерациянь Театральнай деятелень союзса улеманцты, 20 киза кода кочкафоль Мордовия Республикань Композиторонь союзти председателькс.
Нина Васильевна Кошелевать мархта корхнеманьке ётась Мордовия Республикань Композиторонь союзса, кона вов ни аф васенце кизось «эряй» А.С.Пушкинонь лемса Мордовия Республикань Национальнай библиотекать зданиясонза. Нина Васильевна васьфтемань цебярь азоравакс, кона муй сувай эрь инжити лямбе пара валхт.
Корхтаманьконь, шарьхкотьф, ушедоськ Нина Васильевнань эряфонь кинц-янонц колга, кона ушедсь Мордовиянь Старошайговскяй райононь Вертелим мокшень велеса.
«Идькс пингозень, ёмла родиназень колга лятфнян пяк и пяк сидеста. Шачень Вертелимса крестьянонь оцю семьяса. Кемонь иттнень эзда шиса лядсть, ужяль, аф сембе. Школав тунь и васенце классть шумордайне велеса. А тяда меле эряфсон лиссь крута шаркс. Пачкодсь куля, што Саранскяйса панжевсь музыкальнай школа-интернат, коза кочкайхть асу шабанят мокшень и эрзянь велетнень эзда. А мон, эряви азомс, кельгине моротнень, кулхцонкшнине оцю мяльса, монцьке морсень. Кудонь стенасонк повфтафоль радио. Кулемок кодамовок мора, ушеткшнень морамонза. «Коста содасак музыкать?»,—кизефнемань тядязе Евгения Гурьяновна. Ашель мезе отвечамс теенза. Пади, ётась музыкати кельгомась шачфтыезень эзда—сонь вдь пяк цебярель вайгялец, содась народнай пяк лама мора. Браднень ульсь гармониясна. Эряме аф козяста, хуш и пирьфоньке пяшксель жуватада, путнеме оцю перет. Ярмак пяк ашель, сяс алязе, Великай Отечественнай войнань участниксь Василий Емельянович Кошелев, добувась гармония, максомок инксонза уча. Мзярда брадне ашельхть кудса, сявондине стака, тейне, стирняти, пцтай аф кеподеви гармониять, озсень вальмять лангс, путнемок пильгонень скомняти и морсень. Улема, тядязе, няемок тянь, и сась мяльс максомс монь музыкальнай школав-интернату»,—мярьгсь Нина Васильевна.
Саранскяи сон сась кенярдезь. Оцю мяльса ванондозень сери, мазы зданиятнень, дивандакшнесь тов-сей пульхки лама ломаттнень лангс, конат бта коль эряскодсть кати-коза. Школать-интернатть директороц И.А.Адаев кизефтезе Вертелимста саф ёмла Нинать, мезе сон машты. Инксонза отвечась тядяц, Евгения Гурьяновна, мярьгомок, што машты морама. И вов тядят-стирьхть Кошелеватне моразевсть кафонест. Вайгяльсна срадсть аудиториять келес! И.А.Адаев Е.Г.Кошелевати азозе, што стирняц Нина—музыкальнай асу мархта идь. Сяка кизоня 1 сентябрьста сявомок сон ушедсь тонафнема Саранскяйса музыкальнай школаса-интернатса. Сембось тусь Нина Кошелевать мяльс, сон мусь ялгат, но пяк лажаткшнесь Вертелим велети, шачфтыензонды-касфтыензонды, целайнек семьянцты. Тядяц, Евгения Гурьяновна, кой-коста сашендсь Саранскяи стиренцты, но пря иднянцты ашезь няфне. Ванондсь лангозонза ширде, мзярда ся занятиясоль—кенкшть фталда или якась музыкальнай школать-интернатть садга. Тяфта ёрась ванфтомс иденц аварькшнемада-мезьда.
Музыкальнай школаса-интернатса Нина Кошелева кочказе пианинать. Мес? Тя кизефксть лангс фкя лацонь ответ аф максови тянемс. Кати мазышинц инкса, кати нинге мезенксовок.
Школать-интернатть шумордамдонза меле Н.В.Кошелевась поступась Л.П.Кирюковонь лемса музыкальнай училищать теоретическяй отделениязонза. Пианинада башка, мялезонза тусть фортепианось, сольфеджиось, сяс содамошинзон касфнезень оцю мяльса. Сяда тов поладозе сочинениянь сёрмадоманц.
Музыкальнай училищада меле Нина Васильевна ушедсь работама Сире Шайгавонь музыкальнай школаса. Покодсь преподавателькс, а илять якась илядень школав, получась средняй образования.
Сяда тов Н.В.Кошелевась поступась Казанскяй государственнай консерваторияв, кармась тонафнема композиторскяй факультетса. Аф тёждяль тоса, но мокшень стирсь ашезь пеле стакада-сталмода. И сатозе арьсефонц.
Консерваториять шумордамдонза меле Нина Васильевна мрдась Саранскяи и ушедсь работама преподавателькс Л.П.Кирюковонь лемса музыкальнай училищаса, коса покоди тянемс. Аф фкя кемотть киза сон аноклай музыкантт-профессионалхт, конат сяда тов касфнесазь содамошиснон консерваторияса.
Аспирантураса тонафнемста Н.В.Кошелевась васьфтезе сай пингонь мирденц—од врачть-хирургть Николай Васильевич Немечкинонь. Семьянь пуроптомда меле шачсь цёрасна, тяни Василий Николаевич образованияс коре юрист. стирьсна, Ольга Николаевна, кона тусь алянц киге, арась врачекс. Аф ваномок сянь лангс, што тядяснон киснон ашезь кочка, Нина Васильевнань кафта племянниконза арасть профессиональнай музыкантокс.
Кда ваномс Н.В.Кошелевать творчестванц, эсонза башка васта занцихть мокшэрзянь народнай моротнень обработкасна. Композиторсь кирди кеме соткст республикань театратнень мархта. Сон—«Алёна Арзамасская» национальнай васенце балетть автороц, постановкац ульсь 2012 кизоня Саранскяйса И.М.Яушевонь лемса Государственнай музыкальнай театраса. 2020 кизоня ульсь «Мокшэрзянь легенда» балетть-ёфксть премьерац. 2021 кизоня 22 августста «Темниковса кизонь театральнай сезонць» фестивальть пингста путфоль «Алёна Арзамасская» балетть омбоце редакциянц постановкац.
Н.В.Кошелева—музыкальнай и драматическяй спектальхнень авторсна: «Сиянь эрьхке», «Кудатя», «Шава кудса ломатть» и стак тов.
Композиторть произведениянза нолдафт компакт-диск лаца: «Панжи лайме порась: композиторть Нина Кошелевать моронза», «Композиторсь Нина Кошелева: хоровой, камерно-вокальнай и инструментальнай музыкась», «Композиторть Нина Кошелевать моронза» и лиятне.
Произведениянза сувсихть Мордовиянь музыкальнай инь цебярь коллектифнень: Мордовия Республикань Государственнай камернай хорть, «Умарина», «Келу», «Росичи» ансамбльхнень репертуарозост.
Синь кайгсть и кайгихть Москувонь, Санкт-Петербургонь, Омск ошень, Казанень, Нижняй Новгородонь, Уфань, Сыктывкаронь, Чебоксары ошень концертнай залхнень эса.
Сон аф весть няфнезе Мордовиять музыкальнай искусстванц омба масторса, коза якась концерт и творческяй васедема мархта.
Нина Васильевна аф аньцек асу композитор, но и тевонь содай педагог. Л.П.Кирюковонь лемса Саранскяень музыкальнай училищаса вятьсы композициять, сольфеджиоть, музыкать элементарнай теориянц, инструментоведениять.
Вяти общественнай тефт: сон—Россиянь Композиторонь союзть членоц, Россиянь Театральнай деятелень союзть членоц, Мордовскяй (мокшень и эрзянь) народть Межрегиональнай общественнай организациянц Исполкомонц членоц, лама киза ульсь Мордовия Республикань Общественнай палатань членкс.
Нина Васильевна Кошелевать инициативанц коряс ётафтфтольхть Мордовиянь композиторхнень музыкаснон кота фестивальсна, «Мордовиянь композиторхне—иттненди» фестивальхне. Сон—Поволжьянь и Приуральянь композиторхнень музыкаснон фестивальснон организаторсна, мезенкса теенза максфоль Россиянь Композиторонь союзть благодарностец и «Россиянь Композиторонь союзонь почётнай деятель» лемсь.
Работанкса, конань тиендьсы мокшэрзянь композиторскяй искусствать и республикать музыкальнай культуранц од серьс кеподеманц инкса, композиторти 2017 кизоня максф Московскяй педагогическяй государственнай университетть ЮНЕСКО кафедранц благодарностец.
Мокшавась Нина Васильевна Кошелева—Мордовия Республикань Государственнай гимнать музыканц автороц.
«Тя ульсь ётай веконь вейхксогемонце кизотнень. Эста азфоль Мордовия Республикань Государственнай символхнень—Гимнать, Гербть, Флагть арьсемаснон коряс конкурс. Гимнати музыкась шачсь мяльсон монць аф содаса кода. Тяштемстонза арьсень тейне инь мала и питни ломанезень—тядязень, а стане жа народозень колга. Валхнень сёрмадозень поэтсь С.В.Кинякин»,—лятфни композиторсь.
Сембоц сон тяштсь тя или тона жанрань 300-та лама произведения: балетт, оратория, кантатат, сюитат симфоническяй и камернай оркестратненди, народнай инструменттнень оркестраснонды, идень опера, вокальнай, инструментальнай, хоровой сочиненият, музыка театральнай спектакльхненди, произведеният иттненди и морот. Ламотне Н.В.Кошелевать лемнесазь «мокшэрзянь Пахмутовакс». Музыкац вов ни 50-да лама киза кайги концерттнень, фестивальхнень и конкурснень эса и пачкотькшни ломаттнень седис сяс, мес авторсь тяштемстонза сонь ётафнесы седиенц пачк.
«Мокшень правдать» коллективоц седи ваксста поздравляндасы Н.В.Кошелевать шачема шинц-юбилеенц мархта! Арьсетяма кеме шумбраши, паваз и нинге лама, лама пинге кеняртьфнемс кулхцондыть произведениянзон мархта.
Т.Альшина.